Associations' / Institutions' News

Media Release

Mangaluru, Aug 7, 2024 : Mandd Sobhann Organization has been contributing immeasurably to Konkani Theatre through its Monthly Theatre Series. The 272nd edition of this was held on August 4th at Shakthinagar's Kalaangann, during which a Tiatr titled 'Tum Naslo Tor' was performed by a renowned Tiatr troupe from Goa.

ಆಟಿಚ್ಯಾ ಪಾವ್ಸಾ ಲ್ಹಾರಾಂಕ್ ಧಾಂವ್ಡಾಯಿಲ್ಲಿಂ ತಿಯಾತ್ರಾಂತ್ಲಿಂ ಹಾಶ್ಯಾ ಲ್ಹಾರಾಂ

4.8.24, ಆಟಿಚಿ ಆಮಾಸ್, ಇಶ್ಟಾಗಾತೆಚೊ ದೀಸ್ ಆನಿ ಕಲಾಂಗಣಾಂತ್ ಮ್ಹಯ್ನ್ಯಾಳಿ ಮಾಂಚಿ ಶಿಂಕ್ಳೆಚ್ಯಾ 272ವ್ಯಾ ಕಾರ್ಯಾಂತ್ ಹಾಶ್ಯಾಂಚೊ ಪಾವ್ಸ್. ಒಪೆರಾ ಸಂಗೀತ್ ಆನಿ ನಾಟಕಾಂಚ್ಯಾ ಮಿಸ್ಳೊವ್ಣೆಂತ್ ಉದೆಲ್ಲ್ಯಾ 132 ವರ್ಸಾಂ ಪ್ರಾಯ್ ಭರ್ಲಲ್ಯಾ ತಿಯಾತ್ರ್ ಪ್ರಕಾರಾಕ್ ಗೊಂಯಾಂತ್ ಖಾಯ್ಸ್ ಚಡ್. ಮಂಗ್ಳುರ್ಗಾರಾಂಕ್ ಆಪ್ರೂಪಾನ್ ತಾಚಿ ರೂಚ್ ಚಾಕುಂಕ್ ಮೆಳ್ಚೊ ಏಕ್ ಜಾಗೊ ಕಲಾಂಗಣ್. ಕಲಾ ಅಕಾಡೆಮಿಚ್ಯಾ ಸ್ಪರ್ಧ್ಯಾಂತ್ ಇನಾಮಾಂ ಜೊಡ್ಲಲೊ ʻತುಂ ನಾಸ್ಲೊ ತರ್ʼ ತಿಯಾತ್ರ್ ಕಲಾಂಗಣಾಂತ್ ಜಮ್ಲಲ್ಯಾ ಲೊಕಾಕ್ ಲಗ್ಬಗ್ ತೀನ್ ವೊರಾಂ ಹಾಶ್ಯಾಂ ಲ್ಹಾರಾಂನಿ ಧಲಯ್ಲಾಗ್ಲೊ.

ಸುರ್ವೆರ್ ಅರುಣ್ ರಾಜ್ ರೊಡ್ರಿಗಸಾನ್ ಕಳೊವ್ಣ್ಯೊ ದೀವ್ನ್ ಕಾರ್ಯಾಚಿ ಸುರ್ವಾತ್ ಕೆಲಿ. ಕೊಂಕಣಿ ಟಿವಿ ಕೆನಡಾ ಹಾಣಿ ಎರಿಕ್ ಒಝೇರಿಯೊಚ್ಯಾ ಜಲ್ಮಾ ಅಮೃತೋತ್ಸವಾ ಬಾಬ್ತಿನ್ ಧಾಡ್ನ್ ದಿಲ್ಲೆಂ ಪಿಂತುರ್ ಜೊಯ್ಸ್ ಒಝೇರಿಯೊನ್ ಅನಾವರಣ್ ಕರ್ತಚ್, ತಾಂಚೊ ಪ್ರತಿನಿಧಿ ಡೆನಿಸ್ ಮೊಂತೇರೊನ್ ಹಾತಾಂತರ್ ಕೆಲೆಂ. ಉಪ್ರಾಂತ್ ನಾಟಕಾಚೊ ಬರಯ್ಣಾರ್ ಫಾ. ಮಿಲ್ಟನ್ ರೊಡ್ರಿಗಸ್ ಹಾಣೆಂ ಘಾಂಟ್ ಮಾರುನ್ ಕಾರ್ಯಾಕ್ ಚಲಾವಣ್ ದಿಲೆಂ. ವೆದಿರ್ ಮಾಂಡ್ ಸೊಭಾಣ್ ಹುದ್ದೆದಾರ್ ಲುವಿ ಪಿಂಟೊ, ಸ್ಟ್ಯಾನಿ ಆಲ್ವಾರಿಸ್ ಆನಿ ಕಿಶೋರ್ ಫೆರ್ನಾಂಡಿಸ್ ಹಾಜರ್ ಆಸುಲ್ಲೆ.

ಗೋವನ್ ಡೊಟ್ ಕೊಮ್ ಹಾಚೊ ಸ್ಥಾಪಕ್ ಪತ್ರ್ ಕಾರ್ ಕೊಂಕ್ಣಿ ಮುಖೆಲಿ ಜೊಯ್ ಫೆರ್ನಾಂಡಿಸ್ ಹಾಚ್ಯಾ ಅಮರ್ ಉಗ್ಡಾಸಾಕ್ ಹೊ ತಿಯಾತ್ರ್ ಸಾದರ್ ಕೆಲೊ.

ಶಾಂತಾರಾಮ್ ಪವಾರ್ ನಿರ್ದೇಶನಾಚ್ಯಾ ಹ್ಯಾ ತಿಯಾತ್ರಾಂತ್ ಆಲಿಸ್ಟರ್, ಆಂಡ್ರಿಯಾ, ಆಶ್ಲಿನ್, ಆಡ್ರಿ, ಆವ್ಯಾನಾ, ಕ್ಯಾಜಿಟನ್, ಶಾಲೆಟ್, ಡೊಯ್ವಿನಾ, ಫಾ. ಮಿಲ್ಟನ್, ಫ್ರೆಬ್ರೆನ್, ಜೆ. ಎದುವಾರ್ದೊ, ಜೊಸ್ಟರ್, ಲೂಯಿಸ್, ಮರಿಶಿಯಾ, ಮಾರಿಯೊ, ಮಾರ್ಥಾ, ಮ್ಯಾಥ್ಯೂ, ನಥಾನ್, ರೆಜಿನಾ, ರೊಯ್, ಸಾವಿಯೊ, ಶ್ಯಾನಿಸ್, ಸೈಮನ್, ಸಿಮ್ರನ್, ಕ್ಷೇವಿಯರ್ ಅಶೆಂ 25 ಜಣಾಂಚ್ಯಾ ಪಂಗ್ಡಾನ್ ನಟನ್ ಕರುನ್, ಸಂಗೀತ್ ದಿವುನ್, ಪದಾಂ ಗಾವುನ್ ಲೊಕಾಮನಾಂ ಸಂತೊಸಾಯ್ಲಿಂ.