Articles / Special

ಸಾಂತ್ ಫ್ರಾನ್ಸಿಸ್ ಸಾವೆರ್

ಯಾದ್ : ದಶೆಂಬ್ರ್ 3

Statue of Staint Francis Xavier (Photo : Wikimedia Commons)

ಆತಾಂ ಇಸ್ಪಾನಿಯಾಂತ್ (ಸ್ಪೇಯ್ನ್) ಆಸ್ಚ್ಯಾ ನವಾರ್ರೆ ಸಂಸ್ಥಾನಾಚೊ ಬಾಸ್ಕ್ ಕಥೊಲಿಕ್ ಫ್ರಾನ್ಸಿಸ್ಕೊ ದೆ ಜಾಸ್ಸೊ ಎ ಅಲ್ಪಿಲಿಕ್ವೆತಾ 7-4-1506 ವೆರ್ ಜವಿಯೆರ್ ರಾವ್ಳೆರಾಂತ್ ಜನ್ಮಾಲೊ. ತಾಚೊ ಬಾಪುಯ್ ಯುವಾನ್ ದೆ ಜಾಸ್ಸೊ ಆನಿ ಆವಯ್ ದೊನಾ ಮರಿಯಾ ದೆ ಅಲ್ಪಿಲಿಕ್ವೆತಾ ತಾಂಚೆಂ ಘರಾಣೆ ಮ್ಹಂತನಾಚೆಂ ಜಾವ್ನಾಸ್ಲಲೆಂ. 1512 ಇಸ್ವೆಂತ್ ನವಾರ್ರೆಚೆರ್ ಹೆರ್ ಘರಾಣ್ಯಾಂಚ್ಯಾ (ಅರಗಾಂವ್ ಆನಿ ಕಾಸ್ತಯ್ಲ್) ಫವ್ಜಿಂನಿ ದಾಡ್ ಘಾಲಿ ಆನಿ ನವಾರ್ರೆ ಸಂಸ್ಥಾನ್ ಸಲ್ವಾಲೆಂ ಮಾತ್ರ್ ನ್ಹಂಯ್ ಫ್ರಾನ್ಸಿಸ್ಕೊಚೊ ಬಾಪಯ್ ಸಲ್ವಣೆಚ್ಯಾ ಅಕ್ಮಾನಾಂತ್ ತೀನ್ ವರ್ಸಾಂನಿ ಅಂತರ್ಲೊ. ಭುರ್ಗಿಂ ಆವಯ್ಚ್ಯಾ ಮಾಂತಾಖಾಲ್ ಎಕ್ದಮ್ ಕಷ್ಟಂನಿ ವಾಡ್ಲಿಂ.

ಸಭಾರ್ ಝುಜಾಂಚ್ಯಾ ಅಂಧ್ಕಾರಿ ಮೊಡಾಂತ್ ಲಿಪುನ್ ಗೆಲ್ಲ್ಯಾ ಜಿವಿತಾಂತ್ ನಿರಾಶಿ ಜಾವ್ನ್ ಫ್ರಾನ್ಸಿಸ್ಕೊ 1525 ಇಸ್ವೆಂತ್ ಫ್ರಾನ್ಸಾಚ್ಯಾ ಪ್ಯಾರಿಸ್ ವಿಶ್ವವಿದ್ಯಾಲಯಾಚ್ಯಾ ಸಾಂತಾ ಬಾರ್ಬರಾ ಕೊಲೆಜಿಕ್ ಉಂಚ್ಲ್ಯಾ ಶಿಕ್ಪಾಕ್ ಮ್ಹಣುನ್ ವೆತಾ. ಎಕಾ ಉಂಚ್ಲ್ಯಾ ಕಾಲೆತಿಚೊ ವಿದ್ಯಾರ್ತಿ ಜಾವ್ನ್, ನಾಮ್ಣೆಚೊ ಖೆಳ್ಗಾಡಿ ಜಾವ್ನ್ ತೊ ಬರೆಂ ನಾಂವ್ ಕರ್ತಾ. ಸರ್ವ್ ತಾಚೆ ಪ್ರಾಧ್ಯಾಪಕ್ ಫ್ರಾನ್ಸಿಸ್ಕೊ ಉಂಚ್ಲ್ಯಾ ವರ್ಗಾಚೊ ಪಂಡಿತ್ ಪ್ರಾಧ್ಯಾಪಕ್ ಜಾತಲೊ ಮ್ಹಣುನ್ ಸಪ್ಣಾ ಪಳೆತಾತ್.

ಹ್ಯಾ ಮಧೆಂ ತಾಚೊ ಕುಡಾಸಾಂಗಾತಿ (ರೂಮ್‍ಮೇಟ್) ಪಿಯರ್ರೆ ಫಾವ್ರೆಕ್ (ಪೆದ್ರು ಫೆವರ್) ತ್ಯಾ ಕೊಲೆಜಿಕ್ ನವ್ಯಾನ್ ಭರ್ತಿ ಜಾಲ್ಲ್ಯಾ ಲಂಗ್ಡ್ಯಾ ತರ್ನಾಟ್ಯಾ ಇನಾಸಾಚಿ ಸಳಾವಳ್ ಜಾತಾ. (ಹೊ ಇನಾಸ್ ದೆವಾಚ್ಯಾ ವಿಚಿತ್ರ್ ಮಹಿಮೆಚ್ಯಾ ಯೋಜನಾಖಾಲ್ ಝುಜಾಂತ್ ಲಂಗ್ಡೊ ಜಾಲ್ಲೊ ತರ್ನಾಟೊ ಶಾಥಿವಂತ್ ಫವ್ಜೆ ಅಧಿಕಾರಿ ಮುಕಾರ್ ಜೆಜುಚಿ ಸಭಾ ಘಡ್‍ಲ್ಲೊ ಇನಾಸ್ ಲೊಯೊಲಾ) ಇನಾಸಾಚ್ಯಾ ಪ್ರೇರಣಾಂನಿ ಪೆದ್ರು ಫೆವರ್ ಎದೊಳ್‍ಚ್ ಏಕ್ ಯಾಜಕ್ ಜಾಂವ್ಕ್ ಕಬೂಲ್ ಜಾಲ್ಲೊ ಆನಿ ತ್ಯಾ ದೊಗಾಂನಿ ಫ್ರಾನ್ಸಿಸಾಚೆಂ ಮನ್ ವ್ಹಯ್ ಕರುಂಕ್ ಸುರು ಕೆಲ್ಲೆಂ. ಪೂಣ್ ಫ್ರಾನ್ಸಿಸಾಕ್ ಹ್ಯಾ ದೊಗಾಂಯ್ಚ್ಯಾ ವರ್ತನಾನ್ ಕಾಂಟಾಳೊ ಯೆತಾಲೊ. ಥೊಡ್ಯಾ ತೆಂಪಾ ಉಪ್ರಾಂತ್ ತಾಂಚ್ಯಾ ಕುಡಾಂತ್ ಇನಾಸ್ ಆನಿ ಫ್ರಾನ್ಸಿಸ್ ದೊಗ್‍ಚ್ ಉರ್ತಾಲೆ ತವಳ್ ಇನಾಸಾಚೆಂ ತೆಂ ಸವಾಲ್ ‘ಫ್ರಾನ್ಸಿಸಾ ಸಗ್ಳೊ ಸಂಸಾರ್ ಜಿಕುನ್, ಖುದ್ಧ್ ಆಪ್ಣಾಚೊ ಅತ್ಮೊ ಹೊಗ್ಡಾಯ್ಲ್ಯಾರ್ ಮನ್ಶಾಕ್ ತರಿ ಕಿತೆಂ ಫಾಯ್ದೊ?’ ಫ್ರಾನ್ಸಿಸಾಕ್ ಮೊವಾಳ್ ಕರುಂಕ್ ಲಾಗ್ಲೆಂ. 1530 ಇಸ್ವೆಂತ್ ಫ್ರಾನ್ಸಿಸಾಕ್ ಸ್ನಾತಕೋತ್ತರ್ ಪದ್ವಿ ಲಾಭ್ಲಿ ಆನಿ ಉಪ್ರಾಂತ್ ತೊ ತತ್ವ್‍ಶಾಸ್ತಿರ್ ಶಿಕಂವ್ಕ್ ಲಾಗ್ಲೊ.

ಇನಾಸಾಚ್ಯಾ ನಿರಂತರ್ ಪ್ರೇರೇಪಣಾಕ್ ಲಾಗುನ್ ಫ್ರಾನ್ಸಿಸ್ ಆನಿ ತಾಚೆ ಹೆರ್ ಸಾಂಗಾತಿ ಎಕಾ ನಿರ್ದಿಷ್ಟ್ ವೆವಸ್ತ್ಯಾಖಾಲ್ ಜಿಯೆಂವ್ಕ್ ತಯಾರ್ ಜಾಲೆ. ಅಶೆಂ 1534 ಅಗೋಸ್ತ್ 15 ವೆರ್ ಇನಾಸ್ ಲೊಯೊಲಾ, ಫ್ರಾನ್ಸಿಸ್ ಜವಿಯೆರ್ (ಸಾವೆರ್), ದಿಯೆಗ್ ಲಯ್ನೇಜ್, ಅಲ್ಪೊನ್ಸೊ ಸಲ್ಮೆರೊನ್, ನಿಕೊಲಸ್ ಬಬಡಿಲ್ಲ (ಹೆ ಸರ್ವ್ ಸ್ಪೇಯ್ನಾಚೆ) ಸಿಮಾಂವ್ ಲುದ್ರಿಗೆಝ್ (ಪುಡ್ತುಗಲಾಚೊ) ಆನಿ ಪೆದ್ರು ಫೆವರ್ (ಫೆಬರ್- ಇಟಲಿಂತ್ಲ್ಯಾ ಸವಾಯ್‍ಚೊ) ಒಟ್ಟುಕ್ ಸಾತ್ ಯುವಕ್ ಸಾಂತ್ ದೆನಿಸಾಚ್ಯಾ ದೇವ್‍ತೆಂಪ್ಲಾಂತ್ ಸಂಗಿಂ ಮೆಳ್ಳೆ ಆನಿ ತಾಣಿ ‘ದುಬ್ಳಿಕಾಯೆಚಿ, ವಿದೇಯ್ಪಣಾಚಿ ಆನಿ ನಿಸ್ಕಳ್ಪಣಾಚಿ ಜೀಣ್ ಜಿಯೆತಾಂವ್’ ಮ್ಹಣುನ್ ಪರ್ಮಾಣ್ ಘೆತ್ಲೆಂ. ಮುಳಾವ್ಯಾನ್ ಭಾಗೆವಂತ್ ಜಾಗ್ಯಾಂಕ್ ವಚುನ್ ಥಂಯ್ಸರ್ ಅಕ್ರಿಸ್ತಾಂವಾಂಕ್ ಕನ್ವಡ್ತರ್ ಕರ್ನ್ ತೆ ಭಾಗೆವಂತ್ ಜಾಗೆ ಪಾಪಾಚ್ಯಾ ನಿಯಂತ್ರಣಾಕ್ ಪಾಟಿಂ ಹಾಡ್ಚೊ ತಾಂಚೊ ಶೆವಟ್ ಜಾವ್ನ್ ಘೆತ್ಲೊ. ಹಿಚ್ ಭಾಸಾವ್ಣಿ ಮುಕಾರ್ ಜೆಜುಚ್ಯಾ ಸಭೆಚ್ಯಾ (ಜೆಜ್ವಿತ್) ಸಂಸ್ಥಾಪನಾಕ್ ವಾಟ್ ಜಾಲಿ.

ಸುಮಾರ್ 1540 ಂಚ್ಯಾ ವೆಳಾರ್ ಆಪ್ಲ್ಯಾ ಇಂಡಿಯಾಂತ್ಲ್ಯಾ ಆನಿ ಹೆರ್ ಮುಡ್ಲಾಂತ್ಲ್ಯಾ ವಸ್ಣುಕೆಂನಿ ಪದ್ರುವಾದೊ ಖಾಲ್ ಕಥೊಲಿಕ್ ಧರ್ಮ್ ಪ್ರಚಾರ್ ಕರುಂಕ್ ಮಿಶಿಯೊನರಿಂಕ್ ದೀಂವ್ಕ್ ಪುಡ್ತುಗಲಾಚ್ಯಾ ರಾಯಾನ್ ಪಾಪಾಕ್ ಮಾಗ್‍ಲ್ಲೆ ವೆಳಾರ್ ಪಾಪಾನ್ ಇನಾಸಾಲಾಗಿಂ ಆಪ್ಲ್ಯಾ ಭಾವಾಂಕ್ ಧಾಡ್ನ್ ದೀಂವ್ಕ್ ವಿನೊವ್ಣಿ ಕೆಲಿ. ಇನಾಸಾನ್ ಖರ್ಯಾನ್ ನಿಕೊಲಸ್ ಬಬಡಿಲ್ಲ ಆನಿ ಸಿಮಾಂವ್ ಲುದ್ರಿಗೆಝಾಕ್ ಮುಡ್ಲಾಕ್ ಧಾಡುಂಕ್ ಅಲೋಚೆನ್ ಕೆಲ್ಲಿ, ಪೂಣ್ ನಿಮಾಣೆ ಘಡ್ಯೆ ಬಬಡಿಲ್ಲ ಪಿಡೆಕ್ ಪಡ್‍ಲ್ಲ್ಯಾನ್ ಫ್ರಾನ್ಸಿಸಾಕ್ ತಾಣೆ ಧಾಡಿಜೆ ಪಡ್ಲೆಂ.

ಫ್ರಾನ್ಸಿಸಾನ್ 7-4-1541 ಲಿಸ್ಬನಾ ಥಾವ್ನ್ ಆಪ್ಲೆಂ ಪಯ್ಣ್ ಸುರ್ವಾತ್ಲೆಂ. ತೊ ತಾಚೊ ಪಾಂತ್ತಿಸಾವೊ ಜನ್ಮಾದೀಸ್‍ಯಿ ಜಾವ್ನಾಸ್ಲಲೊ. ಪಾಪಾನ್ ತಾಕಾ ಪಯ್ಣ್ ಸುರ್ವಾತ್ತಾನಾಂಚ್ ಮುಡ್ಲಾಚೊ ಅಪೊಸ್ತಲಿಕ್ ವಿಗಾರ್‍ಯಿ ನೆಮ್ಲೊ. ಪಯ್ಲೆಂ ತಾಣೆ ಮೊಜಾಂಬಿಕಾಚಿ ಭೆಟ್ ಕರ್ನ್ ಥಂಯ್ಸರ್ ಥೊಡಿ ಸೆವಾ ಕೆಲಿ ಆನಿ ಉಪ್ರಾಂತ್ 6-5-1542 ವೆರ್ ತವಳ್ ಪುಡ್ತುಗೆಜಾಂಚೆ ಪ್ರಧಾನ್ ಶಹರ್ ಜಾವ್ನಾಸ್ಲಲ್ಯಾ ಗೊಂಯಾಂಕ್ ಪಾವ್ಲೊ. ಫ್ರಾನ್ಸಿಸ್ ಸಾವೆರಾನ್ ಗೊಂಯಾಂತ್ ಎದೊಳ್‍ಚ್ ಯೇವ್ನ್ ರಾವುಲ್ಲ್ಯಾ ಪುಡ್ತುಗೆಜಾಂನಿ ತಾಂಚಿ ಜೀಣ್ ಕ್ರಿಸ್ತಾಚ್ಯಾ ಮೊಲಾಂ ಪರ್ಮಾಣೆ ಜಿಯೆಶೆಂ ವಾವ್ರ್ ಕೆಲೊ. ಸಾಂತ್ ಪಾವ್ಲುಚ್ಯಾ ಕೊಲೆಜಿ (ಮುಕಾರ್ ಸೆಮಿನರಿ) ಧ್ವಾರಿಂ ತಾಣೆ ಭಾವಾಡ್ತ್ ಪಾಸಾರುಂಕ್ ಜಾಯ್‍ತ್ಯಾ ಮ್ಹಣಿಯಾರ್ಯಾಂಚಿ ತಯಾರಿ ಕೆಲಿ.

ಗೊಂಯಾಂತ್ ಧರ್ಮ್‍ಪ್ರಸಾರಾಕ್ ವೆವಸ್ತಾ ಕರ್ನ್ ತೊ ಮುಕಾರ್ ತೆಣ್ಕಾಂತ್ ಪರವ ಲೊಕಾಂಮಧೆಂ (ಮನಾರ್-ಸಿಲೋನ್) ಧರ್ಮ್‍ಪ್ರಸಾರಾಕ್ ಗೆಲೊ ಹಾಂಗಾಸರ್ (ತೆಣ್ಕಾ ಇಂಡಿಯಾಂತ್ ಆನಿ ಸಿಲೋನಾಂತ್) ತಾಣೆ ಸುಮಾರ್ 40 ಇಗರ್ಜೊ ಬಾಂದ್ಲ್ಯೊ ಮ್ಹಣ್ತಾತ್. ತಶೆಂಸ್ ಸಾವೆರ್ ಇಂಡೋನೇಷಿಯಾಚ್ಯಾ ಸೆಲೆಬೆಸ್ ಕುದ್ರ್ಯಾರ್ ವಚುನ್ ಸುವಾರ್ತಾ ಪರ್ಗಟ್ ಕರುಂಕ್ ಲಾಗ್ಲೊ. 1545 ಇಸ್ವೆಂತ್ ಮಲಾಕ್ಕಾ ಆನಿ ಭಂವ್ತಿಂಚ್ಯಾ ಕುದ್ರ್ಯಾಂಕ್‍ಯಿ ತಾಣೆ ಭೆಟ್ ದಿಲಿ. ನಿಮಾಣೆ ತಾಣೆ ಜಪಾನಾಕ್‍ಯಿ ಭೆಟ್ ದಿಲಿ. ಸುರ್ವೆರ್ ತಾಕಾ ಜಪಾನಾಂತ್ ಕ್ರಿಸ್ತಾಂವ್ ಭಾವಾಡ್ತ್ ಪರ್ಗಟುಂಕ್ ಥಂಯ್ಚ್ಯಾ ಅಧಿಕಾರಿಂನಿ ಖುಶೆನ್ ಕಬ್ಲಾತ್ ದಿಲಿ ತರಿ ಕ್ರಮೇಣ್ ತಾಕಾ ಹ್ಯಾ ವಾವ್ರಾಂತ್ ಅಡ್ಕಳಿ ದಿಲ್ಯೊ.

1552 ಇಸ್ವೆಂತ್ ಫ್ರಾನ್ಸಿಸ್ ಪರ್ತ್ಯಾನ್ ಇಂಡಿಯಾಕ್ ಯೇವ್ನ್ ಹಾಂಗಾ ಥಾವ್ನ್ ಚೀನಾಕ್ ವೆಚೆ ಖಾತಿರ್ ಮಲಕ್ಕಾ ವಾಟೆನ್ ಭಾಯ್ರ್ ಸರ್ಲೊ. ಹ್ಯಾ ಮಧೆಂ ತಾಚಿಂ ಅಪೊಸ್ತಲಿಕ್ ವಿಗಾರಾಚ್ಯಾ ಹುದ್ದ್ಯಾಚಿಂ ಕಾಗ್ದಾಂ ಸಾಂಡುನ್ ಗೆಲ್ಲ್ಯಾನ್, ತಾಕಾ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಮಲಕ್ಕಾಚ್ಯಾ ಪುಡ್ತುಗೇಜ್ ಅಧಿಕಾರಿಂನಿ ವಾಂದ್ದೆ ದಿಲೆ. ಕಶೆಂ ತರಿ ಅಗೋಸ್ತ್ 1552 ಇಸ್ವೆಂತ್ ಫ್ರಾನ್ಸಿಸ್ ತೆನ್ಕಾ ಚೀನಾ ಥಾವ್ನ್ 15 ಕಿಲೋಮೀಟರ್ ಪಯ್ಸ್ ಆಸ್ಚ್ಯಾ ಷಾಂಗ್‍ಚ್ವಾನ್ ಕುದ್ರ್ಯಾಕ್ ಪಾವ್ಲೊಂ. ಥಂಯ್ ಥಾವ್ನ್ ಚೀನಾಕ್ ವಚುನ್ ಅತ್ಮ್ಯಾಂಕ್ ಕ್ರಿಸ್ತಾಚ್ಯಾ ಸುವಾರ್ತೆ ಥಂಯ್ ವೊಡ್ಚ್ಯಾ ವ್ಹಡ್ ಉರ್ಭೆನ್ ಭರುನ್ ಆಸ್ತಾನಾ ಪಿಡೆಕ್ ಪಡುನ್ 3-12-1552 ಇಸ್ವೆಂತ್ ತೊ ದೆವಾಚ್ಯಾ ರಾಜಾಂತ್ ರಿಗ್ಲೊ.

ಆಪ್ಲ್ಯಾ ಜಿವಿತಾ ಕಾಳಾಂತ್‍ಚ್ ತಾಣೆ ಸಭಾರ್ ಅಚರ್ಯಾಂ ಕೆಲ್ಲಿಂ ಜಾಲ್ಲ್ಯಾನ್ ತಾಚ್ಯಾ ಸಾಂಗಾತ್ಯಾಂಕ್ ತಾಚಿ ಕೂಡ್ ವೆಗ್ಗಿಂ ಕುಸುನ್ ತಾಚಿಂ ಹಾಡಾಂ ರೆಲಿಕೆ ಲೆಕಾನ್ ಪುಡ್ತುಗಲಾಕ್ ವ್ಹರುಂಕ್ ಜಾಯ್ ಆಸ್‍ಲ್ಲಿಂ ಆನಿ ತ್ಯಾ ದೆಕುನ್ ವಿಪ್ರೀತ್ ಚುನ್ಯಾಂತ್ ಬುಡೊವ್ನ್ ತಾಚಿ ಕೂಡ್ ತಾಣಿ ಷಾಂಗ್‍ಚ್ವಾನ್ ಕುದ್ರ್ಯಾರ್ ಪುರ್ಲಿ. ಉಪ್ರಾಂತ್ ತಿ ಕಿತೆಂಚ್ ಆಯ್ಬ್ ನಾಸ್ತಾನಾ ಉರ್ಲ್ಯಾ ತಿ ಪಳವ್ನ್ 1553 ಇಸ್ವೆಂತ್ ಮಲಕ್ಕಾಚ್ಯಾ ಸಾಂತ್ ಪಾವ್ಲು ತೆಂಪ್ಲಾಂತ್ ಪುರ್ಲಿ. ನಿಮಾಣೆ ಅಖ್ಖಿ ಕೂಡ್‍ಚ್ ಏಕ್ ರೆಲಿಕ್ ಮಾನುನ್ 11-12-1553 ವೆರ್ ಗೊಂಯಾಂತ್ಲ್ಯಾ ಬೊಮ್ ಜೆಜು ದೇವ್‍ತೆಂಪ್ಲಾಂತ್ ದವರಿಲ್ಯಾ. ತ್ಯಾ ಕುಡಿಚೆ ವಿವಿಧ್ ಭಾಗ್ ಕಾಡ್ನ್ ರೊಮಾಂತ್ ಆನಿ ಹೆರ್ ಭಾಗಾಂನಿ ರೆಲಿಕ್ ಜಾವ್ನ್ ದಿಲ್ಯಾತ್.

ಆಪ್ಲ್ಯಾ ಜಿವಿತಾ ಅವ್ದೆಂತ್ ಆನಿ ಉಪ್ರಾಂತ್ ಸಭಾರ್ ಅಜಾಪಾಂ ಸಾಂತ್ ಫ್ರಾನ್ಸಿಸ್ ಸಾವೆರಾ ಥಾವ್ನ್ ಜಾಲ್ಯಾಂತ್ ತಾಣೆ ಮುಡ್ಲಾ ಸಂಸಾರಾಂತ್ ಭಾವಾಡ್ತ್ ವಿಸ್ತಾರಾಂವ್ಕ್ ಕೆಲ್ಲೊ ವರ್ತೊ ವಾವ್ರ್ ಮನಾಂತ್ ಧರುನ್ 1619 ಅಕ್ತೋಬ್ರ್ 25 ವೆರ್ ಪಾಪಾ ಗ್ರೆಗರಿ ಪಂದ್ರಾವ್ಯಾನ್ ತಾಕಾ ಭಾಗೆವಂತ್ ಮಾನ್ಲೊ ಆನಿ 12-04-1622 ವೆರ್ ಸಾಂತ್ ಇನಾಸ್ ಲೊಯೊಲಾಕ್ ಆನಿ ಫ್ರಾನ್ಸಿಸಾಕ್ ಸಾಂತ್ ಪರ್ಗಟ್ಲೆಂ. ಫ್ರಾನ್ಸಿಸಾಕ್ ಕಥೊಲಿಕ್ ಮಿಸಾಂವ್ ವಾವ್ರಾಚೊ ಪಾತ್ರೊನ್ ಮ್ಹಣುನ್‍ಂಯಿ ಮಾನ್ಲೆಂ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016