Articles / Special

ಸಾಂ. ಮರಿಯಾ ತೆರೇಸಾ ಚಿರಾಮೆಲ್

ಯಾದ್ : ಜೂನ್ 8

St. Mariam Thresia Chiramel (Photo : Vatican News)

ಸಾಂ. ಮರಿಯಾ ತೆರೆಜ್ ಚಿರಾಮೆಲ್ ಎಪ್ರಿಲ್ 26, 1876 ವೆರ್ ಕೇರಳಾಂತ್ಲ್ಯಾ ತ್ರಿಶೂರ್‍ಚ್ಯಾ ಪುತ್ತೆನ್‍ಚಿರಾಚ್ಯಾ ಮಣಿಕಿಡಿಯನ್ ಹಳ್ಳೆಂತ್ ಜನ್ಮಾಲಿ. ಸಿರೋ ಮಲಬಾರ್ ಕಥೊಲಿಕ್ ಜಾವ್ನಾಸ್‍ಲ್ಲ್ಯಾ ತೋಮಾ ಆನಿ ತಂಡಾ ಜೊಡ್ಯಾಚ್ಯಾ ಪಾಂಚ್ ಜಣಾ ಭುರ್ಗ್ಯಾಂ ಮಧೆಂ ತಿ ತಿಸ್ರಿ ಜಾವ್ನಾಸ್‍ಲ್ಲಿ. ಲ್ಹಾನ್ಪಣಾರ್ ಥಾವ್ನ್ಂಚ್ ತಿಕಾ ಸದಾಂಚೆಂ ಮಾಗ್ಣೆ ಆನಿ ಘರ್ಚಿಂ ಲ್ಹಾಲ್ಹಾನ್ ಕಾಮಾ ತಿರ್ಸುಂಚಿಂ ಮ್ಹಳ್ಯಾರ್ ಎಕ್ದಮ್ ಧಾದೊಸ್ಕಾಯ್.

ತೆಂ ಕುಟಮ್ ಎಕ್ದಮ್ ಗ್ರೇಸ್ತ್ ಆಸ್‍ಲ್ಲೆಂ ತರಿ ಕ್ರಮೇಣ್ ದುಬ್ಳಿಕಾಯೆಕ್ ಪಡ್ಲೆಂ ಆನಿ ಹ್ಯಾ ದುಬ್ಳಿಕಾಯೆಚೆ ಕಷ್ಟ್ ವಿಸ್ರುಂಕ್ ಕುಟ್ಮಾಚ್ಯಾ ದಾದ್ಲ್ಯಾಂನಿ ಸೊರೊ ಪಿಯೆಂವ್ಚಿ ಸವಯ್ ಕೆಲಿ. ಹ್ಯಾ ನಿಮ್ತಿಂ ತೆರೆಜಾ ಕಷ್ಟಾಂಕ್ ಪಡ್ಲಿ. ತಿಣೆ ಆಪ್ಲ್ಯಾ ಬಾಪಯ್ ಆನಿ ಭಾಂವಾಂ ಪಾಸುತ್ ನಿರಂತರ್ ಮಾಗ್ಣೆ ಕರುಂಕ್ ಧರ್ಲೆಂ. ತಿಕಾ ದೆವಾ ಥಂಯ್ ಆನಿ ಶಿಕ್ಪಾ ಥಂಯ್ ಆಸ್ಚ್ಯಾ ತಾನೆಕ್ ಸರಿ ಜಾವ್ನ್ ದೇವ್‍ಆಪವ್ಣೆ ತಿಕಾ ವೆಗ್ಗಿಂಚ್ ಆಯ್ಲೆಂ. ತಿಚ್ಯಾ 12 ವರ್ಸಾಂ ಪ್ರಾಯೆರ್ ತಿಚಿ ಆವಯ್ ದೆವಾಧಿನ್ ಜಾಲಿ ಆಸ್ತಾಂ ಜಿವಿತಾಂತ್ ದೆವಾಚಿ ಖುಶಿ ಸೊಧುನ್ ಲ್ಹಾನ್‍ಪ್ರಾಯೆರ್‍ಚ್ ತಿ ದೆವಾಚೆ ಸೆವೆಕ್ ರಿಗ್ಲಿ. ತಿಣೆ ಇಸ್ಕೊಲಾಚೆಂ ಶಿಕಪ್ ವೆಗ್ಗಿಂಚ್ ಸೊಡಿಜೆ ಪಡ್ಲೆಂ ತರಿ ಏಕ್ ಫಾಂಕಿವಂತ್ ಧರ್ಮ್‍ಭಯ್ಣ್ ಜಾವ್ನ್ ದುಬ್ಳ್ಯಾ ದಾಕ್ಟ್ಯಾಂಚ್ಯಾ ಗರ್ಜಾಂಕ್ ಪಾಂವ್ಚೆಂ ಆನಿ ತಾಂಕಾಂ ಶಿಕ್ಪಾ ತೆವ್ಶಿಂ ಆಕರ್ಶಿತ್ ಕರ್ಚೆಂ ಮಾಗಿರ್ ತಾಣಿ ದುಬ್ಳಿಕಾಯೆಚ್ಯಾ ಜಾಳಾಂ ಥಾವ್ನ್ ಭಾಯ್ರ್ ಯೆಂವ್ಚೆಪರಿಂ ಕರ್ಚೆಂ ಕಾಮ್ ಧಯ್ರಾಧಿಕ್‍ಪಣಿ ಕೆಲೆಂ.

ಧಾರ್ಮಿಕ್ ಜಿವಿತಾಂತ್‍ಯಿ ಮಾಗ್ಣ್ಯಾಚಿ ವಿಶೇಸ್ ವೋಡ್ ದಾಕಯಿಲ್ಲ್ಯಾ ತಿಣೆ 1913 ಇಸ್ವೆಂತ್ ಪುತ್ತೆಂಚಿರಾಂತ್ ಮಾಗ್ಣ್ಯಾಚೆಂ ಘರ್ ಸ್ಥಾಪನ್ ಕೆಲೆಂ ತಿಚ್ಯಾ ಸವೆಂ ಮಾಗ್ಣ್ಯಾಂತ್ ಆಸ್ತಾನಾ ದಯ್ವಿಕ್ ಅನ್ಭವ್ ಆನಿ ಸಭಾರ್ ಬರೆಂಪಣ್ ಘಡ್ತಾ ಮ್ಹಣುನ್ ಲೋಕ್ ವಳ್ಕುಂಕ್ ಲಾಗ್ಲೊ ಆನಿ ಹಾರಿಹಾರಿಂನಿ ತಿಚೆ ಸರ್ಶಿಂ ಆಯ್ಲೊ. ಹ್ಯಾ ನಿಮ್ತಿಂ ಹೆರ್ ಧಾರ್ಮಿಕ್ ಭಯ್ಣಿಂಕ್ ವಾಂದ್ದೆ ಜಾತಾತ್ ಮ್ಹಣ್ಚೆಂ ತಿಚ್ಯಾ ಅನ್ಭವಾಕ್ ಆಯ್ಲೆಂ ದೆಕುನ್ ನಿಮಾಣೆ 1914 ಇಸ್ವೆಂತ್ ಆಪ್ಲೊಚ್ ನವೊ ಭಾಗೆವಂತ್ ಕುಟ್ಮಾಚೊ ಧರ್ಮ್‍ಮೇಳ್ ತಿಣೆ ಘಡ್ಲೊ.

ಜೆಜುಕ್ರಿಸ್ತಾಚೊ ಮೋಗ್ ಆನಿ ಭಕ್ತಿಪಣ್ ವಿಶೇಸ್ ಜಾಲ್ಲ್ಯಾನ್ ತಿಚ್ಯಾ ಆಂಗಾರ್ ಆಮ್ಚ್ಯಾ ಸೊಮ್ಯಾಚೆ ಘಾಯ್ ಜಿವೆ ಪಡ್ಲೆ (ಸ್ತಿಗ್ಮಾತ) ಮಾತ್ರ್ ನ್ಹಂಯ್ ಸಭಾರ್ ಅಧ್ಯಾತ್ಮಿಕ್ ಅನ್ಭವ್ ತಿಕಾ ಜಾಂವ್ಕ್ ಲಾಗ್ಲೆ. ತಿಚ್ಯಾ ಭಕ್ತಿಪಣಾಚೆರ್ ಸಯ್ತಾನಾನ್ ದಾಡ್ ಘಾಲ್ನ್ ಸಭಾರ್ ರಿತಿಂನಿ ತಿಕಾ ವಳ್ವಾಳಾಯ್ಲೆಂ. ಕುಡಿಚೆ ಕಷ್ಟ್ ತಿಣೆ ಸೊಸ್ಲೆ ತರಿ ಅತ್ಮೊ ದಂಡಳ್ಣಾಶೆಂ ತಿ ಥಿರ್ ರಾವ್ಲಿ. ಪಿಡಾ, ಘಾಯ್ ಆನಿ ಹೆರ್ ಆಪಾಯ್ ತಿಣೆ ಸೊಸ್ಚೆ ಪಡ್ಲೆ. ನಿಮಾಣೆ 1926 ಜುನಾಚೆ 8ವೆರ್ ಕುಳಿಕತ್ತುಸೆರಿ ಮ್ಹಣ್ಚೆ ಥಂಯ್ ತಿ ಸಾಸ್ಣಾಕ್ ಅಂತರ್ಲಿ.

5-10-1973 ವೆರ್ ತಿಕಾ ದೆವಾಚಿ ಸೆವಕಿ ಮ್ಹಣುನ್ ಪಾಸಾರ್ಲೆಂ ಆನಿ ಪಾಪಾ ಜುವಾಂವ್ ಪಾವ್ಲು ದುಸ್ರ್ಯಾನ್ ತಿಕಾ 28-06-1999 ವೆರ್ ಮಾನಾಪಾತ್ರ್ ಮ್ಹಣುನ್ ಪರ್ಗಟ್ಲೆಂ. ತಾಣೆಂಚ್ 9-4-2000 ವೆರ್ ತಿಕಾ ಭಾಗೆವಂತ್ ಮ್ಹಣುನ್ ಠರಾಯ್ಲೆಂ. 24-06-2014 ವೆರ್ ತಿಚೆ ಥಾವ್ನ್ ದುಸ್ರೆಂ ಅಜಾಪ್ ಘಡ್‍ಲ್ಲೆಂ ತೆಂ ಸಾಂತಾಂ ಖಾತಿರ್ ಆಸ್ಚ್ಯಾ ಪವಿತ್ರ್ ದಫ್ತರಾನ್ ಮಾಂದುನ್ ಘೆತ್ಲೆಂ ಆನಿ ಪಾಪಾ ಫ್ರಾನ್ಸಿಸಾನ್ 13-10-2019 ವೆರ್ ತಿಕಾ ಸಾಂತಾಂಚೊ ಮುಕುಟ್ ದಿಲೊ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016