Associations' / Institutions' News

Media Release

Mangaluru, Feb 4, 2025 : The 278th programme of Mandd Sobhann's Monthly Theatre series was held at Kalaangann in Shaktinagar on February 2. 65 students of Sur Sobhann classical vocal training presented a musical extravaganza titled 'Surangannim' (melodious songs).

ಭರ್ವಶ್ಯಾಚ್ಯಾ ಭುರ್ಗ್ಯಾಂನಿ ಗಾಯ್ಲಿಂ ಸುರಾಂಚಿಂ ಗಾಣಿಂ

ಕಲಾಂಗಣಾಂತ್ ಸುರಾಂಚಿಂ ಗಾಣಿಂ, ಸುರಾಯೆನ್ ಆನಿ ಸರಾಯೆನ್ ಗಾಯ್ಲಿಂ ಭುರ್ಗ್ಯಾಂನಿ, ಧಲ್ಲಿಂ ಪ್ರೇಕ್ಷಕಾಂ ಕಾನಿಂ ಮನಿಂ, ವಿಚಾರಿನಾಸ್ತಾನಾಂಚ್ ತಾಳಿಯೊ ಪೆಟ್ಲ್ಯೊ ಹಾರಿ ಹಾರಿಂನಿ,... ಹಿ ಸುರಾಂಗಾಣಿಂ ಮಾಂಚಿಯೆಚಿ ವನ್ ಲೈನ್ ವರ್ದಿ.

ಮಾಂಡ್ ಸೊಭಾಣಾಚ್ಯಾ ವಾವ್ರಾ ನಿರಂತರತಾಯೆಕ್ ಸಾಕ್ಸ್ ಜಶೆಂ 278ವಿ ಮ್ಹಯ್ನ್ಯಾಳಿ ಮಾಂಚಿ 02.02.25ವೆರ್ ಕಲಾಂಗಣಾಂತ್ ಸಾದರ್ ಜಾಲಿ. ಭಿತರ್ ರಿಗ್ತಾನಾ ಕ್ಲಾರಾ ಡಿಕುನ್ಹಾಚ್ಯಾ ಪಿರ್ಲುಕೆ ಆವಾಜಾನ್ ಸಂಗೀತಾಚೊ ಭೊಂವಾರ್ ನಿರ್ಮಾಣ್ ಕೆಲೊ. ಉಪ್ರಾಂತ್ ಯುವ ಗಾವ್ಪಿಣ್ ರಿಶಲ್ ಮೆಲ್ಬಾ ಕ್ರಾಸ್ತಾನ್ ಘಾಂಟ್ ವ್ಹಾಜೊವ್ನ್ ಕಾರ್ಯಾಕ್ ಚಲಾವಣ್ ದಿಲೆಂ.

ಪಾಂಚ್ವಿ ಥಾವ್ನ್ ಧಾವಿ ಪರ್ಯಾಂತ್ಲ್ಯಾ ಕ್ಲಾಶಿಂನಿ ಆಸ್ಚ್ಯಾ ಪಾಂಚೆಸಾಟ್ ಸುರ್ ಸೊಭಾಣ್ ವಿದ್ಯಾರ್ಥಿಂಚ್ಯಾ ಉರ್ಬೆಚೊ ಆನಿ ಗಾಯಾನಾಚೊ ಪಾವ್ಸ್ ಬಿರ್ಬಿರ್ಲೊ, ಶಿಂವರ್ಲೊ, ವೊತ್-ವೊತ್ಲೊ. ಭಾಂಗ್ರಾಕ್ ಪಿಗ್ಳಾಂವ್ಚಿ ಖತ್ಕತಿ ಉರ್ಬಾ ಆಪ್ಲ್ಯಾ ಹಾಶ್ಯಾನಿಂಚ್ ಆಟಾಪ್ಚ್ಯಾ ಭುರ್ಗ್ಯಾಂನಿ ಭರ್ವಶ್ಯಾಚ್ಯೊ ಸಂಕೇತ್ ಹಳ್ದುವ್ಯಾ ಬಣಾಚಿಂ ವಸ್ತುರಾಂ ನ್ಹೆಸುನ್ ಕಲಾಂಗಣಾಂತ್ ಗಿನ್ನೆಸ್ ದಾಖ್ಲೊ ಜಾಲ್ಲೆ ವೆದಿರ್ ಕೊಂಕ್ಣಿ ಆನಿ ಹಿಂದೂಸ್ತಾನಿ ಶಾಸ್ತ್ರೀಯ್ ಗಿತಾಂ ಗಾಯ್ತಾನಾ ಸಾತ್ವ್ಯಾ ಸರ್ಗಾರ್ ನಕ್ತಿರಾಂಯ್ ನಾಚ್ಲಿಂ ಕೊಣ್ಣಾ! ಮಿನುಟಾ ಭಿತರ್ ಭುರ್ಗ್ಯಾಂನಿ ವೆದಿ ಸೊಭೊಂವ್ಚಿ ಕಿತೆಂ! ಪದಾಂಕ್ ಜೀವ್ ದೀವ್ನ್ ಗಾಂವ್ಚೆಂ ಕಿತೆಂ! ತಿತ್ಲ್ಯಾಚ್ ಶಿಸ್ತೆನ್ ಪಾಟಿಂ ವೆಚೆಂ, ದುಸ್ರ್ಯಾ ಭುರ್ಗ್ಯಾಂನಿ ವೆದಿ ಘೆಂವ್ಚಿ ಕಿತೆಂ! ಹೆಣೆಂ ಭುರ್ಗ್ಯಾಂನಿ ವೆದಿ ಸೊಭಯ್ತಾನಾ, ತ್ಯಾ ಪದಾಚೆಂ ನಿರೂಪಣ್ ಕರ್ಚ್ಯಾ ಭುರ್ಗ್ಯಾನ್ ಪದಾ ವಿಶ್ಯಾಂತ್, ಆಪ್ಣೆಂ ಶಿಕ್ಲಲ್ಯಾ ಗಾಯಾನ್ ಸಂಗ್ತಿ ವಿಶ್ಯಾಂತ್, ಕ್ಲಾಶಿಂನಿ ಘಡ್ಚ್ಯಾ ಗಮ್ಮತ್ ಗಜಾಲಿಂ ವಿಶ್ಯಾಂತ್ ಮಾಹೆತ್ ದಿಂವ್ಚಿ ಕಿತೆಂ! ಹಿ ಶಿಸ್ತ್ ಯಿ ಪ್ರೇಕ್ಷಕಾಂಕ್ ಖೂಬ್ ಆಂವಡ್ಲಿ. ಸುರ್ ಸೊಭಾಣಾಂತ್ಲ್ಯಾಚ್ ಚೊವ್ದಾ ಭುರ್ಗ್ಯಾಂನಿ ನಿರೂಪಣ್ ಕೆಲೆಂ.

ಹ್ಯಾ ವಿದ್ಯಾರ್ಥಿಂಚ್ಯಾ ವ್ಹಡಿಲಾಂ ಪಯ್ಕಿಂ ಬಾವೀಸ್ ಜಣಾಂನಿ ವೆದಿ ಘೆವ್ನ್ ಏಕ್ ಪದ್ ಗಾಯ್ಲೆಂ. ಹ್ಯಾ ಮ್ಹಾನ್ ವೆದಿರ್ ಪಯ್ಲೆ ಪಾವ್ಟಿಂ ಪದ್ ಸಾದರ್ ಕರ್ಚೊ ಸಂತೊಸ್ ಚಡಾವತ್ ಜಣಾಂಚ್ಯಾ ತೊಂಡಾರ್ ಧರ್ ಧರ್ ದಿಸ್ತಾಲೊ.

ಕಾರ್ಯೆಂ ಸುರ್ವಾತ್ತಾನಾ ಕಿತೆಂ ಕರ್ತಾತ್ ಕೊಣ್ಣಾ ಮ್ಹಣ್ ಕಾಳ್ಜಾ ಕೊನ್ಶಾರ್ ಲ್ಹಾನ್ ಭಿರಾಂತ್ ಘೆವ್ನ್, ಭುರ್ಗ್ಯಾಂಕ್ ನಿರ್ದೇಶನ್ ದೀಂವ್ಕ್ ರಾವ್ಲಲ್ಯಾ, ಕೊಂಕ್ಣಿ ಸಂಸಾರಾಂತ್ ಆನಿ ಹಿಂದೂಸ್ತಾನಿ ಗಾಯಾನಾಂತ್ ತಶೆಂಚ್ ತರ್ಬೆತೆಂತ್ ಆಪ್ಲೆಂಚ್ ವಿಶಿಶ್ಟ್ ಕಂತ್ರಾಳ್ ಉಬೆಂ ಕೆಲ್ಲ್ಯಾ ಶಿಲ್ಪಾ ತೇಜಸ್ವಿನಿ ಕುಟಿನ್ಹಾಚೊ ಜೋಶ್ ಭುರ್ಗ್ಯಾಂಚ್ಯಾ ಸ್ಪಿರಿತಾಕ್ ಪಂಥಾಹ್ವಾನ್ ಕರ್ಚೊ ದಿಸ್ಲೊ. ಭುರ್ಗ್ಯಾಂನಿ ಭೋವ್ ಮಾಂಡಾವಳಿನ್ ವೆದಿ ಸೊಭೊಂವ್ಚ್ಯಾಂತ್ ತಶೆಂಚ್ ಗಾಯಾನಾಂತ್ ಡಿಯೆಲ್ ಡಿಸೊಜಾಚೊ ವಾಂಟೊ ವರ್ತೊ.

ಸಂಗೀತಾಂತ್ ಸಾಂಗಾತ್ ದೀವ್ನ್ ಕಾರ್ಯೆಂ ಆನಿಕೀ ಸೊಭಿತ್ ಕೆಲ್ಲ್ಯಾ ರಸೆಲ್ ರೊಡ್ರಿಗಸ್ (ಬೇಸ್ ಗಿಟಾರ್), ಆಶ್ವಿಲ್ ಕುಲಾಸೊ (ಕೀ ಬೋರ್ಡ್), ಗ್ಲೆನನ್ ಡಿಸೋಜ (ಕೀ ಬೋರ್ಡ್), ಶರ್ವಿನ್ ಪಿಂಟೊ (ಗಿಟಾರ್) ಆನಿ ಸೆನೊರಾ ಕುಟಿನ್ಹಾ (ಡ್ರಮ್ಸ್) ಹಾಂಕಾಂ ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊನ್ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲೊ. ವೆದಿರ್ ಅಧ್ಯಕ್ಷ್ ಲುವಿ ಪಿಂಟೊ, ಸುಮೇಳ್ ಸಮನ್ವಯಿ ರೈನಾ ಸಿಕ್ವೇರಾ ಹಾಜರ್ ಆಸ್ಲಲಿಂ. ಕಾರ್ಯದರ್ಶಿ ಕೇರನ್ ಮಾಡ್ತಾನ್ ಕಳೊವ್ಣ್ಯೊ ದಿಲ್ಯೊ.

ಆನಿಕೀ ಲಗ್ಬಗ್ ದೋನ್ ಮ್ಹಯ್ನ್ಯಾಂಚ್ಯೊ ಸುರ್ ಸೊಭಾಣ್ ಕ್ಲಾಶಿ ಆಸಾತ್. ಉಪ್ರಾಂತ್ ಹಿಂ ಭುರ್ಗಿಂ ಗಾಯಾನ್ ಶೆತಾಕ್ ಪಾಂಯ್ ತೆಂಕ್ತಾತ್. ಕಾಂಯ್ ಥೊಡಿಂ ಜಣಾಂ ಕೊಂಕ್ಣೆಚೊ ಸುಕುರ್ ಜಾತಿತ್, ನಕ್ತಿರ್ ಜಾತಿತ್ ತರ್ ತಾಂತುಂ ಮಾಂಡ್ ಸೊಭಾಣ್ ತರ್ಬೆತೆಚೊ ಆನಿ ಪ್ರೋತ್ಸಾವಾಚೊ ಹಾತ್ ಆಸ್ತಲೊ. ಹಿಚ್ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ವಾಡೊಂವ್ಚಿ, ಸುಂರ್ಗಾರಾಂವ್ಚಿ ಆನಿ ಮುಖ್ಲ್ಯೆ ಪಿಳ್ಗೆಕ್ ಹಾತಾಂತರ್ ಕರ್ಚಿ ಮಾಂಡ್ ಸೊಭಾಣಾಚಿ ದಿಶ್ಟಾವ್ಯಾ ಪ್ರಕ್ರಿಯಾ.