Articles / Special

ಅ. ಕಥೊಲಿಕ್ ಪವಿತ್ರ್ ಸಭಾ ಸಾಂತಾಂಚೆಂ ಆರಾಧನ್ ಕರ್ತಾಗಿ?

ನಾ, ಕಥೊಲಿಕ್ ಪವಿತ್ರ್ ಸಭಾ ಎಕಾಚ್ ಸರ್ವ್‍ಪದ್ವೆದಾರ್ ತ್ರಿಯೆಕ್‍ದೆವಾಕ್ ಸೊಡ್ನ್ ಹೆರ್ ಕೊಣಾಕ್‍ಚ್ ದೇವ್ ಮ್ಹಣುನ್ ಮಾಂದಿನಾ ಆನಿ ಆರಾದಾನ್ ಕರಿನಾ. ಪೂಣ್ ಹ್ಯಾ ಯಾತ್ರಿಕ್ ಸಂಸ್ರಾಂತ್ಲ್ಯಾ ವಾಟ್ಸುರ್ಯಾ ದೇವ್‍ಪರ್ಜೆನ್ ಸಾಂತಾಂ ಭಕ್ತಾಂಚಿ ದೇಕ್ ಘೆವ್ನ್ ಸಾಂತಿಪಣಾಚ್ಯಾ ವಾಟೆರ್ ಜಿಯೆಂವ್ಚೆ ಖಾತಿರ್ ತಾಂಚೊ ಉಗ್ಡಾಸ್ ಜಿವೊ ದವ್ರುಂಕ್ ಜಾಯ್ ತಿಂ ಲಿತುರ್ಜಿಕ್ ಕಾರ್ಯಿಂ ಚಲಂವ್ಚಿ ರಿವಾಜ್ ಆಸಾ. ಹ್ಯಾ ಆನಿ ಹೆರ್ ಖಂಚ್ಯಾಯ್ ಲಿತುರ್ಜಿ ಕಾರ್ಯಾಚೆಂ ಮೂಳ್ ಆನಿ ಶೆವೊಟ್ ಎಕಾಚ್ ದೆವಾಚೆಂ ಆರಾಧನ್‍ಂಚ್ ಜಾವ್ನಾಸಾ.

ತರಿ ಆಮಿ ಎಕಾ ಆದರ್ಶ್ ವೆಕ್ತಿಕ್, ಮೊಗಾಚ್ಯಾ ಆನಿ ಆಮ್ಚೆ ಖಾತಿರ್ ಬರೆಂಪಣ್ ಕೆಲ್ಲ್ಯಾ ವೆಕ್ತಿಕ್ ಸದಾಂ ಉಗ್ಡಾಸಾಂತ್ ದವರ್ಚೆಂ ಸಹಜ್ ಜಾವ್ನಾಸಾ. ಮನ್ಶಾನ್ ಆಪ್ಣಾಕ್ ತೆಂಕೊ ದಿಲ್ಲ್ಯಾಂಕ್ ಗವ್ರವಾನ್ ಲೆಕ್ಚೆಂ ಸಹಜ್ ವರ್ತನ್, ತೆಚ್‍ಪರಿಂ ಜ್ಯಾ ಸಾಂತಾಭಕ್ತಾ ಥಂಯ್ ಅಭಿಮಾನ್ ಆಸಾ ತಾಚಿ ಪೊಟ್ರೆಟ್/ ರುಪ್ಣೆಂ ದವರ್ಚ್ಯಾಂತ್ ಕಾಂಯ್ ಚೂಕ್ ನಾ. ಥೊಡ್ಯಾಂಕ್ ಮರಿಯೆಚ್ಯಾ ದೆಕಿವಂತ್ಪಣಾ ನಿಮ್ತಿಂ ವರ್ತೆಂ ಸಮಾಧಾನ್ ಲಾಭ್ತಾ ತರ್ ತಿಚಿ ಇಮಾಜ್/ ರುಪ್ಣೆಂ ಕೆಲ್ಲ್ಯಾಂತ್ ಕಿತೆಂ ಚೂಕ್? ಖರೊ ಕಥೊಲಿಕ್ ಖಂಚ್ಯಾಯ್ ರುಪ್ಣ್ಯಾಚಿ ಪುಜಾ ಕರಿನಾ., ಫಕತ್ ಉಗ್ಡಾಸಾ ಖಾತಿರ್ ತೊ ತಿ ವಾಪಾರ್ತಾ.

ಆ. ಪವಿತ್ರ್ ಪುಸ್ತಕಾಂತ್ ಸಾಂತಾಂ ಭಕ್ತಾಂಚ್ಯಾ ಜಿವಿತಾಚೊ ಉಲ್ಲೇಕ್ ಆಸಾಗಿ?

ಜೆಜು ಆಪ್ಲ್ಯಾ ಪರ್ಗಟ್ ಜಿಣ್ಯೆ ವೆಳಿಂ ಆಪ್ಲ್ಯಾ ಶಿಸಾಂನಿ ಮಾಗ್ಣ್ಯಾಚಿ ಆನಿ ಪವಿತ್ರ್ ಪಣಾಚಿ ಜೀಣ್ ಜಿಯೆಂವ್ಕ್ ಪರ್ತ್ಯಾಂ ಪರ್ತ್ಯಾಂ ಉಲೊ ದಿತಾ. ‘ಜಸೊ ಸರ್ಗಿಂ ಆಸ್ಚೊ ತುಮ್ಚೊ ಬಾಪ್ ಸರ್ವ್ ಬರೊ ತಶೆಂಸ್ ತುಮಿಂಯ್ ಸರ್ವ್ ಬರೆ ಜಾಯಾ’ ಮ್ಹಣ್ ತೊ ಶಿಸಾಂಕ್ ಸಾಂಗ್ತಾ.

ಕೊರಿಂಥ್‍ಗಾರಾಂಕ್ ಲಿಕ್ಲಲ್ಯಾ ಪಯ್ಲ್ಯಾ ಪತ್ರಾಂತ್ ಸಾಂತ್ ಪಾವ್ಲು ‘ಜೆಜು ಸವೆಂ ಪವಿತ್ರ್ ಜಾಲ್ಲ್ಯಾಂಕ್...’ ಮ್ಹಳ್ಳೊ ಸ್ಪಷ್ಟ್ ಉಲೊ ದಿತಾ. ತಶೆಂಸ್ ಸಾಂತ್ ಪೆದ್ರು ಆಪ್ಲ್ಯಾ ಪಯ್ಲ್ಯಾ ಪತ್ರಾಂತ್ ‘ತುಮ್ಕಾಂ ಆಪೊವ್ಣೆ ದಿಲ್ಲೊ ದೇವ್ ಜಶೆಂ ಭಾಗೆವಂತ್ ತಶೆಂ ತುಮಿಂಯ್ ಭಾಗೆವಂತ್ ಜಾಯಾ ...’ ಮ್ಹಣುನ್ ಸಾಂಗ್ತಾ. ಅಶೆಂ ಜೆಜು ಕ್ರಿಸ್ತಾಚ್ಯಾ ಸಾಂಗತಾಂತ್ ತಾಚೆಪರಿಂ ಆಮಿ ಸರ್ವಾಂನಿ ಭಾಗೆವಂತ್ ಜಾಯ್ಜಯ್ ಮ್ಹಣ್ಚೊ ಸಂದೇಶ್ ಆಸಾ.

ಇ. ಆಮಿ ಸಕ್ಡಾಂನಿ ಸಾಂತ್ ಜಾವ್ಯೆತಾಗಿ?

ವ್ಹಯ್, ಆಮ್ಕಾಂ ಸಕ್ಡಾಂಕ್ ಸಾಂತ್ ಜಾಂವ್ಕ್ ಆಪೊವ್ಣೆ ಆಸಾ. ಸಾಂತ್ ಸ್ತಾನಿಸ್ಲಾಸ್ ಕೊಸ್ತಕಾಕ್ ಸಾಂತ್ ಕುರ್ವಾರ್ ಕರ್ತಾನಾ ಸಭಾರ್ ಕಾಡ್ದಿನಲಾಂನಿ ‘ತ್ಯಾ ಚೆರ್ಕ್ಯಾಕ್ ಕಿತ್ಯಾಕ್ ಸಾಂತ್ ಮಾಕ್ಚೆಂ? ತಾಣೆ ತಿತ್ಲಿಂ ವರ್ತಿಂ ಸಾಧನಾ ಕಿತೆಂ ಕೆಲ್ಯಾಂತ್?’ ಮ್ಹಣುನ್ ಬಾಗೆವಂತ್ ಬಾಪಾಲಾಗಿಂ ವಿಚಾರ್ಲೆಂ ಖಂಯ್. ತವಳ್ ಭಾಗೆವಂತ್ ಬಾಪ್ ತಾಂಕಾಂ ಜಾಪ್ ದೀವ್ನ್ ‘ತಾಣೆ ವ್ಹಡ್ ವ್ಹಡ್ ಕಿತೆಂಚ್ ಕರುಂಕ್‍ನಾ, ಪೂಣ್ ಆಪ್ಲಿಂ ಲ್ಹಾಲ್ಹಾನ್ ಕಾಮಾ ವರ್ತ್ಯಾನ್ ಕೆಲ್ಯಾಂತ್, ತುಮಿಂಯ್ ತುಮ್ಚಿಂ ಕಾಮಾ ತಶೆಂಸ್ ವರ್ತ್ಯಾನ್ ಕರಾ, ಹಾಂವ್ ತುಮ್ಕಾಂಯ್ ಸಾಂತ್ ಮಾಕ್ತಾಂ’ ಮ್ಹಣಾಲೊ ಖಂಯ್. ಅಶೆಂ ಸಾಂತ್ ಜಾಂವ್ಕ್ ವ್ಹಡ್ ವ್ಹಡ್ ಸಾಧನಾ ಕರ್ಚಿ ಗರ್ಜ್ ನಾ ಬಗಾರ್ ಆಮ್ಚ್ಯಾ ಲ್ಹಾಲ್ಹಾನ್ ಕಾಮಾಂನಿ ಫಾಂಕಿವಂತ್ಪಣ್ ದಾಕಯ್ಲ್ಯಾರ್ ಆನಿ ಧಯ್ರಾನ್ ಜೆಜುಕ್ರಿಸ್ತಾಕ್ ಸಾಕ್ಸ್ ದಿಲ್ಯಾರ್ ಪುರೊ ಮ್ಹಣ್ಚೊ ಸಂದೇಶ್ ಹಾಂಗಾಸರ್ ದಿಲಾ.

ಸದಾಂನಿತಾಚ್ಯಾ ವಾವ್ರಾಂತ್ ಸೊಮ್ಯಾಚಿ ವಾಟ್ ಸೊಧ್ಚಿ, ಹರ್ಯೆಕಾ ಸಂಗ್ತಿಂನಿ ಶಾಣೆಂಪಣ್ ಆನಿ ಕ್ರಿಸ್ತಾ ಸಾರ್ಕೆಂ ಜಾಂವ್ಕ್ ನಿರಂತರ ಪ್ರೇತನ್ ಕರ್ಚೆಂ ಆಮ್ಕಾಂ ಗರ್ಜೆಚೆಂ. ತಶೆಂ ಮ್ಹಣ್ ಆಮಿ ಸರ್ವ್ ಮನಿಸ್, ದೇವ್ ನ್ಹಂಯ್, ದೆಕುನ್ ಆಮಿ ಸಕ್ಡಾಂ ಚೂಕ್ ಕರ್ತಾಂವ್ ಪೂಣ್ ದೆವಾನ್ ಆಮ್ಚೊ ಇತ್ಲೊ ಮೋಗ್ ಕೆಲಾಕಿ, ತಾಚ್ಯಾ ಎಕ್ಲ್ಯಾಚ್ ಪುತಾಕ್ ಆಮ್ಚೆ ಖಾತಿರ್ ಖುರ್ಸಾರ್ ಬಲಿ ದಿಲಾ ಆನಿ ತಾಚ್ಯಾ ವಿಶೇಸ್ ಮೊಗಾಚ್ಯಾ ಬಳಾನ್ ಆಮಿ ಸರ್ವ್ ಆಮ್ಚ್ಯಾ ಪಾತ್ಕಾಂತ್ಲೆಂ ಭಾಯ್ರ್ ಯೇಂವ್ಕ್ ಸಾಧ್ಯ್ ಆಸಾ. ತ್ಯಾ ದೆಕುನ್ ಆಮಿ ಸದಾಂ ಭರ್ವಸಿ ಆನಿ ಧಯ್ರಾನ್ ಭರ್‍ಲ್ಲೆ ಜಾವ್ನ್ ಜಿಯೆವ್ನ್ ಹರ್ಯೆಕ್ ಘಡಿ ನವ್ಯಾ ಜಿವಾನ್ ಭರುನ್ ಸ್ವೀಕಾರ್ ಕೆಲಿ ತರ್, ಆನಿ ಪೆಲ್ಯಾಚ್ಯಾ ಸೆವೆಂತ್ ಆನಿ ಬರೆಪಣಾಂತ್ ಕಾರ್ಯಾಳ್ ಜಾಲ್ಯಾಂವ್ ತರ್ ತೆಂಚ್ ಸದಾಂಚೆಂ ಸಾಂತಿಪಣ್.

ಈ. ಫಕತ್ ಸಾಂತ್ ಭಕ್ತಾಂಚೊ ಆಧಾರ್ ಪುರೊಗಿ?

ಆಮ್ಕಾಂ ಆಮ್ಚ್ಯಾ ಸದಾಂದಿಸಾಚ್ಯಾ ವಾವ್ರಾಂತ್, ಕಷ್ಟವಾಂವ್ಟಿಂತ್ ಆನಿ ಪಿಡೆಶಿಡೆಂತ್ ಸಾಂತ್ ಭಕ್ತಾಂಚೊ ಆಧಾರ್ ಗರ್ಜ್ ಆಸಾ. ಪೂಣ್ ಯಶಸ್ವೆಕ್ ತೆಂ ಮಾತ್ರ್ ಪಾವನಾ. ದೆವಾಚ್ಯಾ ಉತ್ರಾಚೊ ನಿರಂತರ್ ನಿಯಾಳ್ ಆನಿ ತೆಂ ಸ್ವೀಕಾರ್ ಕರ್ನ್ ಜಿಯೆಂವ್ಚೆಂ ಗರ್ಜೆಚೆಂ. ಸಾಕ್ರಾಮೆಂತಾಂತ್ ಆಸ್ಚ್ಯಾ ಜೆಜುಸವೆಂ ಎಕ್ವಟ್ಚೆಂ ಆನಿ ತಾಚ್ಯಾ ಮೊಗಾ ಖಾತಿರ್ ಪೆಲ್ಯಾಚೊ ಖರೊ ಮೋಗ್ ಕರ್ನ್ ತೊ ಮೋಗ್ ಕಾರ್ಯಾಳ್ ಕರ್ಚ್ಯೊ ಕರ್ನ್ಯೊ ಕರ್ಚೆಂಯ್ ಗರ್ಜೆಚೆಂ.

ಪಿಡೆವೆಳಿಂ ಮಾಗ್ಣ್ಯಾಚಿ ಗರ್ಜ್ ಆಸಾ ತಶೆಂಸ್ ಜೊಕ್ತ್ಯಾ ವಯ್ಜಾಚೆಂ ವೊಕಾತ್‍ಯಿ ಕರಿಜೆ. ಮಾಗ್ಣೆ ಆಮ್ಚೆ ಥಂಯ್ ಧನಾತ್ಮಕ್ ಸಕತ್ ಭರ್ತಾ ಆನಿ ಪಿಡೆ ವಿರೊದ್ ಝುಜ್ಚಿ ತಾಂಕ್ ಭರ್ತಾ ತ್ಯಾ ಸವೆಂ ಸಾರ್ಕಿಂ ವೊಕ್ತಾಂ ಘೆನಾಶೆಂ ರಾವ್ಲ್ಯಾರ್ ತಿ ಸಕತ್ ಫಳಾಭರಿತ್ ಜಾಂವ್ಚಿ ನಾ. ತಶೆಂಸ್ ಆಮ್ಚೆರ್ ಆನ್ವಾರಾಂ ಆಯಿಲ್ಲೆ ವೆಳಿಂ ಮಾಗ್ಣ್ಯಾ ಸವೆಂ ತಿಂ ಆನ್ವಾರಾಂ ಫುಡ್ ಕರ್ನ್ ಝುಜುಂಕ್‍ಯಿ ಆಮಿ ಜೊಕ್ತೆಂ ಕ್ರಮ್ ಘೆಜೆ.

ಉ. ಸಾಂತಿಪಣಾಕ್ ಆನಿ ಕಥೊಲಿಕ್ ಸದಾಂ ಜಿವಿತಾಕ್ ದೋನ್ ಭೋವ್ ಮಹತ್ವಾಚ್ಯೊ ಗಜಾಲಿ:

ದೆವಾಚೊ ಪೂತ್ ಮನಿಸ್ ಜಾಲೊ ಆನಿ ತಾಣೆ ನಿಮಾಣ್ಯಾ ಬ್ರೇಸ್ತಾರಾ ಆಪ್ಣಾಕ್‍ಚ್ ಮೊಡುನ್ ಉಂಡ್ಯಾ ರುಪಾರ್ ಆಪ್ಲ್ಯಾ ಶಿಸಾಂಕ್ ದಿಲೊ. ಭೋವ್ ಪವಿತ್ರ್ ಎವ್ಕರಿಸ್ತ್ ತಾಣೆ ಸಂಸ್ಥಾಪಿತ್ ಕೆಲೊ ಆನಿ ತ್ಯಾ ದೀಸ್ ಥಾವ್ನ್ ಆಜ್‍ಪರ್ಯಾಂತ್ ಕೊರೊಡೊ ಲೋಕ್ ಸೊಮ್ಯಾಚ್ಯಾ ಜೆವ್ಣಾಂತ್ ಭಾಗಿದಾರ್ ಜಾವ್ನ್ ಸೊಮ್ಯಾಕ್ ಸೆವ್ತಾ. ಪವಿತ್ರ್ ಮಿಸಾಂತ್ ಎಕ್ವಟುನ್ ಪವಿತ್ರ್ ಎವ್ಕರಿಸ್ತ್ ಸೆವ್ತಾನಾ ಆಮ್ಕಾಂ ವರ್ತಿ ಧಾದೊಸ್ಕಾಯ್ ಆನಿ ಅತ್ಮೀಕ್ ಸಂತೊಸ್ ಲಾಭ್ತಾ ಮಾತ್ರ್ ನ್ಹಂಯ್ ವರ್ತಿ ಸಕತ್ ಲಾಭ್ತಾ. ದೆಕುನ್ ಆಮಿ ಸದಾಂದೀಸ್ ಪವಿತ್ರ್ ಎವ್ಕರಿಸ್ತಾಂತ್ ಭಾಗಿದಾರ್ ಜಾಂವ್ಚೆಂ ಗರ್ಜೆಚೆಂ.

ದೆವಾಚೊ ಸಬ್ಧ್ ಮನಿಸ್ ಜಾಲೊ ಆನಿ ದೆವಾಚ್ಯಾ ಉತ್ರಾಚೆರ್ ಸಗ್ಳ್ಯಾ ಸೃಷ್ಟೆಚಿ ಮಾಂಡಾವಳ್ ಹೊಂದ್ವುನ್ ರಾವ್ಲ್ಯಾ ದೆಕುನ್ ದೆವಾಚೊ ಸಬ್ಧ್‍ಚ್ ಖರ್ಯಾ ದೆವಾಚೆಂ ಆಯ್ಕೊಪಿ ಸುರುಪ್. ಆಶೆಂ ಎವ್ಕರಿಸ್ತಾಂತ್ ಆಮಿ ನಿಜಾ ದೆವಾಕ್ ದೆಕ್ತಾಂವ್ ಆನಿ ಸೆವ್ತಾಂವ್ ತಶೆಂಸ್ ಪವಿತ್ರ್ ಪುಸ್ತಕಾ ಧ್ವಾರಿಂ ನಿಜಾ ದೆವಾಕ್ ಆಯ್ಕಾತಾಂವ್ ಆನಿ ಸ್ವೀಕಾರ್ ಕರ್ತಾಂವ್. ತ್ಯಾ ದೆಕುನ್ ಆಮಿ ಚಡ್ ಆನಿ ಚಡ್ ವೇಳ್ ಪವಿತ್ರ್ ಪುಸ್ತಕ್ ವಾಚುಂಕ್ ಆನಿ ನಿಯಾಳುಂಕ್ ದವರಿಜೆ. ಪವಿತ್ರ್ ಎವ್ಕರಿಸ್ತಾಕ್ ಆನಿ ಪವಿತ್ರ್ ಪುಸ್ತಕಾಕ್ ಸಮಾಸಮಿ ಭೋವ್ ವರ್ತೊ ಮಾನ್ ದಾಕೊಂವ್ಚೆಂ ಆಮ್ಕಾಂ ಗರ್ಜೆಚೆಂ.

ಧಾರ್ಮಿಕ್ಪಣಾಚೆಂ ಆನಿ ಭಕ್ತೆಚೆಂ ಆಮಾಲ್ ವಾಡೊವ್ನ್ ಘೆಂವ್ಚೆಂ ಜಾಂವ್, ಮತಾಂದ್ಳೆಂಪಣ್, ಧಾರ್ಮಿಕ್ ಅತಿರೇಕ್ ಪ್ರದರ್ಶನ್ ಕರ್ಚೆಂ ಜಾಂವ್ ಕಥೊಲಿಕಾಂಕ್ ಸಹಜ್ ಜಾಲ್ಲೆಂ ನ್ಹಂಯ್. ಕಿತ್ಯಾಕ್ ಖರೊ ಕಥೊಲಿಕ್ ಏಕ್ ಆಧ್ಯಾತ್ಮಿಕ್ ವೆಕ್ತಿ. ತೊ ದೆವಾಸಾಂವ್ ಆದಾರ್ತಾ, ಭಕ್ತ್ ಆನಿ ಆರಾಧಾನ್ ಕರ್ತಾ ಪೂಣ್ ಸೊಮ್ಯಾನ್ ಸಾಂಗ್‍ಲ್ಲೆ ಪರಿಂ ‘ಸೊಮ್ಯಾ ಸೊಮ್ಯಾ ಮ್ಹಣ್ ಬೊಬೊ ಮಾರ್ತಾತ್ ತಾಂಕಾಂ ಸೊಮಿ ವಳ್ಕುನ್ ನೆಣಾ...’, ಮ್ಹಳ್ಳೆಂ ತೊ ಜಾಣಾ. ‘ಜೊ ಕೋಣ್ ಸೊಮ್ಯಾಚ್ಯಾ ನಾಂವಿ ಗರ್ಜೆವಂತಾಕ್ ಏಕ್ ಕೊಪ್ ಶೆಳೆಂ ಉದಕ್ ದಿತಾ ತಾಕಾ ಸರ್ಗಿಂ ರಾಜಾಂತ್ ವಾಂಟೊ ಪಯ್ಲೊ ಆಸಾ ಮ್ಹಳ್ಳೆಂಯ್...’ ತೊ ಜಾಣಾ. ದೆಕುನ್ ಖರೊ ಕಥೊಲಿಕ್ ಆಪ್ಲ್ಯಾ ಮಾಗ್ಣ್ಯಾ ವೆಳಿಂ ‘ಲೊಕಾಂ ಮುಕಾರ್ ಭಕ್ತಿಕ್ ಕರ್ನ್ಯೊ ಕರುಂಕ್ ವಚಾನಾ, ದಾನ್‍ಧರ್ಮ್ ಕರ್ತಾನಾ ಆಪ್ಣಾ ಮುಕಾರ್ ಕೋಂಬ್ ಫುಂಕಿನಾ, ಬಗಾರ್, ಭಿತರ್ಲ್ಯಾ ಕುಡಾಂತ್ ರಿಗುನ್, ದಾರ್ ಧಾಂಪುನ್, ಗುಪಿತ್ ಆಸ್ಚ್ಯಾ ಆಪ್ಲ್ಯಾ ಬಾಪಾಲಾಗಿಂ ಘುಟಾನ್ ಸಂವಾದ್ ಚಲಯ್ತಾ, ತೆಂಚ್ ತಾಚೆಂ ಮಾಗ್ಣೆ..’

ಊ. ಸಾಂತ್ ನಮಯಾರ್ಚಿ ಪ್ರಕ್ರಿಯಾ

ಖಂಚ್ಯಾಯ್ ವೆಕ್ತಿನ್ ಆಪ್ಲ್ಯಾ ಜಿವಿತಾಂತ್ ವರ್ತಿಂ ಕಾಮಾ ಕೆಲಿಂ ಆನಿ ಜಿವಿತಾಚ್ಯಾ ಹರ್ಯೆಕಾ ಶೆತಾಂತ್ ದೆಕಿವಂತ್ಪಣ್ ದಾಕಯ್ಲೆಂ ತರ್ ಆನಿ ತಾಚೆ ಧ್ವಾರಿಂ ಸೊಮ್ಯಾಕ್ ಉಗ್ಡಾಪೆಂ ಕರುಂಕ್ ಜಾಲೆಂ ತರ್. ತಾಚೆ ಥಾವ್ನ್ ಉಪ್ಕಾರ್ ಜೊಡ್ಲಲೆ ಆನಿ ತಾಚೆ ಥಂಯ್ ಬರೆಂಪಣ್ ಭೊಗ್ಲಲೆ ಮನಿಸ್ ತಾಚೆಂ ನಾಂವ್ ಸದಾಂ ಉಗ್ಡಾಸಾಂತ್ ದವರ್ತಾತ್. ಆನಿ ತಾಕಾ ಸಾಂತ್ ಮಾಂದುಂಕ್ ಇಗರ್ಜ್‍ಮಾತಾ ಆಪೇಕ್ಷಿತಾ. ತರಿ ತಸಲ್ಯಾ ಮನ್ಶಾಚ್ಯಾ ಮೊರ್ಣಾಚ್ಯಾ ಪಾಂಚ್ ವರ್ಸಾಂ ಪರ್ಯಾಂತ್ ತಾಕಾ ಸಂಸ್ಮರುಂಚಿ ಕಸಲಿಚ್ ಅಧಿಕೃತ್ ರಾಟಾವಳ್ ಸುರ್ವಾತುಂಕ್ ಜಾಯ್ನಾ. ಹಿ ಪಾಂಚ್ ವರ್ಸಾಂಚಿ ರಾಕೊವ್ಣಿ ಮನ್ಶಾಂಕ್ ಪಾಂಚ್ ವರ್ಸಾಂ ಉಪ್ರಾಂತ್‍ಯಿ ಹ್ಯಾ ಮನ್ಶಾಚೆಂ ಮಹತ್ವ್ ಆನಿ ದೆಕಿವಂತ್ಪಣ್ ಪ್ರಸ್ತುತ್ ಆನಿ ಉಗ್ಡಾಸಾಂತ್ ಉರ್ಚೆ ತಸಲೆಂ ಆಸ್ತಾಗಿ ಪಳಂವ್ಚ್ಯಾ ಉದ್ದೇಶಾಚಿ. ಪೂಣ್ ಆಯಿನ್ನ್ ಕಾರಣಾ ಆಸ್ಲ್ಯಾರ್ ಹಿ ರಾಕೊವ್ಣೆಚಿ ಅವ್ದಿ ಉಣಿ ಕರುಂಯೆತಾ. (ಮದರ್ ತೆರೆಸಾಕ್ ಹಿ ರಾಕೊವ್ಣೆ ಅವ್ದಿ ಫಕ್ತ್ 3 ವರ್ಸಾಂ ಕೆಲಿ ತರ್ ಜುವಾಂವ್ ಪಾವ್ಲ್ ದುಸ್ರ್ಯಾಕ್ ಹಿ ಅವ್ದಿ ಕಾಂಯ್‍ಚ್ ದವರ್ಲಿ ನಾ)

ರಾಕೊವ್ಣೆಚಿ ಅವ್ದಿ ಮುಗ್ದಾತಚ್ ದಿಯೆಸೆಜಿಚೊ ಬಿಸ್ಪ್ ತ್ಯಾ ವೆಕ್ತಿಚೆ ವಿವರ್ ಭಾಗೆವಂತ್ ಸದ್ರೆಕ್ (ಪಾಪಾಕ್) ಧಾಡ್ತಾ ಆನಿ ತ್ಯಾ ವೆಕ್ತಿಕ್ ಸಾಂತ್ ಮಾಖ್ಣೆಚಿ ಪ್ರಕ್ರಿಯಾ (ಕೊಜ್) ಸುರ್ವಾತುಂಕ್ ಪರ್ವಣ್ಗಿ ಮಾಗ್ತಾ. ಪಾಪಾ ರೊಮಾಂತ್ಲ್ಯಾ ಭಾಗೆವಂತ್ ಇಗರ್ಜ್‍ಮಾತೆಚ್ಯಾ ವಿವಿಧ್ ಧಪ್ತರಾಂ (ಚಡ್ ಕರ್ನ್ ಭಾವಾಡ್ತಾಚ್ಯಾ ದೊತೊರ್ನೆಚ್ಯಾ ಧಪ್ತರಾ) ಥಾವ್ನ್ ಅಡ್ಕಳಿ ಕಿತೆಂ ಆಸಾತ್ ವಾ ನಾ ಹ್ಯಾ ವಿಶಿಂ ವರ್ದಿ ಘೆವ್ನ್ ಕಸ್ಲ್ಯೊಚ್ ಅಡ್ಕಳಿ ನಾಂತ್ ತರ್ ‘ನಿಹಿಲ್ ಒಬ್‍ಸ್ತಾತ್’ (ನಾ ಅಡ್ಕಳ್) ಮ್ಹಣುನ್ ಗರ್ಜೆಚಿ ಪ್ರಕ್ರಿಯಾ ಸುರ್ವಾತುಂಕ್ ಮಂಜೂರಿ ದಿತಾ. ತ್ಯಾ ವೆಳಾ ಥಾವ್ನ್ ತಾಕಾ ‘ದೆವಾಚೊ ಸೆವಕ್’ ಮ್ಹಣುನ್ ಆಪಯ್ತಾತ್. ಹ್ಯಾ ವಿಶಿಂ ತ್ಯಾ ದಿಯೆಸೆಜಿಚ್ಯಾ ಬಿಸ್ಪಾನ್ ಆಪ್ಲ್ಯಾ ಲೊಕಾಕ್ ಪರ್ಗಟ್ಣಿ ಅಧಿಕೃತ್ ರಿತಿನ್ ದೀಂವ್ಕ್ ಆಸಾ. ದೆವಾಚೊ ಸೆವಕ್ ಮ್ಹಣ್ಚಿ ಪರ್ಗಟ್ಣಿ ಜಾತಚ್ ದಿಯೆಸೆಜಿಂತ್ ಟ್ರಿಬ್ಯೂನಲ್ ಸುರ್ವಾತ್ತಾ. ಹ್ಯಾ ಹಂತಾಕ್ ‘ದೊಕುಮೆಂತಾರಿ’ ವಾ ‘ಇನ್‍ಫರ್ಮೆಟಿವ್’ ಹಂತ್ ಮ್ಹಣ್ತಾತ್. ಹಾಂಗಾಸರ್ ಕೊಜ್ ಚಲಂವ್ಕ್ ‘ಪೊಸ್ತುಲೇತರ್’ ನೆಮ್ತಾತ್. ಪೊಸ್ತುಲೇತರ್ ಆನಿ ತಾಚಿಂ ಸಹಾಯಕಾಂ ತ್ಯಾ ವೆಕ್ತಿ ವಿಶಿಂ ಸಂಪೂರ್ಣ್ ವಿವರ್, ತಾಚ್ಯಾ ಮದ್ಯಸ್ಥೆನ್ ಘಡ್‍ಲ್ಲಿಂ ಅಜಾಪಾಂ, ತಾಚೆಂ ಸಾಹಿತ್, ಆನಿ ಹೆರ್ ಕಿತೆಂ ಆಸಾ ತೆಂ ಸಕ್ಕಡ್ ಎಕ್ಟಾಂಯ್ ಕರ್ನ್, ಪರಿಶೀಲನ್ ಕರ್ಚೆಂ ಕಾಮ್ ಕರ್ತಾತ್. ನಿಮ್ಣೆ ದಿಯೆಸೆಜಿಚಿ ಟ್ರಿಬ್ಯೂನಲ್ ತ್ಯಾ ವೆಕ್ತಿನ್ ಕ್ರಿಸ್ತಾಕ್ ಬಳಾಧಿಕ್‍ಪಣಿ ಸಾಕ್ಸ್ ದಿಲ್ಯಾ ವಾ ನಾ ಮ್ಹಳ್ಳೆವಿಶಿಂ ಆಪ್ಲೆಂ ತೀರ್ಪ್ ದೀವ್ನ್ ಭಾಗೆವಂತ್ ಇಗರ್ಜ್‍ಮಾತೆಚ್ಯಾ ಸಾಂತಾಂ ಖಾತಿರ್ ಆಸ್ಚ್ಯಾ ಪವಿತ್ರ್ ಧಪ್ತರಾಕ್ ಆಪ್ಲೊ ನಿರ್ಣಯ್ (ಎಕ್ತಾ) ಸರ್ವ್ ದಾಕ್ಲ್ಯಾಂ ಸವೆಂ ಧಾಡುನ್ ದಿತಾ.

ಪ್ರಕ್ರಿಯೆಚಿಂ (ಕೊಜ್) ಮುಕ್ಲಿಂ ಹಂತಾಂ ಸಾಂತಾಂ ಖಾತಿರ್ ಆಸ್ಚ್ಯಾ ಪವಿತ್ರ್ ಧಪ್ತರಾಚ್ಯಾ ನಿಯಂತ್ರಣಾ ಖಾಲ್ ಚಲ್ತಾತ್. ಹಾಂಗಾಸರ್ ‘ರಿಲೇಟರ್ಸ್’ ನೇಮಕ್ ಜಾತಾತ್ ಆನಿ ತೆ ದಿಯೆಸೆಜಿ ಥಾವ್ನ್ ಆಯಿಲ್ಲ್ಯಾ ಎಕ್ತಾಚೆಂ ಜೊಕ್ತೆಂ ಪರಿಶೀಲನ್ ಸುರ್ವಾತ್ತಾತ್. ತ್ಯಾ ದೆವಾಚ್ಯಾ ಸೆವಾಕಾಚ್ಯಾ ಜಿಣ್ಯೆ ಆನಿ ಕರ್ನೆಂಚೆ ವಿವರ್ ಆನಿ ತಾಚೆಂ ಪರಿಶೀಲನ್ ಆನಿ ಮಂಡನ್ ಖರ್ಯಾ ಸ್ಪಿರಿತಾನ್ ಜಾಲಾಂ ಮ್ಹಣ್ಚೆಂ ತೆ ಧಪ್ತರಾನ್ ನಮಿಯಾರ್ಲಲ್ಯಾ ದೇವ್‍ಶಾಸ್ತ್ರಿಂ ಸವೆಂ ಮೆಳುನ್ ವಿಮರ್ಶನ್ (ಪೊಸೀಶಿಯೊ) ಕರ್ತಾತ್. ಪೊಸೀಶಿಯೊ ಜೊಕ್ತ್ಯಾನ್ ಜಾಲ್ಯಾ ಉಪ್ರಾಂತ್ ಪ್ರಕ್ರಿಯಾ ಮುಂದರುಯೆತಾ ವಾ ನಾ ಮ್ಹಣ್ಚೆಂ ಹೆ ದೇವ್‍ಶಾಸ್ತ್ರಿ ಮತ್ ದೀವ್ನ್ ಠರಯ್ತಾತ್. ಆಪ್ಲ್ಯಾ ಮತಾಂ ಸವೆಂ ದೇವ್‍ಶಾಸ್ತ್ರಿಂಚಿ ವರ್ದಿ ಧಪ್ತರಾಕ್ ಪಾಟಿಂ ಧಾಡ್ತಾತ್. ಥಂಯ್ಸರ್ ಇಗರ್ಜ್‍ಮಾತೆಚ್ಯಾ ಸಾಂತಾಂ ಖಾತಿರ್ ಆಸ್ಚೆ ಪವಿತ್ರ್ ಧಪ್ತರಿ (ಅಧಿಕಾರಿ) ಆಪ್ಲೆಂ ಅಧ್ಯಯನ್ ಚಲವ್ನ್ ಹೊ ಕೊಜ್ ಜಿವೊ ದವರ್ಚೊ ವಾ ಸಂಪಂವ್ಚೊ ನಿರ್ಣಯ್ ಘೆತಾತ್. ಹ್ಯಾ ವೆಳಿಂ ಕೊಜ್ ಜಿವೊ ಉರಂವ್ಚೊ ಆನಿ ದೆವಾಚ್ಯಾ ಸೆವಕಾಕ್ ಸಾಂತಿಪಣಾಚೊ ಕುರೊವ್ ಮೆಳ್ಚೊ ಅವ್ಕಾಸ್ ಆಸಾ ಮ್ಹಣುನ್ ಜಾಲೆಂ ತರ್ ವರ್ದಿ ಭಾಗೆವಂತ್ ಬಾಪಾಕ್ ಪಾವ್ತಾ. ಪಾಪಾ ತಾಣೆ ಕ್ರಿಸ್ತಾಕ್ ಆನಿ ತಾಚ್ಯಾ ಇಗರ್ಜ್‍ಮಾತೆಕ್ ಫಾಂಕಿವಂತ್, ದೆಕಿವಂತ್ ತಶೆಂಸ್ ಧಯ್ರಾಧಿಕ್ ಸೆವಾ ದಿಲ್ಯಾ ಮ್ಹಣುನ್ ಮಾನುನು ಘೆತಾ ಆನಿ ತಾಕಾ ಮಾನೆವಂತ್ (ವೆನೆರೇಬಲ್/ಪುನೆವಂತ್/ಮುಕ್ತಿವಂತ್) ಮ್ಹಣುನ್ ಪರ್ಗಟ್ತಾ.

ಮುಕ್ಲೊ ಹಂತ್ ಆಸಾ ಭಾಗೆವಂತ್ ಪರ್ಗಟ್ಣೆಚೊ (ಬಿಎತಿಫಿಕಾಸಾಂವ್/ ಭಿಎಟಿಫಿಕೇಶನ್) ಹ್ಯಾ ಮುಕ್ತಿವಂತಾಚ್ಯಾ ಮಜತಿನ್ ಲಾಭ್‍ಲ್ಲೆಂ ಏಕ್‍ಪುಣಿ ಅಜಾಪ್ ಹಾಂಗಾ ಗರ್ಜೆಚೆಂ ಜಾತಾ. ತೊ ದೆವಾ ಸವೆಂ ಆಸುನ್ ಆಮ್ಚೆ ಖಾತಿರ್ ಪರಾತ್ತುನ್ ಆಸಾ ಮ್ಹಣ್ಚ್ಯಾಕ್ ಹಿ ರುಜ್ವಾತ್ ಗರ್ಜ್ ಜಾತಾ. ಖಂಚ್ಯಾ ದಿಯೆಸಿಜಿಂತ್ ಹೆಂ ಅಜಾಪ್ ಘಡ್ಲೆಂ ಮ್ಹಣುನ್ ವರ್ದಿ ಜಾತಾಗಿ ತ್ಯಾ ದಿಯೆಸಿಜಿಂತ್‍ಚ್ ತನ್ಖೆ ಟ್ರಿಬ್ಯೂನಲ್ ರಚುನ್ ಹೆಂ ಅಜಾಪ್ ಖರೆಂ ಆನಿ ಸ್ವಾಭಾವಿಕ್, ಪ್ರಾಕೃತಿಕ್ ಆನಿ ವಯ್‍ಜ್ಞಾನಿಕ್ ಕಾರಣಾಂಕ್ ಮಿಕ್ವಾಲ್ಲೆಂ, ದಯ್ವಿಕ್ ಸಕ್ತೆನ್ ಮಾತ್ರ್ ಘಡ್ಯೆತ್ ಜಾಲ್ಲೆಂ ಆನಿ ಉಲ್ಲೇಖಿತ್ ದೆವಾಚ್ಯಾ ಸೆವಕಾಚ್ಯಾ ಮಧ್ಯಸ್ಥೆನ್ ಜಾಲ್ಲೆಂ ಮ್ಹಣುನ್ ತಾಣಿ ದಾಕಲ್ ಕರಿಜೆ. ತವಳ್ ಮಾತ್ರ್ ಹೆಂ ಅಜಾಪ್ ಇಗರ್ಜ್‍ಮಾತಾ ಮಾನುನ್ ಘೆತಾ. ದೇವ್‍ಶಾಸ್ತ್ರಿ ಆನಿ ವಿಜ್ಞಾನಾಚೆ ಪಂಡಿತ್ ಆಸ್ಚ್ಯಾ ಹ್ಯಾ ಟ್ರಿಬ್ಯೂನಲಾಚೆ ವಿವರ್ ಪವಿತ್ರ್ ಸದ್ರೆಕ್ (ಪಾಪಾಕ್) ಧಾಡುನ್ ದಿತಾತ್. ಮಾಡ್ತಿರ್ಪಣಾ ಆನಿ ರಗ್ತಾಸಾಕ್ಷೆಂಚ್ಯಾ ಸಂದರ್ಭಾರ್ ಹೆಂ ಅಜಾಪಾಂಚೆಂ ನೇಮ್ ಗರ್ಜೆಂತ್ ಘೆನಾಂತ್.

ಪವಿತ್ರ್ ಸದ್ರ್ ಜೆನ್ನಾ ತ್ಯಾ ಅಜಾಪಾಂಕ್ ಮಾನುನ್ ಘೆತಾ ತೆನ್ನಾ ತ್ಯಾ ಮಾನಾಪಾತ್ರಾಕ್ ದೆವಾಚ್ಯಾ ಸೆವಕಾಕ್ ಭಾಗೆವಂತ್ ಪಾಸಾರುಂಕ್ ವಾಟ್ ಉಗ್ತಿ ಜಾತಾ. ಆನಿ ಎಕಾ ನಮ್ಯಾರ್ಲಲ್ಯಾ ದಿಸಾ ತಾಕಾ ಭಾಗೆವಂತ್ ಪಾಸಾರ್ತಾತ್. ಭಾಗೆವಂತಾಕ್ ಆಲ್ತಾರಿಚೊ ಮಾನ್ ಆನಿ ಜೆರಾಲ್ ಲಿತುರ್ಜಿ ಮಾಂಡಾವಳಿಂತ್ ಸ್ಥಾನ್ ಮೆಳ್ತಾ. (ಭಾಗೆವಂತಾಂಕ್ ಉಗ್ತ್ಯಾನ್ ಮಾನ್ ಕರ್ಚೊ ಸಗ್ಳ್ಯಾ ಸಂಸಾರಾಕ್ ಎಕಾಚ್ ವೆಳಾ ಪಾಸಾರ್ನಾ, ತಾಕಾ ನಿರ್ಬಂಧ್ ಆಸಾತ್)

ಭಾಗೆವಂತಾಕ್ ಸಾಂತ್ ಮ್ಹಣುನ್ ಪಾಸಾರುಂಕ್ ತಾಚ್ಯೆ ಥಾವ್ನ್ ಆನ್ಯೇಕ್ ಅಜಾಪ್ ಜಾಂವ್ಚಿ ಗರ್ಜ್ ಆಸಾ. ಹ್ಯಾ ಪಾವ್ಟಿಂ ದಿಯೆಸಿಜಿಚ್ಯಾ ಅಧ್ಯಯನಾ ಉಪ್ರಾಂತ್ ತ್ಯಾ ಅಜಾಪಾ ವಿಶಿಂ ಸಾಂತಾಂ ಖಾತಿರ್ ಆಸ್ಚ್ಯಾ ಪವಿತ್ರ್ ಧಪ್ತರಾಚಿ ದೇವ್‍ಶಾಸ್ತ್ರಿಂ ಆನಿ ವಿಜ್ಞಾನ್ಯಾಂಚಿ ಮಂಡಳಿ ತ್ಯಾ ವಿಶಿಂ ಗುಂಡಾಯೆನ್ ಅಧ್ಯಯನ್ ಕರ್ತಾ. ಆನಿ ನಿಮಾಣೆ ಹಿ ಮಂಡಳಿ ಆಪ್ಲೊ ನಿರ್ಣಯ್ ಭಾಗೆವಂತ್ ಬಾಪಾಕ್ ಕಳಯ್ತಾ. ಭಾಗೆವಂತ್ ಬಾಪಾನ್ ತೆಂ ಅಜಾಪ್ ಒಪುನ್ ಘೆತ್ಲ್ಯಾ ಉಪ್ರಾಂತ್ ನಮ್ಯಾರ್ಲಲ್ಯಾ ದಿಸಾ ತಾಕಾ ಕ್ರಿಸ್ತಾಸವೆಂ ಸರ್ಗಾರಾಜಾಂತ್ ಆಸ್ಚೊ ವೆಕ್ತಿ, ದೆಕಿವಂತ್ ಆನಿ ಜಾಗತಿಕ್ ಇಗರ್ಜ್‍ಮಾತೆಕ್ ಏಕ್ ಮಧ್ಯಸ್ಥಿದಾರ್ ಮ್ಹಣುನ್ ಕಳಯ್ತಾ. ತಾಣೆ ಸರ್ಗಾರಾಜಾಂತ್ ಪ್ರವೇಸ್ ಘೆತ್ಲಲೊ ದೀಸ್ ತಾಚ್ಯಾ ಫೆಸ್ತಾಚೊ ದೀಸ್ ಜಾತಾ ಆನಿ ತೊ ಅಖ್ಖ್ಯಾ ಸಂಸ್ರಾರ್ ಪ್ರಭಾವ್ ಘಾಲ್ಚೆ ತಸ್ಲೊ ತರ್ ತಾಚೆಂ ಫೆಸ್ತ್ ಇಗರ್ಜ್‍ಮಾತೆಚ್ಯಾ ಪ್ರದಾನ್ ಫೆಸ್ತಾಂಚೆ ತಾರ್ಕೆ ಪಟ್ಟೆರ್ ಜಾಗೊ ಘೆತಾ. ಪವಿತ್ರ್ ಸಭೆಚ್ಯಾ ಸಾಂತ್ ನಮ್ಯಾರ್ಚ್ಯಾ ಪ್ರಕ್ರಿಯೆಕ್ ಕನೊನಯ್ಜೇಶನ್ ಮ್ಹಣ್ತಾತ್. ಹಾಂಗಾಸರ್ ಕ್ಯಾನನ್ ಮ್ಹಣ್ತಾನಾ ಸಾಂತಾಂಚಿ ಯಾದಿ ಮ್ಹಣ್ ಅರ್ತ್. ತ್ಯಾ ದೆಕುನ್ ಕನೊನಯ್ಜೇಶನ್ ಮ್ಹಳ್ಯಾರ್ ಸಾಂತಾಂಚ್ಯಾ ಪಟ್ಟೆರ್ ನಾಂವ್ ದಾಕಲ್ ಕರಪ್ ಮ್ಹಣ್ಚೊ ಅರ್ತ್ ಹಾಂಗಾ ಘೆಜೆ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016