Presentation of Jesus in the Temple. (Photo : Wikimedia Commons)
ಆಜ್ ಫೆಬ್ರೆರ್ 02, ಜೆಜುಕ್ ದೆವಾಳಾಂತ್ ಸಮರ್ಪಿಲ್ಲ್ಯಾ ದಿಸಾಚೆಂ ಸ್ಮರಣ್ ಕರ್ಚ್ಯಾ ಸುವಾಳ್ಯಾರ್ ಪವಿತ್ರ್ ಸಭಾ `ಸಮರ್ಪಿತ್ ಜಿಣ್ಯೆಚೊ ದೀಸ್’ ಸಂಭ್ರಮ್ತಾ. ಖರೆಪಣಿ ದೆವಾಚೊ ಹರೆಕ್ ಭುರ್ಗೊ/ಭುರ್ಗೆಂ ಜಾಂವ್ ಮಣಿಯಾರಿ, ಕಾಜಾರಿ, ಆಂಕ್ವಾರ್ ವಾ ಧಾರ್ಮಿಕ್ ದೆವಾಕ್ ‘ಸಮರ್ಪಿತ್’; ಕಾಜಾರಿ ಕುಟ್ಮಾ ಜಿವಿತಾದ್ವಾರಿಂ ದೆವಾಕ್ ಸಮರ್ಪಿತ್ ತರ್ ಆಂಕ್ವಾರ್ ಆಪ್ಲೆ ಜಿಣ್ಯೆ ಶೆವಟಾಖಾತಿರ್ ದೆವಾಕ್ ಸಮರ್ಪಿತ್. ಯಾಜಕ್ ಆಪ್ಲೆ ಸೆವೆ ವಾವ್ರಾದ್ವಾರಿಂ ದೆವಾಕ್ ಸಮರ್ಪಿತ್ ತರ್ ಧಾರ್ಮಿಕ್ ದಾದ್ಲೊ ವಾ ಸ್ತ್ರೀ ಹೆರ್ ಖಂಚೆಯ್ ವಿಂಚವ್ಣೆ ಬದ್ಲಾಕ್ ದೆವಾಚಿಚ್ಚ್ ವಿಂಚವ್ಣ್ ಕರ್ನ್ ಎಕೆ ಖೆರಿತ್ ರಿತಿನ್ ದೆವಾಕ್ ಸಮರ್ಪಿತ್. ದೆವಾಕ್ ಸಮರ್ಪಿತ್ ಜಾಂವ್ಕ್ ಕೊಣಾಕೀ ಕಸಲಿಯ್ ಅಡ್ಕಳ್ ನಾ!
ಪುಣ್, ಸಾಮಾನ್ಯ್ ಸಮ್ಜಣೆ ಪರ್ಮಾಣೆ, ಜಿಂ ಕೊಣ್ ಧಾರ್ಮಿಕ್ ಜಿಣ್ಯೆದ್ವಾರಿಂ ಆಪ್ಣಾಚೆಂ ಸಮರ್ಪಣ್ ಕರ್ತಾತ್, ತಾಂಚೊ ದೀಸ್ ಹೊ ದೀಸ್ ಮ್ಹಣ್ ಮಾನ್ತಾತ್. ದೆವಾಚಿ ಮಾತ್ರ್ ವಿಂಚವ್ಣ್ ಕರ್ಚೆ ಪ್ರಕ್ರಿಯೆಚೊ ಏಕ್ ಅವಿಭಾಜ್ಯ್ ವಾಂಟೊ - ಹೆರ್ ಸರ್ವ್ ವಿಂಚವ್ಣೊ ಆನಿ ಸಾಧ್ಯತಾ ಬಗ್ಲೆಕ್ ಲೊಟ್ಚ್ಯೊ. ಹೆಂ ಸುವಾರ್ತೆಂತ್ ಅಪೊಸ್ತಲ್ ಪೆದ್ರುಚ್ಯಾ ಉತ್ರಾಂನಿ ಅಶೆಂ: “ಆಮಿ ಸಕ್ಕಡ್ ಸಾಂಡುನ್ ತುಜೊ ಪಾಟ್ಲಾವ್ ಕೆಲಾ, ಆಮ್ಕಾಂ ತರ್ ಕಿತೆಂ ಮೆಳ್ತಲೆಂ?” `ಕಿತೆಂ ಮೆಳ್ತಲೆಂ?’ ಮ್ಹಳ್ಳೆಂ ದೆವಾಚ್ಯೆ ಖುಶೆಕ್ ಆನಿ ಮರ್ಜೆಕ್ ಸಂಬಂಧಿತ್ ತರ್ ‘ಕಿತೆಂ ಸಾಂಡ್ಲಾಂ?’ ಮ್ಹಳ್ಳೆಂ ಮನ್ಶ್ಯಾಚಿ ಜವಾಬ್ದಾರಿ.
ಸಾಂಡ್‍ಲ್ಲೆಂ ಜಾಯ್ತೆಂ ಆಸುಂಕ್ ಪುರೊ – ಆವಯ್-ಬಾಪಯ್, ಕುಟಮ್, ಲಗ್ನ್, ಲೈಂಗಿಕ್ ಸುಖ್, ಕುಟ್ಮಾ-ಜಿವಿತ್, ಭುರ್ಗಿಂ-ಬಾಳಾಂ, ಆಸ್ತ್-ಪಾಸ್ತ್, ನಾಂವ್, ಅಧಿಕಾರ್, ಹುದ್ದೊ... ಹೆ ಪಟ್ಟೆಂತ್ ಆನಿಕ್‍ಯಿ ಜಾಯ್ತೆಂ ಮೆಳವ್ಯೆತ್. ಹಾಂತ್ಲೆಂ ಖಂಚೆಂಯ್ ಏಕ್ ಸಾಂಡ್ಚೆಂಚ್ ಕಷ್ಟಾಂಚೆಂ ಆಸ್ತಾಂ, ಸರ್ವ್ ಸಾಂಡ್‍ಲ್ಲಿಂ ಖರೆಪಣಿ ಶಾಭಾಸ್ಕೆಕ್ ಫಾವೊ. ‘ಕಿತೆಂ ಮೆಳ್ತಲೆಂ?’ ಮ್ಹಳ್ಳ್ಯಾ ಸವಾಲಾಚ್ಯೆ ಜಾಪಿಂತ್ ‘ಸಾಂಡ್‍ಲ್ಲ್ಯಾವಿಶಿಂ’ ಖಂಡಿತ್ ಉಲ್ಲೇಖ್ ಆಸ್ತಲೊ ಮ್ಹಳ್ಳೆಂ ದುಭಾವಾವಿಣೆ ಪಾತ್ಯೆವ್ಯೆತ್.
ಪುಣ್ ಹ್ಯಾ ಸವಾಲಾಚಿ ಜಾಪ್ ತಿತ್ಲಿ ಸೊಂಪಿ ನಾ; ಏಕ್ ‘ಕೇವಿಯಟ್’ ಆಸಾ. ಹಾಂಗಾಸರ್ ‘ಸಮರ್ಪಿತ್ ಜಾಲ್ಲ್ಯಾ’ ಸರ್ವಾಂನಿ ಆಪ್ಣಾಚೆರ್‍ಚ್ಚ್ ಏಕ್ ಧಾಕ್ಟುಲಿ ಚಟುವಟಿಕಾ ಚಲಂವ್ಚಿ ಗರ್ಜ್ ಆಸಾ. ಪೇಪರ್ ಆನಿ ಪೆನ್ನ್ ಘೆವ್ನ್, ಪೇಪರಾಚೆರ್ ದೋನ್ ಕೊಲಮ್ ಕರ್ನ್ ಎಕೆ ಕುಶಿನ್ ‘ಸಾಂಡ್‍ಲ್ಲೆಂ’ ತಕ್ಲೆನಾಂವಾ ಸಕಯ್ಲ್ ಸಾಂಡ್‍ಲ್ಲ್ಯಾ ಸರ್ವಾಚಿ ಏಕ್ ಪಟ್ಟಿ ಕರ್ಚಿ. ಹಿ ಬೋವ್ ಲಾಂಬ್ ಆಸ್ಯೆತ್. ಆತಾಂ, ದುಸ್ರ್ಯಾ ಕೊಲಮಾಕ್ ‘ಸಾಂಡ್‍ಲ್ಲೆಂ ಪಾಟಿಂ ಆಯ್ಲಾಂ’ ತಕ್ಲೆನಾಂವಾ ಸಕಯ್ಲ್, ‘ಸಮರ್ಪಿತ್’ ಜಾಲ್ಯಾ ಉಪ್ರಾಂತ್ ‘ಸಾಂಡ್‍ಲ್ಲ್ಯಾಂತ್ಲೆಂ ಕಿತೆಂ ಸರ್ವ್ ಪಾಟಿಂ ಆಯ್ಲಾಂ’ ಆನಿ `ಕಿತ್ಲ್ಯಾ ಮಾಪಾನ್ ಪಾಟಿಂ ಮೆಳ್ಳಾಂ’ ಮ್ಹಳ್ಳಿ ಪಟ್ಟಿ ಪ್ರಾಮಾಣಿಕ್‍ಪಣಾನ್ ಕರ್ಚಿ. ಹಾಚ್ಯೆಸಂಗಿಂ, `ಸಾಂಡ್ತಾನಾ’ ನಾತ್‍ಲ್ಲ್ಯೊ ಕಿತ್ಲ್ಯೊ ಸಂಗ್ತಿ ಆತಾಂ ಆಸಾತ್ ಮ್ಹಳ್ಳೆಂಯ್ ಪಟ್ಟಿ ಕರ್ಚಿ.
ಆತಾಂ ಫಲಿತಾಂಶಾಚೆಂ ವಿಶ್ಲೇಷಣ್ ಕರ್ಚೆಂ. ಸಾಂಡ್‍ಲ್ಲೆಂ ಕಿತೆಂಯ್ ಪಾಟಿಂ ಯೆಂವ್ಕ್ ನಾ? ಸಾಂಡ್‍ಲ್ಲ್ಯಾಂತ್ಲೆಂ ಥೊಡೆಂ ಪಾಟಿಂ ಆಯ್ಲಾಂ? ಸಾಂಡ್‍ಲ್ಲೆಂ ಚಡಾವತ್ ಪಾಟಿಂ ಆಯ್ಲಾಂ? ಸಾಂಡ್‍ಲ್ಲ್ಯಾಚ್ಯಾಕೀ ದೋನ್/ಚಾರ್/ಆಟ್ ವಾಂಟೆ ಪಾಟಿಂ ಆಯ್ಲಾಂ? ಹಾಂತ್ಲಿ ಹರೆಕ್ ಸಾಧ್ಯತಾ ಆಮ್ಚ್ಯಾ ‘ಸಮರ್ಪಿತ್‍ಪಣಾಕ್’ ಬೋವ್ ನಿತಳ್ ಆರ್ಸೊ ಧರ್ತಾ. ಸಮರ್ಪಿತ್ ಜಿವಿತ್ ಮ್ಹಳ್ಯಾರ್ ಇತ್ಲೆಂಚ್ ನ್ಹಯ್, ಸಾರ್ಕೆಂ. ಪುಣ್ ಹೆ ಚಟುವಟಿಕೆಂತ್ ಫಲಿತಾಂಶ್ ನಿರಾಶಾದಾಯಕ್ ಜಾಲ್ಯಾರ್, ಸಗ್ಳ್ಯಾ ಸಮರ್ಪಿತ್ ಜಿವಿತಾಚೆಂ ಫಲಿತಾಂಶ್ ಖಂಡಿತ್ ನಿರಾಶಾದಾಯೆಕ್‍ಚ್ಚ್ ಆಸ್ತಾ.
ಕಿತ್ಲೊ ಸ್ವಾಧಿಕ್ ನ್ಹಯ್ ಜೆಜುಚ್ಯಾ ಸಮರ್ಪಣಾಚೊ ಹೊ ದೀಸ್: ‘ಸಮರ್ಪಿತ್ ಜಾಲ್ಲ್ಯಾ ಆಮ್ಕಾಂ ಆರ್ಸೊ ದಾಕಂವ್ಚೊ’!
- ಬಾ | ಚೇತನ್ ಲೋಬೊ, ಕಾಪುಚಿನ್
.png)
.png)
.png)