ಸಾಂತ್ ತೊಮಾಸ್ ಅಪೊಸ್ತಲ್
ಯಾದ್ : ಜುಲಾಯ್ 3
Throne of Thomas the Apostle in Malabar (Photo : Wikimedia Commons)
ಜೆಜುನ್ ಆಪ್ಲೊ ಅಪೊಸ್ತಲ್ ಜಾಂವ್ಕ್ ವಿಂಚುನ್ ಕಾಡ್‍ಲ್ಲೊ ದುಬಾವಿ ತೊಮಾಸ್ ನಿಮಾಣೆ ಸಭಾರ್ ಜನಾಂಗಾಕ್ ಜೆಜುಚಿ ಧಯ್ರಾಧಿಕ್ ಸಾಕ್ಸ್ ಜಾಂವ್ಕ್ ಪಾವ್ಲೊ. ಭಾರತಾಂತ್ ಆಜ್ ವ್ಹಡ್ ಸಂಕ್ಯಾನ್ ಕಥೊಲಿಕ್ ಆನಿ ಹೆರ್ ಕ್ರಿಸ್ತಾಂವ್ಪಣ್ ವಾಡ್ಲಾಂ ತರ್ ಹಾಕಾ ಸಾಂತ್ ತೊಮಾಸಾಚೊ ವಾವ್ರ್ ಮುಳಾನ್ ಕಾರಣ್ ಮ್ಹಣ್ಚ್ಯಾಂತ್ ದುಬಾವ್ ನಾ. ದೆಕುನ್‍ಂಚ್ ದಿದಿಮುಸ್ ಸಾಂತ್ ತೊಮಾಸಾಕ್ ಇಂಡಿಯಾಚೊ ಅಪೊಸ್ತಲ್, ಆಸ್ಸಿಯಾಚೊ ಅಪೊಸ್ತಲ್ ಅಶೆಂ ಸಭಾರ್ ನಾಂವಾಂನಿ ವೊಲಾಯ್ತಾತ್. ಆಪ್ಲ್ಯಾ ಸೊಮ್ಯಾ ಸವೆಂ ತೊ ಜಿಯೆಲ್ಲೊ, ದುಬಾವಿ ಮ್ಹಣುನ್ ತಾಕಾ ಆಪಯ್ತಾಲೆ ತರಿ ಧಯ್ರಾನ್ ಶುಭ್‍ವಾರ್ತಾ ಸಂಸ್ರಾಚ್ಯಾ ಕೊನ್ಶ್ಯಾಕ್ ಪಾವಂವ್ಚ್ಯಾಕ್ ತೊ ಸಕ್ರಿಯ್ ರಿತಿನ್ ವಾವುರ್ಲೊ. ‘ಮ್ಹಜ್ಯಾ ದೆವಾ, ಮ್ಹಜ್ಯಾ ಸಾಯ್ಭಾ’ ಮ್ಹಣುನ್ ತಾಣೆ ಕೆಲ್ಲೊ ಉದ್ಘಾರ್ ಆಜ್ ಆಮ್ಕಾಂ ಆಮ್ಚ್ಯಾ ಭಾವಾಡ್ತಾಚೊ ವ್ಹಡ್ ಉದ್ಘಾರ್ ಜಾಂವ್ಕ್ ಪಾವ್ಲಾ. ವಾಂಜೆಲಾಂತ್ ತಾಣೆ ಧಯ್ರಾಧಿಕ್ಪಣಾನ್ ಸೊಮ್ಯಾ ಸವೆಂ ವಚುನ್ ಮರುಂಕ್‍ಯಿ ತಯಾರ್ ಜಾಂವ್ಚೊ ಪ್ರಸಂಗ್‍ಯಿ ಆಸಾ. (ಜು : 11-16)
ದಿದಿಮುಸ್ ತೊಮಾಸಾಕ್ ಇಂಡಿಯಾಕ್ ಯೇಂವ್ಕ್ ಪಾರ್ತಿಯನ್ ರಾಯಾ ಗೊಂಡೊಫರ್ನಸಾನ್ ಆಪೊವ್ಣೆ ದಿಲೆಂ ಮ್ಹಣುನ್ ಚರಿತ್ರೆಂತ್ ಕಳುನ್ ಯೆತಾ. ತೊ ಗೆದ್ರೋಶಿಯ, ಗಾಂಧಾರಾ ಆನಿ ಹೆರ್ ಬಡ್‍ಪಡ್ಲಾಚೆ (ನೋರ್ತ್‍ವೆಸ್ಟ್) ಗಾಂವ್ ಉತ್ರುನ್ ಇಂಡಿಯಾಕ್ ಆಯ್ಲೊ. ಪೂಣ್ ಉತ್ತರ್ ಇಂಡಿಯಾಂತ್‍ಚ್ ಉರ್ನಾಶೆಂ ತೊ ಪಡ್ಲಾಚ್ಯಾ ದರ್ಯಾ ದೆಗೆಂತ್ಲ್ಯಾನ್ ತೆನ್ಕಾ ಇಂಡಿಯಾ ಪರ್ಯಾಂತ್ ಆಯ್ಲೊ ಆನಿ ಚಡ್ ಕರ್ನ್ ಕೇರಳ ಆನಿ ತಮಿಳ್ನಾಡಾಂತ್ ತಾಣೆ ಮಿಸಾಂವ್ ವಾವ್ರ್ ಕೆಲೊ ಮ್ಹಣುನ್ ಸಂಪ್ರದಾಯ್ ಸಾಂಗ್ತಾತ್ (ತಾಚೆ ಸವೆಂ ತೆನ್ಕಾಕ್ ಆಯಿಲ್ಲೊ ಬಾರ್ತಲೋಮೆವ್ ಕೆನರಾಂತ್ ಧರ್ಮ್‍ಪ್ರಸಾರ್ ಕರ್ತಾಲೊ.) ತೊಮಾಸಾನ್ ಕೇರಳಾಚ್ಯಾ ತೆನ್ಕಾಂತ್ ಏಳರಪಳ್ಳಿ ಮ್ಹಣ್ಚ್ಯೊ ಸಾತ್ ಇಗರ್ಜ್ಯೊ ಆನಿ ಏಕ್ ಕೊಪೆಲ್ (ಕೊಡಂಗಲ್ಲೂರ್, ಪಾಲಯೂರ್, ಕೊಟ್ಟಕಾವು, ನಿರನಮ್, ಕೊಲ್ಲಮ್, ಕೊಕ್ಕಮಂಗಲಮ್, ನಿಲಕ್ಕಲ್ ಇಗರ್ಜೊ ಆನಿ ತಿರುವಿತಮ್‍ಕೋಡ್ ಕೊಪೆಲ್- ಹಾಂಕಾಂ ಸಾಂಗಾತಾ ಸಾಡೆಸಾತ್ ಇಗರ್ಜ್ಯೊ ಮ್ಹಣ್ಚೆಂ ಆಸಾ) ಬಾಂದ್ಲ್ಯೊ. ಕೇರಳಾಂತ್ ಸಭಾರ್ ಸಂಪ್ರದಾಯಾಂಚೆ (ಸಿರೋ ಮಲಬಾರ್, ಸಿರೋ ಮಲಂಕರ, ಸಿರಿಯನ್ ಆನಿ ಹೆರ್) ಕ್ರಿಸ್ತಾಂವ್ ಆನಿ ಕಥೊಲಿಕ್ ವಾಡುನ್ ಯೆಂವ್ಚ್ಯಾಂತ್ ತೊಮಾಸಾಚೊ ವಾವ್ರ್ ಭೋವ್ ಮಹತ್ವಾಚೊ ಆಸ್‍ಲ್ಲೊ. ಸಭಾರ್ ಮಹತ್ವಾಚ್ಯಾ ಆನಿ ಮ್ಹಂತನಾಚ್ಯಾ ಘರಾಣ್ಯಾಂಕ್ ತೊಮಾಸಾನ್ ಕ್ರಿಸ್ತಾ ಥಂಯ್ ಹಾಡ್ಲೆಂ.
ತೊಮಾಸ್ ಕೇರಳಾ ಥಾವ್ನ್ ತಮಿಳ್ನಾಡಾಕ್ ಗೆಲೊ ಆನಿ ಥಂಯ್ಸರ್ ತಾಣೆ ಭಾವಾಡ್ತಾಕ್ ಪ್ರಸಾರ್ ಕೆಲೊ. ಕ್ರಿಶ 72 ಇಸ್ವೆಂತ್ ತಾಕಾ ಮಾಡ್ತಿರಾಚೆಂ ಮೋರ್ನ್ ಫಾವೊ ಜಾಲೆಂ ಆನಿ ಥಂಯ್ಸರ್ ತಾಚಿ ಕೂಡ್ ನಿಕೆಪಿಲಿ. ತ್ಯಾ ಗುಡ್ಯಾಕ್ ಆಜೂನ್ ಸ್ಯಾನ್‍ತೋಮ್ ಮ್ಹಣುನ್‍ಂಚ್ ಆಪಯ್ತಾತ್.
ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)
ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್
First Impression : December 2016
.png)
.png)
.png)