Associations' / Institutions' News

Media Release

Mangaluru, Aug 24 : As part of the Konkani Manyata Divas celebrations, Mandd Sobhann, Konkani’s premier cultural organization, has launched the Konkani Film Festival ‘Film Sobhann’ at Bharath Cinemas in Bejai. The festival, which began on August 23, will feature an ensemble of 30 movies over 23 days, showcasing the richness and diversity of Konkani cinema.

'ಫಿಲ್ಮ್ ಸೊಭಾಣ್' ಸುರ್ವಾತ್ಲೆಂ ; ಮೋಗ್ ಆನಿ ಮಾಯ್ಪಾಸ್ ಹೌಸ್ ಫುಲ್

``ಫಿಲ್ಮ್ ಸೊಭಾಣ್ ಉಗ್ತಾವಣ್ ಕರುಂಕ್ ವ್ಹಡ್ ವ್ಹಡ್ ಕಲಾಕಾರಾಂಕ್ ಹಾಡೊಂವ್ಚಿ ತಾಂಕ್ ಮಾಂಡ್ ಸೊಭಾಣಾಕ್ ಆಸಾ. ಪೂಣ್ ಮಾಂಡ್ ಸೊಭಾಣ್ ಕೆನ್ನಾಂಯ್ ವೆಗ್ಳೆಂ. ಹಾಂಗಾಚ್ ಶಿಕುನ್ ವ್ಹಡ್ ಜಾಲ್ಲ್ಯಾ ಮ್ಹಜೆ ತಸಲ್ಯಾ ಎಕಾ ಲ್ಹಾನ್ ಕಲಾಕಾರಾಕ್ ಹೊ ಮಾನ್ ದಿತಾತ್ ಮ್ಹಳ್ಯಾರ್ ಹಾಚ್ಯಾಕೀ ವ್ಹಡ್ ಭಾಗ್ ದುಸ್ರೆಂ ನಾ.'' ಅಶೆಂ ಮ್ಹಣಾಲೊ ಬಹುಭಾಷಾ ನಟ್ ಸುನೀಲ್ ಸಿದ್ದಿ. ಮಾಂಡ್ ಸೊಭಾಣಾನ್ ಕೊಂಕಣಿ ಮಾನ್ಯತಾ ದಿಸಾ ಬಾಬ್ತಿನ್ ಮಾಂಡುನ್ 23-08-24 ವೆರ್ ಭಾರತ್ ಸಿನೆಮಾಸ್, ಇಜಯ್ ಹಾಂಗಾ ಹಾಡ್ಲಲೆಂ ಫಿಲ್ಮ್ ಸೊಭಾಣ್ ಉಗ್ತಾವ್ಣೆ ಕಾರ್ಯಾಂತ್ ತೊ ಕೊಂಕ್ಣಿ ಬಾವ್ಟೊ ಉಬಾರ್ನ್ ಉಲಯ್ತಾಲೊ.

ಸುರ್ವೆರ್ ಸುಮೇಳ್ ಪಂಗ್ಡಾನ್ ಕೊಂಕ್ಣಿ ಗೀತ್ ಗಾಯ್ಲೆಂ. ಪಯ್ಲ್ಯಾ ದಿಸಾಚೆಂ ಫಿಲ್ಮ್ `ಮೋಗ್ ಆನಿ ಮಾಯ್ಪಾಸ್' ನಿರ್ಮಾಪಕಾಂ ತರ್ಫೆನ್ ಹಾಜರ್ ಆಸ್ಲಲ್ಯಾ ಡೊಲ್ಲಾ ಮಂಗ್ಳುರ್ ಆನಿ ಪ್ರೇಮ್ ಲೋಬೊ ಹಾಂಕಾಂ ಶ್ಹೆಲೊ ಪಾಂಗ್ರುನ್ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲೊ.

ವೆದಿರ್ ಮಾಂಡ್ ಸೊಭಾಣ್ ಕಾರ್ಯಾಚೆ ಸಹ ಪೋಷಕ್ ಪ್ರೊವಿಟ್ ಫುಡ್ಸ್ ತರ್ಫೆನ್ ಪ್ರೆಸಿಲ್ಲಾ ಕುಟಿನ್ಹಾ ಆನಿ ಸಿಟಾಡೆಲ್ ಬಿಲ್ಡರ್ಸ್ ತರ್ಫೆನ್ ಅಜಿತ್ ಕುಮಾರ್ ಗುರ್ಕಾರ್ ಎರಿಕ್ ಒಝೇರಿಯೊ, ಅಧ್ಯಕ್ಷ್ ಲುವಿ ಪಿಂಟೊ, ಕಾರ್ಯದರ್ಶಿ ಕಿಶೋರ್ ಫೆರ್ನಾಂಡಿಸ್, ಸಂಯೋಜಕ್ ರೊನಿ ಅರುಣ್ ಹಾಜರ್ ಆಸ್ಲಲೆ. ಅರುಣ್ ರಾಜ್ ರೊಡ್ರಿಗಸಾನ್ ಕಾರ್ಯೆಂ ಚಲಯ್ಲೆಂ.

ಉಪ್ರಾಂತ್ 1977 ಇಸ್ವೆಂತ್ ಪ್ರದರ್ಶನಾಕ್ ಪಡ್ಲಲೆಂ ಮೋಗ್ ಆನಿ ಮಾಯ್ಪಾಸ್ ಫಿಲ್ಮ್ ದಾಕಯ್ಲೆಂ. ಸಾತ್ ವೊರಾಂಚೆಂ ಪ್ರದರ್ಶನ್ ಹೌಸ್ ಫುಲ್ ಚಲ್ಲೆಂ.

ಆಜ್ (24-08-24) ಗೊಂಯ್ಚೆಂ ಫಿಲ್ಮ್ `ಕ್ರೇಜಿ ಮೊಗಿ' ಸಾಂಜೆರ್ 4.00 ಆನಿ 7.00 ವೊರಾರ್ ಪ್ರದರ್ಶನ್ ಆಸಾ. ಟಿಕೆಟಿಂ ಖಾತಿರ್ 8105226626 ಕ್ ಸಂಪರ್ಕ್ ಕರಾ.

***

ಕೊಂಕ್ಣಿ ಮಾನ್ಯತಾ ದಿಸಾ ಬಾಬ್ತಿನ್ ಮಾಂಡ್ ಸೊಭಾಣಾನ್ ಆಗೋಸ್ತ್ 23 ಥಾವ್ನ್ ಸೆಪ್ಟೆಂಬ್ರ್ 14 ಪರ್ಯಾಂತ್ ಕೊಂಕ್ಣಿ ಚಲ್ ಚಿತ್ರ್ ಉತ್ಸವ್ `ಫಿಲ್ಮ್ ಸೊಭಾಣ್' ಮಾಂಡುನ್ ಹಾಡ್ಲಾಂ ಆಸುನ್, ಮಂಗ್ಳುರ್ ಇಜಯ್ ಭಾರತ್ ಸಿನೆಮಾಂತ್ ಸದಾಂ ಸಾಂಜೆರ್ 4.00 ಆನಿ 7.00 ವೊರಾರ್ ದೋನ್ ಶೋ ಆಸುನ್, 23 ದಿಸಾಂನಿ ಒಟ್ಟುಕ್ 30 ಫಿಲ್ಮಾಂ ದಾಕಯ್ತಲೆ. 25 ಫಿಲ್ಮಾಂ ಆನಿ 5 ಶೊರ್ಟ್ ಫಿಲ್ಮಾಂ ಪಳೆಂವ್ಕ್ ಮೆಳ್ತಲಿಂ. ಹಾಚೆ ಸಾಂಗಾತಾ ಭುರ್ಗ್ಯಾಂ ಖಾತಿರ್ 2 ಫಿಲ್ಮಾಂಚಿಂ ವಿಶೇಸ್ ಪ್ರದರ್ಶನಾಂ ಆಸ್ತಲಿಂ.

ಕರ್ನಾಟಕ, ಗೊಂಯ್ ಆನಿ ಮಹಾರಾಷ್ಟ್ರಾಚಿಂ, ಆದ್ಲಿಂ ಆನಿ ಆತಾಂಚಿಂ, ಪರ್ನ್ಯಾಂಚಿಂ ಆನಿ ತರ್ನ್ಯಾಂಚಿ ಚಲ್ ಚಿತ್ರಾಂ ದಾಕಯ್ತಲೆ. ಹಿಂದೂ, ಕ್ರಿಸ್ತಾಂವ್, ಜಿ ಎಸ್ ಬಿ, ಆರ್ ಎಸ್ ಬಿ, ಇತ್ಯಾದಿ ಕೊಂಕ್ಣಿ ಸಮುದಾಯಾಂಚಿಂ ಚಲ್ ಚಿತ್ರಾಂ ಆಸುನ್, ಪ್ರದರ್ಶನಾಂ ವೆಳಿಂ ತ್ಯಾ ತ್ಯಾ ಸಿನೆಮಾಚ್ಯಾ ನಿರ್ಮಾಪಕ್ ಆನಿ ನಿರ್ದೇಶಕಾಂಕ್ ಮಾನ್ ಕರ್ತಲೆ.

ಸೆಪ್ಟೆಂಬ್ರ್ 01 ವೆರ್ ಸಕಾಳಿಂ 10 ವೊರಾರ್ ಕಲಾಂಗಣಾಂತ್ `ಕೊಂಕ್ಣಿ ಸಿನೆಮಾ ಶೆತಾಚಿಂ ಪಂಥಾಹ್ವಾನಾಂ ಆನಿ ವಾಡಾವಳಿಚ್ಯೊ ಸಾಧ್ಯತಾಯೊ' ಹ್ಯಾ ವಿಶ್ಯಾಂತ್ ಏಕ್ ವಿಚಾರ್ ಸಾತೆಂ ಆಸಾ ಕೆಲಾಂ. ಆಸಕ್ತ್ ವಂತಾಂನಿ ಹಾಂತುಂ ಭಾಗ್ ಘೆವ್ಯೆತಾ.