Associations' / Institutions' News

Media Release

Mangaluru, Aug 18 : 'Sur Sobhan' Konkani vocal training was inaugurated at Kalaangann here on August 18, 2022. The programme is being led by the Mandd Sobhann troupe, Sumel. 

'ಶಿಕ್ಲ್ಯಾರ್‌, ಜಿಕ್ಲ್ಯಾರ್‌ ಸಂಸಾರಾಚಿ ನದರ್‌ ತುಮ್ಚೆರ್‌' - ಸುರ್‌ ಸೊಭಾಣ್‌ ಗಾಯಾನ್‌ ತರ್ಭೆತಿ ಉಗ್ತಾವ್ನ್‌ ಜ್ಯಾಕ್ಲಿನ್‌ ಫೆರ್ನಾಂಡಿಸ್

ಮಾಂಡ್‌ ಸೊಭಾಣ್‌ ತಾಲೆಂತಾಂಕ್‌ ತರ್ಭೆತಿ ದಿತಾ, ವೆದಿ ದಿತಾ. ಹಾಂವೆಂಯ್‌ ಕಾಂಯ್‌ ನಾಂವ್‌ ಜೊಡ್ಲಾಂ ತರ್‌, ಹಾಂಗಾಚ್ಯಾ ಬಳಾಧಿಕ್‌ ತರ್ಭೆತೆಚೊ ಮೊಟೊ ವಾಂಟೊ ಆಸಾ. ಆಮಿ ಸದಾಂ ಶಿಕಜೆ, ಮೆಳ್ಳಲೆ ಆವ್ಕಾಸ್‌ ವಾಪರಿಜೆ. ಹಾಂಗಾ ಥಾವ್ನ್‌ ಬರೆಂ ಕರ್ನ್ ಶಿಕುನ್‌ ಗೆಲ್ಯಾರ್‌, ಜಿಕುನ್‌ ಆಯ್ಲ್ಯಾರ್ ತುಮ್ಚೆರ್‌ ಸಂಸಾರಾಚಿ ನದರ್‌ ಪಡ್ತಾ. ಹ್ಯಾ ಸುರ್‌ ಸೊಭಾಣಾಂತ್‌ ಶಾಸ್ತ್ರೀಯ್‌ ತರ್ಭೆತಿ ಮೆಳ್ತಾನಾ, ಸಿಡಿಂನಿ, ಫಿಲ್ಮಾಂನಿ, ವೆದಿಂನಿ ಗಾಂವ್ಕ್‌ ಆವ್ಕಾಸ್‌ ಮೆಳ್ತಾನಾ ಹ್ಯಾ ತರ್ಭೆತೆಚೆಂ ವ್ಹಡ್ಪಣ್‌ ತುಮ್ಕಾಂ ಕಳ್ತಲೆಂ. ಅಶೆಂ ಸೋದ್ - 4‌ ರಾಣಿ ಕೊಗುಳ್‌ ವಿಜೇತ್ ಜ್ಯಾಕ್ಲಿನ್‌ ಫೆರ್ನಾಂಡಿಸ್‌ ಹಿಣೆಂ ಸಾಂಗ್ಲೆಂ. ತಿ 18.08.24 ವೆರ್‌ ಕಲಾಂಗಣಾಂತ್ ಚಲ್ಲಲ್ಯಾ ಸುರ್‌ ಸೊಭಾಣ್‌ ಭುರ್ಗ್ಯಾಂಚಿ ಗಾಯಾನ್‌ ತರ್ಭೆತಿ ಉಗ್ತಾವ್ನ್‌ ಉಲಯ್ತಾಲಿ. ‌

ಉಗ್ತಾವ್ಣಿ ವಿಶಿಶ್ಟ್‌ ರಿತಿನ್‌ ಚಲ್ಲಿ. ತರ್ಭೆತೆಂತ್ಲ್ಯಾ ಎಲ್ಡನ್‌ ಪಿರೇರಾ, ಲೆನ್ವಿನ್‌ ಪಿರೇರಾ, ಪ್ರೇರಣ್‌ ಕ್ರಾಸ್ತಾ, ಸಿಮೊನಾ ಸಲ್ಡಾನ್ಹಾ, ಸಂಜನಾ ಮತಾಯಸ್‌, ಆನ್ವಿಯಾ ಲೋಬೊ, ಆಲ್ವಿನಾ ಮೊಂತೇರೊ ಹ್ಯಾ ಸಾತ್‌ ಭುರ್ಗ್ಯಾಂನಿ ಸಾಥ್ ದಿಲೊ. ವೆದಿರ್‌ ಸಜಯಿಲ್ಲ್ಯಾ ಡ್ರಮ್ಮಾ ಥಾವ್ನ್‌ ಸಂಗೀತಾಚೆ ಸುರಾ ಘುರ್ತ್‌ ಕಾಡುನ್‌ ತಿಣೆಂ ಭುರ್ಗ್ಯಾಂಕ್‌ ದಿಲೆ ಆನಿ ಸಾಟ್‌ ವೊರಾಂಚ್ಯಾ ಶಿಕ್ಪಾ ಸಂಬಂಧಿ ಸರ್ವ್‌ ಮಾಹೆತ್‌ ಆಟಾಪ್ಚೊ ಪುಸ್ತಕ್‌ ಲೊಕಾರ್ಪಣ್‌ ಕೆಲೊ ಆನಿ ತರ್ಭೆತ್‌ ದಾರ್ ಶಿಲ್ಪಾ ಕುಟಿನ್ಹಾ ಹಿಕಾ ಹಾತಾಂತರ್‌ ಕೆಲೊ.

ತರ್ಭೆತಿಕ್‌ ಬರೆಂ ಮಾಗ್ಲಲ್ಯಾ ಮಾಂಡ್‌ ಸೊಭಾಣ್‌ ಗುರ್ಕಾರ್‌ ಎರಿಕ್‌ ಒಝೇರಿಯೊನ್‌ ʼʼತುಮಿ ಯೆಂವ್ಚೆಂ, ಗಾಂವ್ಚೆಂ ವೆಚೆಂ ನ್ಹಯ್‌, ಹ್ಯಾ ವಿಭಾಗಾಂತ್‌ ಉಂಚ್ಲೆ ಜಾಯ್ಜೆ ಸಾಂಗುನ್‌ ದಿಲ್ಲೆಂ ಬರೆಂ ಕರ್ನ್‌ ರಿಯಾಝ್‌ ಕರಿಜೆ. ಫಕತ್‌ ಸ್ಫರ್ಧ್ಯಾಂ ಖಾತಿರ್‌ ಮಾತ್ರ್‌ ಶಿಕನಾಕಾತ್.‌ ಉಂಚಾಯ್‌ ಜೊಡಾ, ಆಮ್ಚ್ಯಾ ಭಾಶೆಚೊ ಅಭಿಮಾನ್‌ ಜಾಯಾʼʼ ಮ್ಹಣ್‌ ಬರೆಂ ಮಾಗ್ಲೆಂ.

ಮಾಂಡ್‌ ಸೊಭಾಣ್‌ ಅಧ್ಯಕ್ಷ್‌ ಲುವಿ ಜೆ ಪಿಂಟೊ, ಸಹ ತರ್ಬೆತ್‌ ದಾರ್‌ ಡಿಯಲ್ ಡಿಸೋಜ ಹಾಜರ್‌ ಆಸ್ಲಲಿಂ. ಸುಮೇಳ್‌ ಸಮನ್ವಯಿ ರೈನಾ ಸಿಕ್ವೇರಾ ಹಿಣೆಂ ಯೆವ್ಕಾರ್‌ ಮಾಗ್ಲೊ. ಸುಮೇಳ್‌ ಸಾಂದೊ ಪ್ರೀಮಾ ಫೆರಾವೊ ಹಿಣೆಂ ಕಾರ್ಯೆಂ ಚಲಯ್ಲೆ.‌

ಮಾಂಡಾವಳಿವಿಶಿಂ ವಿಕ್ಟರ್‌ ಮತಾಯಸಾನ್‌ ಮಾಹೆತ್‌ ದಿಲಿ. ಅರುಣ್‌ ರಾಜ್‌ ರೊಡ್ರಿಗಸಾನ್‌ ಖೆಳ್‌ ಖೆಳಯ್ಲೆ. ಉಪ್ರಾಂತ್‌ ಪಯ್ಲ್ಯಾ ದಿಸಾಚಿ ತರ್ಭೆತಿ ಸುರ್ವಾತ್ಲಿ.