Articles / Special

ಸಾಂತ್ ಕುರಿಯಾಕೊಸ್ ಎಲಿಯಾಸ್ ಚಾವಾರಾ

ಯಾದ್ : ಜನೆರ್ 3

St Kuriakose Elias Chavara (Photo : Public Domain)

ಕುರಿಯಾಕೋಸ್ ಚಾವಾರಾ ಏಕ್ ವರ್ತೊ ಸಮಾಜ್ ಸುಧಾರಕ್ ಪಾದ್ರಿ. ಸಿರೋ ಮಲಬಾರ್ ಇಗರ್ಜ್‍ಮಾತೆಂತ್ ಕಥೊಲಿಕ್ ಭಕ್ತಿಪಣ್ ಗುಂಡಾಯೆನ್ ವಾಡೊಂವ್ಕ್ ವರ್ತ್ಯಾನ್ ವಾವ್ರ್ ಕೆಲ್ಲೊ ಮಾತ್ರ್ ನ್ಹಂಯ್ ಥಂಯ್‍ಥಾವ್ನ್ ವರ್ತ್ಯಾ ಮಾಪಾನ್ ದೇವ್ ಆಪೊವ್ಣಿ ವಾಡೊಂವ್ಚೆ ಖಾತಿರ್ ತೊ ಪೆಚಾಡ್ಲೊ. ನವೊ ಧರ್ಮ್‍ಮೇಳ್ (ಸಿಎಮ್‍ಆಯ್) ತಾಣೆ ದಾದ್ಲ್ಯಾಂ ಖಾತಿರ್ ಘಡ್ಲೊ.

1805 ಚ್ಯಾ ಫೆಬ್ರೆರ್ 2 ವೆರ್ ತೊ ಇಕೊ ಕುರಿಯಕೋಸ್ ಚಾವಾರಾ ಆನಿ ಮರಿಯಮ್ ತೊಪ್ಪಿಲ್ ಹಾಂಚ್ಯಾ ನಸ್ರಾಣಿ (ಸಾಂತ್ ತೊಮಾಸ್) ಕ್ರಿಸ್ತಾಂವಾಂಚ್ಯಾ ಕುಟ್ಮಾಂತ್ ಕೇರಳಾಚ್ಯಾ ಕಯ್ನಕರಿಂತ್ ಜನ್ಮಾಲೊ. 1818 ಇಸ್ವೆಂತ್ ಪಲ್ಲಿಪುರಮ್ ಸೆಮಿನರಿಕ್ ರಿಗ್‍ಲ್ಲ್ಯಾ ತಾಕಾ 29-11-1829 ವೆರ್ ಓಡ್ದ್ ಮೆಳ್ಳಿ. ಆಪ್ಲ್ಯಾ ತರ್ನ್ಯಾ ಪ್ರಾಯೆರ್‍ಚ್ ಭಾಗೆವಂತ್‍ಪಣಾಚಿ ಆನಿ ಮಾಗ್ಣ್ಯಾಚಿ ಜೀಣ್ ತಾಕಾ ಆಕರ್ಶಿತ್ ಕರ್ತಾಲಿ. ದೆಕುನ್ ಓಡ್ದ್ ಮೆಳ್‍ಲ್ಲೆಂಚ್ ತಾಣೆ ಕಾರ್ಮೆಲಿತ್ ತಿಸ್ರ್ಯಾ ಓಡ್ದಿಚ್ಯಾ ರುಪಾನ್ ಮನ್ನಾನಮ್ ಮ್ಹಣ್ಚೆಥಂಯ್ ಖತಾವಿಣ್ ಗರ್ಭಿಸಂಭವಾಚ್ಯಾ ಸೆವಕಾಂಚೊ ಮೊಠ್ ಸುರ್ವಾತುನ್ ಸುಮಾರ್ ಧಾ ಜಣ್ ಪಾದ್ರಿಂನಿ ಮೊಠ್ವಾಸಿ ಜೀಣ್ ಜಿಯೆಂವ್ಚಿ ವೆವಸ್ತಾ ಸುರ್ವಾತ್ಲಿ.

ಸಮಾಜೆಂತ್ ಬರೆಂಪಣ್ ಹಾಡ್ಚೆ ಖಾತಿರ್ ತಾಣೆ ಮನ್ನಾನಮಾಂತ್ ಸಾಂತ್ ಜುಜೆ ಛಾಪ್ಖಾನೊ ತಶೆಂಸ್ ಇಸ್ಕೊಲಾಂ ಸುರ್ವಾತ್ಲಿಂ. ಛಾಪ್ಖಾನ್ಯಾ ಧ್ವಾರಿಂ ಪತ್ರಾಂ ಪರ್ಗಟುಂಕ್ ಧರ್ಲಿಂ. ಆಪ್ಲ್ಯಾ ದಿಯೆಸೆಜಿಚೊ ವಿಗಾರ್ ಜೆರಾಲ್ ಆಸ್ತಾನಾ ತಾಣೆ ಹರ್ಯೆಕಾ ಇಗರ್ಜೆನ್ ಏಕ್ ಇಸ್ಕೊಲ್ ಸುರ್ವಾತುಂಕ್ ಆನಿ ತ್ಯಾ ಇಸ್ಕೊಲಾಂನಿ ದುಬ್ಳ್ಯಾ ಭುರ್ಗ್ಯಾಂಕ್ ಧನ್ಪಾರಾಂ ಜೆವಣ್ ದೀಂವ್ಕ್ ನಿರ್ದೇಸ್ ದಿಲೊ. ಅಶೆಂ ಗಾಂವಾರ್ ದುಬ್ಳ್ಯಾಂನಿ ಫುಂಕ್ಯಾಚೆಂ ಶಿಕಪ್ ಜೊಡುಂಕ್ ತೊ ಕಾರಣ್ ಜಾಲೊ.

ಇಗರ್ಜ್‍ಮಾತೆಕ್ ಬಳ್ವಂತ್ ಕರ್ಚ್ಯಾಕ್ ಚಾವಾರಾ ಆಪುಣ್ ಸಿರಿಯನ್ ಕಥೊಲಿಕ್ ಧರ್ಮ್‍ಸಭೆಂಚೊ ವಿಗಾರ್ ಜೆರಾಲ್ ಜಾಲ್ಲೆವೆಳಿಂ ತೇರ್ಸ್, ಖುರ್ಸಾಚಿ ವಾಟ್, ಉಪಾಸ್ ಆನಿ ಪ್ರಾಚಿತಾಚೆಂ ಬಳ್ ವಾಡೊಂವ್ಕ್ ವಿಶೇಸ್ ವಾಂವ್ಟ್ ಕಾಡ್ತಾ. ಧರ್ಮ್‍ಸಭೆಕ್ ಧಾರ್ಮಿಕ್ ಭಾವಾಂ-ಭಯ್ಣಿಂಚಿ ಗರ್ಜ್ ಸಮ್ಜುನ್ ತಾಣೆ ಸುರ್ವೆರ್ ದಾದ್ಲ್ಯಾಂ ಖಾತಿರ್ ಖತಾವಿಣ್ ಮರ್ಯೆಚೊ ಕಾರ್ಮೆಲಿತ್ (ಸಿಎಮ್‍ಆಯ್) ಧರ್ಮ್‍ಮೇಳ್ ಘಡ್ಲೊ 1866 ಇಸ್ವೆಂತ್ ಕಾರ್ಮೆಲ್ ಮಾಯೆಚೊ ಧರ್ಮ್‍ಮೇಳ್ (ಸಿಎಮ್‍ಸಿ) ಸ್ತ್ರೀಯಾಂ ಖಾತಿರ್ ಘಡ್ಲೊ. ದುಬ್ಳ್ಯಾದಾಕ್ಟ್ಯಾಂಚಿ ಸೆವಾ, ಪಾತ್ಕಾಂಚೊ ಕಾಂಟಾಳೊ ಆನಿ ಪ್ರಾಚಿತ್ ಆಧಾರ್ಣಿ ತಾಚೆ ವಿಶೇಸ್ ಶೆಗುಣ್. ಹ್ಯಾ ನಿಮ್ತಿಂ ತಾಚೆ ಥಂಯ್ ಸಾಂತಿಪಣ್ ದೆಕ್‍ಲ್ಲೆ ಹಾರಿಹಾರಿಂನಿ ತಾಚೆ ಲಾಗಿಂ ಮಾಗ್ಣ್ಯಾಖಾತಿರ್ ಯೆತಾಲೆ.

ಕುರಿಯಾಕೋಸ್ ಎಲಿಯಾಸ್ ಚಾವಾರಾ 1871 ಇಸ್ವೆಂತ್ ಜನೆರ್ 3 ವೆರ್ ಆಪ್ಲ್ಯಾ 66 ಪ್ರಾಯೆರ್ ಕುನ್ನಮಾವುಂತ್ ಸರ್ಗಾರಾಜಾಂತ್ ರಿಗ್ಲೊ. 1889 ಇಸ್ವೆಂತ್ ತಾಚ್ಯೊ ರೆಲಿಕೊ ಮನ್ನಾನಾಮಾಂತ್ ಪುನರ್‍ಸ್ಥಾಪಿತ್ ಕೆಲ್ಯೊ. ಚಾವಾರಾಚ್ಯಾ ಜಿವಿತಾಂತ್ ಆಸ್‍ಲ್ಲೆಂ ಸಾಂತಿಪಣ್ ತಾಚ್ಯಾ ಮರ್ಣಾ ಉಪ್ರಾಂತ್ ವಿಶೇಸ್ ರಿತಿನ್ ದಿಸುನ್ ಆಯ್ಲೆಂ. ‘ಕುರಿಯಾಕೋಸ್ ಕಾತಾನಾರಾಚ್ಯಾ ಮಧ್ಯಸ್ಥೆನ್ ಆಪ್ಣಾಕ್ ಸಭಾರ್ ಉಪ್ಕಾರ್ ಲಾಭ್ಲೆ’ಮ್ಹಣುನ್ ಲೋಕ್ ಬರಂವ್ಕ್ ಲಾಗ್ಲೊ. 1955 ಇಸ್ವೆಂತ್ ತಾಕಾ ಸಾಂತ್ ಪಾಸಾರ್ಚಿ ಪ್ರಕ್ರಿಯಾ ಸುರ್ವಾತ್ಲಿ ಪಾಪಾ ಜುವಾಂವ್ ಪಾವ್ಲ್ ದುಸ್ರ್ಯಾನ್ ತಾಕಾ 7-4-1984 ಇಸ್ವೆಂತ್ ಮಾನಾಪಾತ್ರ್ ಪಾಸಾರ್ಲೊ ಆನಿ ಕೊಟ್ಟಾಯಾಮಾಂತ್ ಆಪ್ಲ್ಯಾ ಭೆಟೆ ವೆಳಿಂ 8-2-1986 ವೆರ್ ತಾಕಾ ಭಾಗೆವಂತ್ ಪಾಸಾರ್ಲೊ, ಆನಿ ನಿಮಾಣೆ 23-11-2014 ವೆರ್ ಪಾಪಾ ಫ್ರಾನ್ಸಿಸಾನ್ ತಾಕಾ ಸಾಂತ್ ಪಾಸಾರ್ಲೊ.

ಕೃಪಾ : ’ಸಾಂತಿಪಣಾಚ್ಯಾ ವಾಟೆರ್’
(ಸಾಂತ್‍ಭಕ್ತ್, ಮರಿ, ಶ್ರೇಷ್ಟ್ ಭಡ್ವೆ, ಪಾಪ್‍ಸಾಯ್ಬಾಂಚೊ ಆನಿ ಸದಾಂಚ್ಯಾ ಗರ್ಜೆಚ್ಯಾ ಮಾಗ್ಣ್ಯಾಂಚೊ ವಿವರ್ ಪುಸ್ತಕ್)

ಸಂಗ್ರಾಹಕ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
ಪರ್ಗಟ್ಣಾರ್ : ಜೆ ಜೆ ಪಬ್ಲಿಕೇಶನ್ಸ್, ಮಂಗ್ಳುರ್

First Impression : December 2016