Articles / Special

ಸಾಂತ್ ಕೊಲ್ಕತ್ತಾಚಿ ತೆರೆಸಾ

ಯಾದ್ : ಸಪ್ತೆಂಬ್ರ್ 5

St Teresa of Calcutta (Photo : Wikimedia Commons)

ಭಾರತಾಂತ್ಲ್ಯಾ ಕಥೊಲಿಕ್‍ಪಣಾಕ್ ನವ್ಯಾ ಜಿವಾನ್ ಭರ್ಲಲಿ ದುಬ್ಳ್ಯಾ ದಾಕ್ಟ್ಯಾಂಚಿ ಆವಯ್ ಮ್ಹಣುನ್ ನಾಂವಾಡ್ಲಲಿ ಮದರ್ ತೆರೇಸಾ ಆಮ್ಚಿ ಮ್ಹಣ್ ಆಪಂವ್ಕ್ ಆಮ್ಕಾಂ ವ್ಹಡ್ ಅಭಿಮಾನ್. ಮದರ್ ಆತಾಂಚ್ಯಾ ಮಸ್ಸೆದೋನಿಯಾಚ್ಯಾ ಸ್ಕೊಪ್ಜೆಂತ್(ಕೊಸಾವೊ ವಿಲಾಯತ್) 26-08-1910 ವೆರ್ ನಿಕೊಲ್ ಆನಿ ದ್ರನಫಿಲ್ ಬೊಜಾಷ್ಯು ಹಾಂಚ್ಯಾ ಕುಟ್ಮಾಂತ್ ಜನ್ಮಾಲಿ. ತಿಚೆಂ ಮೂಳ್ ನಾಂವ್ ಆಂಜೆಜ್ ಗೊಂಗ್ಡ್ಜೆ ಬೊಜಾಷ್ಯು (ಆಗ್ನೆಸ್ ಝೊಂಗ್ಷಾ ಬೊಂಜಾಕ್ಷು ಮ್ಹಣ್ಚೆಂಯ್ ಆಸಾ / ಹ್ಯಾ ನಾಂವಾಚೊ ಅರ್ತ್ ಆಂಜ್‍ಭಡ್ವ್ಯಾಂಚ್ಯಾ ಹಾತಾಂತ್ಲ್ಯಾ ಝಾಡಾಚಿ ತಾಳಿ ವಾ ತ್ಯಾ ಝಾಡಾಚ್ಯಾ ಫುಲಾಚೊ ಬೊಂಗ್ಗೊ ಮ್ಹಣುನ್ ಜಾತಾ.)

ತಿಚ್ಯಾ ಲ್ಹಾನ್ ಪ್ರಾಯೆರ್‍ಚ್ ತಿಚೊ ಬಾಪಯ್ ಅಂತರ್ಲೊ, ತಿ ದುಬ್ಳ್ಯಾ ಕುಟ್ಮಾಚಿ ಜಾಲ್ಲ್ಯಾನ್ ಚಡ್ ಉಂಚ್ಲೆಂ ಶಿಕಪ್ ಜೊಡುಂಕ್ ತಿಕಾ ಜಾಲೆಂ ನಾ. ಪೂಣ್ ತಿಚ್ಯಾ ಶಿಕ್ಪಾ ವೆಳಾರ್ ತಿಣೆ ವಾಚ್ಲಲ್ಯಾ ಪುಸ್ತಕಾಂನಿ ಭಾರತ್ ಆನಿ ಹೆರ್ ಉದೆಂತಿ ದೆಶಾಂತ್ಲ್ಯಾ ಮಿಸಾಂವ್ ವಾವ್ರಾವಿಶಿಂ ವಾಚುನ್ ತಿ ಆಕರ್ಶಿತ್ ಜಾಲಿ ಆನಿ ಆಪ್ಣೆಂಯ್ ಹ್ಯಾ ಗಾಂವಾಂನಿ ಶುಬ್‍ವಾರ್ತಾ ಪ್ರಾಸಾರಾಚ್ಯಾ ವಾವ್ರಾಂತ್ ದೆಂವಾಜೆ ಮ್ಹಣುನ್ ತಿಕಾ ಭೊಗುಂಕ್ ಲಾಗ್ಲೆಂ. 15-08-1928 ಇಸ್ವೆಂತ್ ವಿತಿನಾಲೆತ್ನಿಸಾಚ್ಯಾ ಕಾಳ್ಯಾ ಸಾಯ್ಭಿಣಿಚ್ಯಾ ಪೂನ್‍ಶೆತಾಕ್ ಯಾತ್ರಿಕ್ ಪಯ್ಣಾಕ್ ಗೆಲ್ಲೆ ವೆಳಿಂ ತಿಣೆ ಧರ್ಮ್‍ಮೆಳಾಂತ್ ರಿಗುನ್ ಸೊಮ್ಯಾಚೊ ಪಾಟ್ಲಾವ್ ಕರ್ಚೊ ನಿಚೆವ್ ದೃಢ್‍ಕೆಲೊ.

1928 ಇಸ್ವೆಂತ್ ಆಪ್ಲ್ಯಾ 18 ವರ್ಸಾಂ ಪ್ರಾಯೆರ್ ತಿ ಲೊರೆತ್ ಮಾಯೆಚ್ಯಾ ಧರ್ಮ್‍ಭಯ್ಣಿಂಚ್ಯಾ ಮೆಳಾಂತ್ ಭರ್ತಿ ಜಾಲಿ. ಇಂಡಿಯಾಂತ್ಲ್ಯಾ ಇಸ್ಕೊಲಾಂತ್ ಶಿಕ್ಷಕಿ ಜಾವ್ನ್ ವಾವ್ರುಂಕ್ ತಿಕಾ ವಿಂಚ್ಲೆಂ ಜಾಲ್ಲ್ಯಾನ್ ತೀ ಇಂಗ್ಲಿಶ್ ಶಿಕುಂಕ್ ಲಾಗ್ಲಿ. 1929 ಇಸ್ವೆಂತ್ ತಿ ಇಂಡಿಯಾಕ್ ಆಯ್ಲಿ ಆನಿ ದಾರ್ಜಿಲಿಂಗಾಂತ್ ನೊವಿಶಿಯೆಟಿಕ್ ರಿಗ್ಲಿ. 1931 ಮೇ 24 ವೆರ್ ಧಾರ್ಮಿಕ್ ಆಂಗೊವ್ಣ್ಯೊ ಕರ್ತಾನಾ ತಿಣೆ ಮಿಸಾಂವಾಂಚಿ ಪಾತ್ರೊನ್ ಲಿಸುಎಕ್ಸಾಚ್ಯಾ ಸಾಂತ್ ತೆರೆಜಾಚೆಂ ನಾಂವ್ ಘೆತ್ಲೆಂ. 1937 ಮೇಯಾಂತ್ ತಿಚ್ಯೊ ನಿಮಾಣ್ಯೊ ಆಂಗವ್ಣ್ಯೊ ಕರ್ತಚ್ ತಿಕಾ ಎಂತಲಿಂತ್ಲ್ಯಾ (ಉದೆಂತಿ ಕಲ್ಕತ್ತಾ) ಇಸ್ಕೊಲಾಂತ್ ಶಿಕಂವ್ಕ್ ಧಾಡ್ಲೆಂ 1944 ಇಸ್ವೆಂತ್ ಥಂಯ್ ತಿ ಮುಕೆಲ್ ಮೆಸ್ತ್ರಿರ್ಣ್ ಜಾಲಿ.

ಸುಟ್ಕಾಯೆಚ್ಯಾ ಸುರ್ವಿಲ್ಯಾ ದಿಸಾಂನಿ (1946-47) ಕಲ್ಕತ್ತಾ ಅನಾಥಾಂಚೆಂ ಶಹರ್ ಜಾಲ್ಲೆಂ. ಮುಡ್ಲಾಂತ್ಲೆ ಹಿಂದು ತೊ ಗಾಂವ್ ಸೊಡ್ನ್ ಇಂಡಿಯಾಂತ್ ರಿಗ್‍ಲ್ಲೆ ಆನಿ ರಸ್ತ್ಯಾಂನಿ ತಾಂಚೆಂ ಬಿಡಾರ್ ಜಾಲ್ಲೆಂ ದುಬ್ಳಿಕಾಯ್ ಧರ್ನ್ ಖಾತಾಲಿ. ಅಸಲ್ಯಾ ದಿಸಾಂನಿ ಏಕ್ ಪಾವ್ಟಿಂ ತಿ ಆಪ್ಲ್ಯಾ (10-09-1946) ರೆತಿರೆ ಖಾತಿರ್ ಕಲ್ಕತ್ತಾ ಥಾವ್ನ್ ಡಾರ್ಜಿಲಿಂಗ್ ವೆತಾನಾ ದೆಕ್ತಾ ತ್ಯಾ ದೃಶ್ಯಾಂವಳಿಂ ಥಾವ್ನ್ ಪ್ರೇರೇಪಿತ್ ಜಾವ್ನ್ ದೆವಾಚ್ಯಾ ಉಲ್ಯಾಚೆಂ ವಿವೇಚನ್ ಚಲಯ್ತಾ ಆನಿ ತಿಕಾ ‘ಉಲ್ಯಾ ಭಿತರ್ ಏಕ್ ಉಲೊ’ ಲಾಭ್ತಾ. ಅಧಿಕಾರಾಚೊ ಹುದ್ದೊ ಸೊಡ್ನ್ ದುಬ್ಳ್ಯಾ ದಾಕ್ಟ್ಯಾಂ ಥಂಯ್ ಸೊಮ್ಯಾಚಿ ಸೆವಾ ಕರುಂಕ್ ಖೆರಿತ್ ಅಪವ್ಣೆ ತಿಕಾ ಲಾಭ್ತಾ.

ತ್ಯಾ ಉಪ್ರಾಂತ್ ಆಪ್ಲ್ಯಾ ವ್ಹಡಿಲಾಂಚಿ ಪರ್ವಣ್ಗಿ ಘೆವ್ನ್ ತಿ ಲೊರೆತ್ ಮೆಳಾಚಿ ಮುಸ್ತಾಯ್ಕಿ ಸೊಡ್ತಾ. ನಿಳ್ಶ್ಯಾ ದೆಗೆಚೆಂ ಧವೆಂ ಕಾಪಡ್ ಘೆತಾ. ಭಾರತಾಚೆಂ ಪರ್ಜೆತ್ವ್ (ಸಿಟಿಜನ್‍ಶಿಪ್) ಸ್ವೀಕಾರ್ ಕರ್ತಾ ಆನಿ ಕಲ್ಕತ್ತಾಚ್ಯಾ ಗಲ್ಲೆಂನಿ ಭುಕೆಕ್, ಪಿಡೆಕ್ ಆನಿ ಕೋಮುವಾದಿ ಹಿಂಸೆಕ್ ಬಲಿಪಡ್ತಲ್ಯಾಂಚ್ಯಾ ಚಾಕ್ರೆಕ್ ದೆಂವ್ತಾ. ಹ್ಯಾ ಖಾತಿರ್ ಗರ್ಜೆಚೆ ನರ್ಸಿಂಗ್ ಕೋರ್ಸ್ ತಿ ಶಿಕ್ತಾ. ಕಲ್ಕತ್ತಾಚ್ಯಾ ಮೊತಿಜಿಲಾಂತ್ ಏಕ್ ಲ್ಹಾನ್ಶೆಂ ಕೇಂದ್ರ್ ಸುರ್ವಾತ್ಲಲ್ಯಾ ತಿಣೆ ಥಂಯ್ಸರ್ ಅನಾಥಾಂಚಿ, ಭುಕೆನ್ ಆನಿ ಪಿಡೆನ್ ವಳ್ವಳ್ತಲ್ಯಾಂಚಿ ಚಾಕ್ರಿ ಕರುಂಕ್ ಸುರ್ವಾತ್ಲೆಂ. ತಿಕಾ ಸಭಾರ್ ವಿರೋದ್ ಆನಿ ಕಷ್ಟ್ ಸೊಸುಂಕ್ ಮೆಳ್ಳೆ ತರಿ ದೆವಾಚ್ಯಾ ದಯೆನ್ ತಿಕಾ ಸಭಾರ್ ಬರ್ಯೊ ಸಾಂಗಾತಿಣಿ ಲಾಭ್ಲ್ಯೊ ಆನಿ ಹಾಚೊ ಪರಿಣಾಮ್ ಜಾವ್ನ್ ದುಬ್ಳ್ಯಾಂ ಮಧ್ಲ್ಯಾ ಭೊವ್ ದುರ್ಬಳ್ಯಾಂಕ್ ಪಾಂವ್ಚೆ ಖಾತಿರ್ ‘ಮಿಷಿಯೋನರಿಸ್ ಆಫ್ ಚ್ಯಾರಿಟಿ’ ಮ್ಹಣ್ಚೊ ಧರ್ಮ್‍ಮೇಳ್ ತಿಣೆ ಘಡ್ಲೊ. ನಿರ್ಗತಿಕಾಂಕ್ ತಿಣೆ ದಿಂವ್ಚ್ಯಾ ಸೆವೆಚಿ ವಳಕ್ ವೆಗ್ಗಿಂಚ್ ಸಂಸಾರಾಕ್ ಕಳ್ಳಿ ಆನಿ ಬರೊ ಪಾಟಿಂಬೊ ತಿಕಾ ಲಾಭ್ಲೊ. ಅಕ್ತೋಬರ್ 7, 1950 ವೆರ್ ತಿಚ್ಯಾ ಸ್ವತಂತ್ರ್ ಧರ್ಮ್‍ಮೆಳಾಕ್ ಪವಿತ್ರ್ ಸದ್ರೆ ಥಾವ್ನ್ ಮಾನ್ಯತಾ ಲಾಭ್ಲಿ.

ಮದರ್ ತೆರೆಸಾ ಪರ್ಮಾಣೆ ‘ಆಮ್ಚ್ಯೊ ಬರ್ಯೊ ಕರ್ನ್ಯೊ ಆಮಿ ದೆವಾಚ್ಯಾ ಮೊಗಾ ಖಾತಿರ್ ಕರಿಜೆ ತವಳ್ ಮಾತ್ರ್ ತಾಂಕಾಂ ಅರ್ತ್ ಯೆತಾ, ಮೊಗಾವಿಣ್ ಆಜ್ ಸಂಸಾರ್ ದುಕಾಂತ್ ಬುಡ್ಲಾ ತ್ಯಾ ಖಾತಿರ್ ಕ್ರಿಸ್ತಾಚ್ಯಾ ಮೊಗಾಚಿ ರೂಚ್ ಸಂಸ್ರಾಕ್ ವಾಂಟುಂಕ್ ಸರ್ವ್ ಸಾಧನಾ ಆಮಿ ಕರಿಜೆ’ ಮ್ಹಣುನ್ ತಿ ಸಾಂಗ್ತಾ. ಮಾಗ್ಣ್ಯಾಕ್ ಧಾಂಪ್ಲಲ್ಯಾ ಹಾತಾಂ ಪ್ರಾಸ್ ಮೊಗಾಭರಿತ್ ಸೆವೆಕ್ ಉಘಡ್ಲಲೆ ಹಾತ್ ಸೊಮ್ಯಾಕ್ ಚಡ್ ಮೊಗಾಚೆ ಮ್ಹಣುನ್ ತಿಚೊ ಅಭಿಪ್ರಾಯ್ ಆಸ್ಲಲೊ. ತಿಚ್ಯಾ ನಿರಂತರ್ ಸೆವೆ ವಾವ್ರಾಚೊ ಫಳ್ ಜಾವ್ನ್ ಮಿಶಿಯೊನರಿಸ್ ಆಫ್ ಚ್ಯಾರಿಟಿ ಬಿಡಾರಾಂ ಚಡುನ್‍ಂಚ್ ಗೆಲಿಂ. ನಿರ್ಗತಿಕಾಂ , ಕಠಿಣ್ ಸ್ಥಿತೆರ್ ಆಸ್ಚಿಂ ಪಿಡೆಸ್ತಾಂ, ಕೊಡಾಚ್ಯಾ, ಕ್ಯಾನ್ಸರಾಚ್ಯಾ ಆನಿ ಏಯ್ಡ್‍ಸ್ ತಸಲ್ಯಾ ಪಿಡೆಚಿಂ ತಿಚ್ಯಾ ಮೊಗಾಚ್ಯಾ ಸೆವೆಂತ್ ಬರ್ಯಾ ಮರ್ಣಾಕ್ ತಯಾರ್ ಜಾಲಿಂ. ತಿಚೆರ್ ಮತಾಂತರಾಚೆ ಆನಿ ಹೆರ್ ಸಭಾರ್ ಫಟ್ಕಿರೆ ಬದ್ಲಾಮ್ ಪಡ್ಲೆ ತರಿ ಕ್ರಿಸ್ತಾಚ್ಯಾ ಕಣ್ವಳ್ಯಾ ಮೊಗಾಚ್ಯಾ ಬಳಾನ್ ಸಕ್ಕಡ್ ತಿಣೆ ಸೊಸ್ಲೆಂ. ತಿಚ್ಯಾ ಬರ್ಯಾ ಕಾಮಾಂತ್ ಪವಿತ್ರ್ ಅತ್ಮ್ಯಾಚ್ಯಾ ಬಳಾಚಿ ಸಾಕ್ಸ್ ತಶೆಂ 2007 ಇಸ್ವೆಂತ್ 5000 ಚಡ್ ಪ್ರಾಸ್ ಧರ್ಮ್‍ಭಯ್ಣಿ ತಿಚ್ಯಾ ಧರ್ಮ್‍ಮೆಳಾಂತ್ ಆಸ್‍ಲ್ಲಿಂ ತಿಂ ಸಂಸ್ರಾಚ್ಯಾ 120 ಪ್ರಾಸ್ ಚಡ್ ದೆಶಾಂನಿ ಶಿಂಪ್ಡುನ್ ಅನಾಥಾಂಚ್ಯಾ ಸೆವೆಂತ್ ಮಗ್ನ್ ಜಾಲ್ಲಿಂ. 1963 ಇಸ್ವೆಂತ್ ಮಿಷಿಯೊನರಿಸ್ ಆಫ್ ಚ್ಯಾರಿಟಿ ಭಾವಾಂಚೊ ಮೇಳ್ ಘಡ್ಲೊ. ಕ್ರಮೇಣ್ ಯಾಜಕಾಂ ಖಾತಿರ್ ಕೊರ್ಪುಸ್ ಕ್ರಿಸ್ತಿ ಸಂಚಲನ್‍ಯಿ ತಿಣೆ ಘಡ್ಲೆಂ.

ತಿಚ್ಯಾ ಮೊಗಾಚ್ಯಾ ಆನಿ ಸೆವೆಚ್ಯಾ ವಾವ್ರಾನ್ ಸಂಸ್ರಾರ್ ಭರ್ಲಲೆಂ ದೂಕ್ ಉಣೆ ಕರುಂಕ್ ವರ್ತಿ ಸೆವಾ ದಿಲಿ. ಝುಜಾಚ್ಯಾ ತಳಾಂನಿ ರಾವುನ್ ಮಾರ್‍ಫಾರಾಂಕ್ ಬಲಿ ಜಾಲ್ಲ್ಯಾಂಕ್ ತಿ ತೆಂಕೊ ಜಾಲಿ. ಆನಿ ಹ್ಯಾ ತಿಚ್ಯಾ ವಾವ್ರಾಕ್ ಮಾನುನ್ ಸಭಾರ್ ರಾಷ್ಟ್ರಾಂನಿ ತಿಕಾ ಮಾನ್ ಕೆಲೊ. ಸಂಸ್ರಾಚೆಂ ಭೋವ್ ವರ್ತೆಂ ಶಾಂತಿ ಇನಾಮ್ ನೊಬೆಲ್, ಭಾರತಾಚಿ ಭೋವ್ ವರ್ತಿ ಭಾರತ್‍ರತ್ನ ಪ್ರಶಸ್ತಿ, ಆನಿ ಸಭಾರ್ ರಾಷ್ಟ್ರಾಂಚ್ಯೊ ವರ್ತ್ಯೊ ಪ್ರಶಸ್ತ್ಯೊ ತಿಕಾ ಸೊದುನ್ ಆಯ್ಲ್ಯೊ. ಹ್ಯೊ ಸರ್ವ್ ಪ್ರಶಸ್ತ್ಯೊ ಆಪುಣ್ ದೆವಾಚ್ಯಾ ಮೊಗಾ ಖಾತಿರ್ ಸ್ವೀಕಾರ್ ಕರ್ತಾಂ ಮ್ಹಣ್ ತಿ ಪರ್ಗಟ್ತಾಲಿ.

1989 ಇಸ್ವೆ ಉಪ್ರಾಂತ್ ನ್ಯುಮೋನಿಯಾ ಆನಿ ಕಾಳ್ಜಾಚ್ಯಾ ಪಿಡೆಂಕ್ ತಿ ವಳಗ್ ಜಾಲಿ. 1996 ಂತ್ ಪಡುನ್ ತಿಚಿಂ ಮಾನಿಯೆ ಹಾಡಾಂ ಮೊಡ್ಲಿಂ. ಸಭಾರ್ ತೇಂಪ್ ಕಾಳ್ಜಾ ಪಿಡೆನ್ ವಳ್ವಳುನ್ ನಿಮ್ಣೆ 5-09-1997 ವೆರ್ ತಿ ಸರ್ಗಾರಾಜಾಂತ್ ರಿಗ್ಲಿ. ಭಾರತ್ ಸರ್ಕಾರಾನ್ ಭೋವ್ ವರ್ತ್ಯಾ ಮಾನಾನ್ ತಿಚ್ಯಾ ಮೊರ್ಣಾಚಿ ವಿಧಿ ಚಲಯ್ಲಿ (ತಿಚಿ ನಿರ್ಜೀವ್ ಕೂಡ್ ಮಹಾತ್ಮಾ ಗಾಂಧಿಚಿ ನಿರ್ಜೀವ್ ಕೂಡ್ ವೆಲ್ಲ್ಯಾ ಗನ್ನ್ ಕ್ಯಾರೆಜಿರ್ {ತೊಪ್‍ದಾನೆ} ವೆಲ್ಲಿ)

ಜಿವಿತಾ ಕಾಳಾರ್‍ಚ್ ಮದರ್ ಜಿವಂತ್ ಸಾಂತಿಣ್ ಮ್ಹಣುನ್ ನಾಮ್ಣೆಚಿ ಜಾಲ್ಲಿ ರಾಜಕೀ ಸಂಸಾರ್ ಆನಿ ಭಾವಾಡ್ತಿ ಸಂಸಾರ್ ತಿಚೆಂ ಭಾಗೆವಂತ್ಪಣ್ ಮಾನುನ್ ಘೆತಾಲೆಂ. ತಿಚ್ಯಾ ಸಾಂತಿಪಣಾಚ್ಯಾ ಮಾಖ್ಣೆಚಿ ಪ್ರಕ್ರಿಯಾ 1997 ಇಸ್ವೆಂತ್‍ಚ್ ಸುರ್ವಾತ್ಲಿ. ಮೊಗಾಚ್ಯಾ, ಮಾಗ್ಣ್ಯಾಚ್ಯಾ ಆನಿ ಸೆವೆಚ್ಯಾ ತಿಚ್ಯಾ ಮಿಸಾಂವಾಂತ್ ಇಗರ್ಜ್‍ಮಾತೆಕ್ ನವೆಂ ಬಳ್ ಲಾಭ್‍ಲ್ಲೆಂ ಪಾಫಾ ಜುವಾಂವ್ ಪಾವ್ಲು ದುಸ್ರ್ಯಾನ್ ಆನಿ ಪಾಪಾ ಬೆನೆದಿಕ್ತ್ ಸೊಳಾವ್ಯಾನ್ ಅಭಿಮಾನಾನ್ ಮಾನುನ್ ಘೆತ್‍ಲ್ಲೆಂ ಪಳಂವ್ಕ್ ಮೆಳ್ತಾ. ಮೊನಿಕಾ ಬೆಸ್ರಾ ಥಂಯ್ ಮದರಾಚ್ಯಾ ಮಧ್ಯಸ್ಥೆನ್ ಘಡ್‍ಲ್ಲ್ಯಾ ಅಜಾಪಾ ಉಪ್ರಾಂತ್ 19-10-2015 ವೆರ್ ತಿಕಾ ಭಾಗೆವಂತ್ ಪಾಚಾರ್ಲೆಂ. ಮದರಾಚ್ಯಾ ಮಜತಿನ್ ಬ್ರೆಜಿಲಾಂತ್ಲ್ಯಾ ದಾದ್ಲ್ಯಾ ಥಂಯ್ ಘಡ್‍ಲ್ಲ್ಯಾ ಅಜಾಪಾ ಉಪ್ರಾಂತ್ ಪಾಪಾ ಫ್ರಾನ್ಸಿಸಾನ್ 4-9-2015 ವೆರ್ ತಿಕಾ ಸಾಂತ್ ಪಾಚಾರ್ಲೆಂ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016