Photo : unsplash.com
ಕೆನರಾಚ್ಯಾ ಕ್ರಿಸ್ತಾಂವಾಂ ಮಧೆಂ ಆಜೂನ್ ‘ಆಮಿ ಕಷ್ಟಾಂತ್ ಸಾಂಪಡ್ಲಲ್ಯಾ ಬ್ರಿಟೀಶಾಂಕ್ ಕ್ರಿಸ್ತಾಚ್ಯಾ ತತ್ವಾಂ ಪರ್ಮಾಣೆ ತಾಂದುಳ್ ದಿಲ್ಲೊ ದೆಕುನ್ ಟಿಪ್ಪುಸುಲ್ತಾನಾನ್ ಭೆಷ್ಟೆಂ ಆಮ್ಚ್ಯಾ ಮ್ಹಾಲ್ಘಡ್ಯಾಂಕ್ ವಿಪ್ರೀತ್ ಧೊಸ್ಲೆಂ’ ಅಶೆಂ ಚಿಂತಪ್ ಆಸಾ. ಹ್ಯಾ ಚಿಂತ್ಪಾಚೊ ಫಳ್ ಜಾವ್ನ್ ಆಜ್ ಪರ್ಯಾಂತ್ ಥೊಡ್ಯಾ ಬರ್ಪಾಂನಿ ಟಿಪ್ಪುಕ್ ಆನಿ ಹೆರ್ ಸುಟ್ಕಾಯೆ ಝುಜಾರ್ಯಾಂಕ್ ಉಣ್ಯಾಚೆಂ ಕಾಡ್ತಾಂವ್ ಆನಿ ಬ್ರಿಟಿಶಾಂಕ್, ತಾಂಚ್ಯಾ ವೆವಸ್ತ್ಯಾಂಕ್ ವರ್ತೆಂ ಮ್ಹಣ್ ಚಿಂತ್ತಾಂವ್. ಬ್ರಿಟಿಶಾಂಕ್ ಆನಿ ಥೊಡ್ಯಾ ಸಂದರ್ಭಾಂನಿ ಆಮ್ಚ್ಯಾ ಧರ್ಮಾಕ್ ಫುಗಾರ್ಚ್ಯಾ ಭರಾರ್ ದೆಶಾಚ್ಯಾ ಸುಟ್ಕಾಯೆ ಝುಜಾರ್ಯಾಂಕ್ ಉಣ್ಯಾಚೆಂ ಲೆಕ್‍ಲ್ಲಿಂ ಲೆಕನಾಂ ಸಭಾರ್ ಆಮ್ಚೆ ಮಧೆಂ ಪರ್ಗಟ್ ಜಾತಾತ್. ಆಮ್ಚ್ಯಾ ಲೊಕಾಚೊ ಸಹಜ್ ಜಾಗ್ಯಾಂತರ್ ಸಂಯ್ಭ್ ಸಯ್ತ್ ಥೊಡ್ಯಾ ಮಾಪಾನ್ ಆಮ್ಕಾಂ ಆಮ್ಚ್ಯಾ ದೆಶಾ ವಿಶಿಂ ಭೋವ್ ವ್ಹಡ್ ಅಭಿಮಾನಾನ್ ದೆಕುಂಕ್ ಆನಿ ಆಮ್ಚ್ಯಾ ಸುಟ್ಕಾಯೆ ಝುಜಾಚ್ಯಾ ಉಗ್ಡಾಸಾಂಕ್ ವ್ಹಡ್ ಗವ್ರವಾನ್ ದೆಕ್ಚ್ಯಾಕ್ ಭೋವ್ಶಾ ಆಡ್ ಯೆತಾ. ಆಮಾ ಕೊಂಕಣಿ ಕಥೊಲಿಕಾಂಚ್ಯಾ ಪತ್ರಾಂನಿ ದೇವ್, ಸರ್ಗ್, ಸಾಯ್ಭಿಣ್, ಪಾಪಾ ಆಮ್ಚೆ ಧಾರ್ಮಿಕ್ ಮುಕೆಲಿ ಜೊಡ್ತಾತ್ ತೊ ಮಹತ್ವ್ ಆನಿ ತೊ ಜಾಗೊ ದೇಶ್, ಗಾಂವ್, ಗಾಂವ್ಚ್ಯೊ ವಾಡಾವಳಿ ಘೆನಾಂತ್.
ಹ್ಯಾ ‘ರೋಮನ್ ಕಥೊಲಿಕ್’ ಪರಿಗತೆಚೊ ಪರಿಣಾಮ್ ಆಮ್ಕಾಂಚ್ ಆಪಾಯಾಚೊ. ದೇಶ್ ಆಮ್ಕಾಂ ಪೊಸ್ತಾ, ಆಮ್ಕಾಂ ವೆಕ್ತಿತ್ವ್ ದಿತಾ ತರಿ ಆಮಿ ಆಮ್ಚೆ ಮಧೆಂಚ್ ಪರ್ಕಿ ಜಾವ್ನ್ ಉರ್ತಾಂ ಉರ್ತಾಂ ಆಮ್ಚೆ ಭೊಂವಾರಿ ಆಮ್ಕಾಂ “ಫೊರಿನ್‍ಗಾರ್’ ಮ್ಹಣ್ ಕಾಡ್ತಾತ್ ತರ್ ಚೂಕ್ ಆಮ್ಚಿಚ್. ದೆಶಾಚ್ಯಾ ಆಡಳ್ತ್ಯಾ ಆನಿ ಹೆರ್ ಸಾಮಾಜಿಕ್ ವೆವಸ್ತ್ಯಾಂನಿ ಮಹತ್ವಾಚೊ ಪಾತ್ರ್ ಜೊಡುಂಕ್ ಆಮ್ಕಾಂ ಭಂಗ್ ಜಾವ್ನಾಸಾತ್ ತರ್, ಹಾಕಾ ಆಮ್ಚಿಚ್ ದೆಣ್ಗಿ ಆಸಾ. ಹೆರಾಂನಿ ಆಮ್ಕಾಂ ‘ಭಾಯ್ಲೆ’ ಮ್ಹಣ್ ಕಾಡ್ಚ್ಯಾಂತ್‍ಯಿ ಹಿಚ್ ಆಮ್ಚಿ ಮನೋಗತ್ ಜವಾಬ್ಧಾರ್ ಆಸಾ. 21 ವ್ಯಾ ಶೆಕ್ಡ್ಯಾಂತ್ ಸಹಜ್ಪಣಿ ಭಾರತಾಂತ್ಲೆ ಬಹುಸಂಖ್ಯಾತ್ ಆಪ್ಲ್ಯಾ ಹಕ್ಕಾಂ ಆನಿ ಆಪ್ಣಾಕ್ ಸಹಜ್ ಮಹತ್ವಾ ಖಾತಿರ್ ಪೆಚಾಡ್ತಾನಾ, ಆಮಿ ಆಜೂನ್ ಪ್ರಧಾನ್‍ಮಾಂಚಿಯೆರ್ ಆಯ್ತೊ ಆಸ್ಚೊ ವಾಂಟೊ ಖೆಳ್ನಾಶೆಂ ಉರ್ಲ್ಯಾರ್ ಸಲ್ವಣಿ ಆಮ್ಚಿಚ್. ಹ್ಯಾ ಮಧೆಂ ಥಂಯ್ ಹಾಂಗಾ ಆಸಾ ಜಾಂವ್ಚ್ಯಾ ಬಹುಸಂಖ್ಯಾತ್- ಅಲ್ಪ್‍ಸಂಕ್ಯಾತ್ ಸಂಘರ್ಶಾಂಕ್ ಆಮ್ಚಿ ಜವಾಬ್ದಾರಿ ಕಿತ್ಲಿ ಮ್ಹಣ್ಚ್ಯಾ ಸವಾಲಾಕ್ ಜವಾಬ್ ಸೊಧ್ಚೆಂ ಆಮ್ಕಾಂಯ್ ಗರ್ಜೆಚೆಂ ಜಾಯ್ಜೆ. ಆಜ್ ಆಮಿ ಕೆನರಾಚೆ ವಚುನ್ ಕೆನಡಾಚೆ ಜಾಲ್ಯಾಂವ್, ಆಮ್ಚಿಂ ಸದಾಂ ಜಿವಿತಾಚಿಂ ಆಚರಣಾಂ ಪರ್ದೆಶಿ ಜಾಲ್ಯಾಂತ್ ತರ್ ಹಾಕಾ ತಿದ್ವಣ್ ಗರ್ಜೆಚಿ.
ಹ್ಯಾ ಲೆಕನಾಂತ್ ಭಾರತಾಚ್ಯಾ ಸುಟ್ಕಾಯೆ ಝುಜಾಂತ್ ಮಹತ್ವಾಚೊ ಪಾತ್ರ್ ಖೆಳ್‍ಲ್ಲ್ಯಾ ಥೊಡ್ಯಾ ಕ್ರಿಸ್ತಾಂವಾಂಚೆ ವಿಶಿಂ ಬರಂವ್ಕ್ ಹಾಂವ್ ಆಶೆತಾಂ. ಹಾಂಗಾಸರ್ ಭೋವ್ ಉಣ್ಯಾ ಸುಟ್ಕಾಯೆ ಝುಜಾರ್ಯಾಂ ವಿಶಿಂ ಬರಂವ್ಕ್ ಅವ್ಕಾಸ್ ಆಸಾ. ಪೂಣ್ ಖರ್ಯಾನ್ ತಾಂಚೊ ಸಂಕೊ ಭೋವ್ ವ್ಹಡ್ ಮ್ಹಣ್ಚ್ಯಾಂತ್ ದುಬಾವ್ ನಾ. ಪುಡ್ತುಗೆಝಾಂ, ಡಚ್ಚಾಂ, ಫ್ರೆಂಚಾಂ ಆನಿ ಇಂಗ್ಲಿಶಾಂನಿ ಆಮ್ಚ್ಯಾ ದೆಶಾಂತ್ 1498 ಥಾವ್ನ್ 1947 ಪರ್ಯಾಂತ್ ಚಲಯಿಲ್ಲೊ ಅನಾಚಾರ್ ಆನಿ ಲುಟ್‍ಲ್ಲಿ ಸಂಪತ್ತಿ ಕೆದಿಂಚ್ ಚರಿತ್ರೆಂತ್ ಪುನರಾವರ್ತಿತ್ ಕರುಂಕ್ ಸಕ್ಚಿ ನ್ಹಂಯ್ ದುದಾ-ಮ್ಹೊಂವಾಚೊ ಆಮ್ಚೊ ಹೊ ದೇಶ್ ದುಬ್ಳೊ ಕರ್ನ್ ಘಾಲೊ ಹ್ಯಾ ಯುರೋಪಿಯನಾಂನಿ. (ಆಜ್ ಭಾರತ್ ತಾಂಚ್ಯಾ ಮುಟಿಂತ್ ನಾ ದೆಕುನ್ ತೆ ಸರ್ವ್ ದೇಶ್ ತಿಸ್ರ್ಯಾ ಹಂತಾಚೆ ಜಾವ್ನ್ ಗೆಲ್ಯಾತ್) ತಾಂಕಾಂ ಪಾಟಿಂ ತಾಂಚ್ಯಾ ಘರಾ ಧಾಂವ್ಡಾಂವ್ಚ್ಯಾ ವಾವ್ರಾಂತ್ ಹಜಾರೊಂ ಕ್ರಿಸ್ತಾಂವಾಂನಿ ಮಹತ್ವಾಚಿ ಸೆವಾ ದಿಲ್ಯಾ.
ಗೊಯಾಂತ್ ಪುಡ್ತುಗೆಝಾಂಚ್ಯಾ ಅನ್ಯಾಯ್ ಅನಾಚಾರಾ ವಿರೊದ್ ಅಬ್ಬೇ ಫರಿಯಾ (ಕುಸ್ತಾದಿಯೊ ಫರಿಯಾ), ಕಯ್ತಾನೊ ವಿತೊರಿಯೊ ದೆ ಫರಿಯಾ, ಜೋಸ್ ಅಂತೋನಿಯೊ ಗೊನ್ಸಾಲ್ವೆಸ್ ಆನಿ ಹೆರಾಂನಿ (ಚಡ್ ಕರ್ನ್ ಪಿಂಟೊ ಘರಾಣ್ಯಾಚ್ಯಾ ಪಾದ್ರಿಂನಿ) ಚಲಯಿಲ್ಲಿ ದಂಗ್ವಳ್ ಚರಿತ್ರೆಂತ್ ನಾಮ್ಣೆಚಿ ಜಾಲ್ಯಾ.
ಭಾರತ್ ರಾಷ್ಟ್ರೀಯ್ ಕಾಂಗ್ರೆಸ್ ಬ್ರಿಟಿಶಾಂಕ್ ಫುಡ್ ಕರ್ಚೆಂ ಮಹಾನ್ ಸಂಘಟನ್ ಜಾವ್ನ್ ವಾಡ್ಲೆಂ. ಪೂಣ್ ಸುರ್ವಾಯೆಚ್ಯಾ ದಿಸಾಂನಿ ತೆಂ ಬ್ರಿಟಿಶಾಂ ಸವೆಂ ಸಹವಾವ್ರ್ ಕರ್ನ್ ದೆಶಾಂತ್ ಸುವೆವಸ್ತಾ ಹಾಡುಂಕ್ ಚಿಂತ್ತಾಲೆಂ. ಕಾಂಗ್ರೆಸಾಚ್ಯಾ ಸುರ್ವಾಯೆಚ್ಯಾ ದಿಸಾಂಥಾವ್ನ್‍ಯಿ ತ್ಯಾ ಸಂಘಟನಾಂತ್ ಕ್ರಿಸ್ತಾಂವಾಂಚಿ ದೆಣ್ಗಿ ವ್ಹರ್ತಿ ಆಸ್‍ಲ್ಲಿ. ಖರ್ಯಾನ್ ಕಾಂಗ್ರೆಸ್ ಸ್ಥಾಪನ್ ಜಾಂವ್ಕ್ ಕಾರಣ್ ಜಾಲ್ಲೊ ಅಲನ್ ಒಕ್ಟೇವಿಯನ್ ಹ್ಯೂಮ್ ಎಕ್ಲೊ ಕ್ರಿಸ್ತಾಂವ್. ಕಾಂಗ್ರೆಸಾಚೊ ಪ್ರಥಮ್ ಅಧ್ಯಕ್ಷ್ ವೊಮೇಶ್ ಚಂದರ್ ಬ್ಯಾನರ್ಜಿ ಏಕ್ ಕ್ರಿಸ್ತಾಂವ್. 1887 ಇಸ್ವೆಂತ್ ಕಾಂಗ್ರೆಸ್ಸಾಚ್ಯಾ ತಿಸ್ರ್ಯಾ ಮ್ಹಾಸಭೆಂತ್ 607 ಪ್ರತಿನಿಧಿಂ ಪಯ್ಕಿ 15 ಭಾರತೀಯ್ ಕ್ರಿಸ್ತಾಂವ್ ಆಸ್‍ಲ್ಲೆ. ಹ್ಯಾ ಸಭೆಂತ್ ಒರಿಸ್ಸಾಚ್ಯಾ ಕ್ರಿಸ್ತಾಂವ್ ಸಾಂದ್ಯಾ ಮಧುಸಂದರ್ ದಾಸಾನ್ ಶಾಸನ್ ಮಂಡಳೆಂಚ್ಯಾ ಸಾಂದ್ಯಾಸಂಕ್ಯಾಕ್ ಚಡೊಂವ್ಕ್ ವಿನೊವ್ಣಿ ಕೆಲ್ಲಿ ತರ್, ಎನ್ ಸುಬ್ರಮಣಿಯಮ್ಮನ್ ಕಾರ್ಯಾಂಗ್ ಆನಿ ನ್ಯಾಯಾಂಗಾ ಮಧೆಂ ಸಂಪೂರ್ಣ್ ಜವಾಬ್ಧಾರಿ ವಾಂಟೆಲ್ಪಣಾಚಿ ವಿನೊವ್ಣಿ ಕೆಲ್ಲಿ.
ಪಂಡಿತ್ ರಮಾಭಾಯಿ ಸರಸ್ವತಿ ಆನಿ ಕಾಲಿ ಚಂದನ್ ಬ್ಯಾನರ್ಜಿ ಸುರ್ವಾಯೆಚ್ಯಾ ಕಾಂಗ್ರೆಸ್ ಮುಕೆಲ್ಯಾಂ ಪಯ್ಕಿ ಮಹತ್ವಾಚಿಂ ಕ್ರಿಸ್ತಾಂವ್ ಮುಕೆಲಿ. ಸ್ತ್ರೀಯಾಂಚ್ಯಾ ಹಕ್ಕಾಂ ಖಾತಿರ್ ವಾವುರ್ಲಲಿ ರಮಾಬಾಯಿ ಸರಸ್ವತಿ ವಿಧ್ವಿಂಚ್ಯಾ ಪುನರ್‍ಲಗ್ನಾ ಖಾತಿರ್ ತಾಳೊ ಉಟಯ್ತಾಲಿ. ದಲಿತಾಂಚ್ಯಾ ಹಕ್ಕಾಂ ಖಾತಿರ್ ಆನಿ ತಾಂಚ್ಯಾ ಸಾಮಾಜಿಕ್ ವಾಡಾವಳೆ ಖಾತಿರ್ ಕಾಲಿ ಚಂದನ್ ಬ್ಯಾನರ್ಜಿ ಝುಜ್ಲೊ. ಬಾಲಗಂಗಾಧರ್ ತಿಲಕಾನ್ ಲೊಕಾಮೊಗಾಳ್ ಕೆಲ್ಲೊ ‘ಸ್ವರಾಜ್ ಮ್ಹಜೆಂ ಜನ್ಮಾ ಹಕ್ಕ್ , ತೆಂ ಹಾಂವ್ ಜೋಡ್ನ್‍ಂಚ್ ಸಯ್’ ಮ್ಹಣ್ಚೊ ಝುಜಾನಾರೊ ಖರ್ಯಾನ್ ತಾಚ್ಯಾ ಸಾಂಗಾತ್ಯಾ ಬ್ಯಾರಿಸ್ಟರ್ ಜೋಸೆಫ್ ಕಾಕಾ ಬಾತಿಸ್ತಾಚೊ ತಾಚೊ ಝುಜಾರಿ ಸ್ಪಿರಿತ್ ತಿಲಕಾಚೆರ್ ವ್ಹರ್ತೊ ಪ್ರಭಾವ್ ಘಾಲುಂಕ್ ಸಕ್ಲೊ. ಸ್ವದೇಶಿ ದಂಗ್ವಳೆಂತ್ ವ್ಹರ್ತೊ ವಾವ್ರ್ ಕೆಲ್ಲೊ ಆನ್ಯೇಕ್ ಕ್ರಿಸ್ತಾಂವ್ ಮುಕೆಲಿ ಆಸಾ ಬ್ರಹ್ಮಬಾಂಧವ್ ಉಪಾಧ್ಯ (ಸಾಧು ಜಾರ್ಜ್ ತೊಮಾಸ್) ಚೆಂಗನೂರಾಚೊ (ತಿರುವಾಂಕೂರ್) ಬ್ಯಾರಿಸ್ಟರ್ ಜಾರ್ಜ್ ಜೋಸೆಫ್ ಮದ್ರಾಸ್ ಸಂಸ್ಥಾನಾಂತ್ ಗಾಂಧೀಜಿಚಿಂ ತತ್ವಾಂ ಪಾಸಾರ್ಚೆ ಖಾತಿರ್ ಆಪ್ಲೊ ಹುದ್ದೊ ಆನಿ ವ್ಹಡ್ ಸಾಮಾಜಿಕ್ ಸ್ಥಾನ್‍ಮಾನ್ ಮುಲ್ಯಾಕ್ ಲೊಟುನ್ ಮುಕಾರ್ ಸರ್ತಾ, ಕಾಮೆಲ್ಯಾಂಚೊ ವ್ಹರ್ತೊ ಮುಕೆಲಿ ಜಾವ್ನ್ ಫುಡೆಂ ಮೆಟಾಂ ಕಾಡ್ತಾ. ತಿರುವಾಂಕೂರ್ ಸಂಸ್ಥಾನ್ ಏಕ್ ಸ್ವತಂತ್ರ್ ದೇಶಿ ರಾಯ್ಪಾಟ್ ಜಾವ್ನಾಸ್‍ಲ್ಲೆಂ. ಥಂಯ್ಚೊ ಅನ್ನಾಪರಂಬಿಲ್ ಜೋಸೆಫ್ ಜಾನ್ ನಾಂವಾಡ್ದಿಕ್ ಸುಟ್ಕಾಯೆ ಝುಜಾರಿ ಜಾವ್ನಾಸ್‍ಲ್ಲೊ. ತೊ ಮುಕಾರ್ ಸಂಸ್ಥಾನಾಚೊ ಮುಕೆಲ್ ಮಂತ್ರಿ ಜಾಲೊ ತರಿ ಗಾಂಧಿ ಸಿದ್ದಾಂತ್ ಸಂಸ್ಥಾನಾಂತ್ ವಾಡುಂಕ್ ತಾಣೆ ವ್ಹರ್ತಿ ಸೆವಾ ದಿಲ್ಯಾ.
ಜೆ ಸಿ ಕುಮಾರಪ್ಪ (ಜೊನ್ ಜೇಸುದಾಸನ್ ಕೊರ್ನೆಲಿಯುಸ್) ಗಾಂಧೀಜಿ ಸವೆಂ ವ್ಹರ್ತೊ ವಾವ್ರ್ ಕೆಲ್ಲೊ ತಾಚೊ ಮೊಗಾಳ್ ಸಾಂಗಾತಿ, ಕುಮಾರಪ್ಪಾನ್ ಗಾಂಧೀಜಿಚಿಂ ತತ್ವಾಂ ಲೊಕಾಮೊಗಾಳ್ ಕರುಂಕ್ ಹರ್ ಪ್ರೇತನಾಂ ಕೆಲಿಂ. ಗಾಂಧೀಜಿನ್ ಆಪ್ಲ್ಯಾ ದಂಡಿ ಪಾಂಯ್‍ವಾಟೆಚ್ಯಾ 250 ಮಯ್ಲಾಂ ಚಲುಂಕ್ (ಮಿಟಾ ಸತ್ಯಾಗ್ರಹ್) 78 ಸಾಂಗಾತ್ಯಾಂಕ್ ವಿಂಚ್ತಾನಾ ತಾಣೆ ಎಕಾ ಕ್ರಿಸ್ತಾಂವ್ ಭಾವಾಕ್ ವಿಂಚ್ಲೊ ತೊಚ್ ಟಯ್ಟ್‍ಸ್‍ಜಿ (ತೇವರ್‍ತುಂಡಿಲ್ ಟಯ್ಟಸ್) ಮ್ಹಣ್ಚೆಂ ಆಮ್ಕಾಂ ವ್ಹಡ್ ಅಭಿಮಾನಾಚೆಂ. ಪಾವ್ಲ್ ರಾಮಾಸ್ವಾಮಿ ದೆಶಾಚ್ಯಾ ಸುಟ್ಕಾಯೆ ಖಾತಿರ್ ಸಭಾರ್ ಪಾವ್ಟಿಂ ಜಯ್ಲಾಕ್ ಗೆಲೊ. ಗಾಂಧೀಜಿಚ್ಯಾ ಮುಕೇಲ್ಪಣಾರ್ ದೆಶಾಖಾತಿರ್ ಝುಜ್‍ಲ್ಲಿಂ ಅಕ್ಕಮ್ಮ ಚೆರಿಯನ್, ಟಿ ಎಮ್ ವರ್ಗೀಸ್, ಆನ್ ಮಸ್ಕರೇನ್ಹಸ್, ಫಿಲಿಪ್ಪೋಸ್ ಎಳಾಂಜಿಕ್ಕಲ್ ಜೊನ್ ಅಸಲ್ಯಾಂಚಿಂ ನಾಂವಾಂ ಆಮ್ಕಾಂ ಅಭಿಮಾನ್ ಹಾಡ್ಚಿಂ.
ದೆಶಾಚ್ಯಾ ಸುಟ್ಕಾಯೆ ಝುಜಾಂತ್ ಕೆನರಾಚ್ಯಾ ಕ್ರಿಸ್ತಾಂವ್ ಮುಕೆಲ್ಯಾಂನಿಯಿ ಆಪ್ಲಿ ವರ್ತಿ ದೆಣ್ಗಿ ದಿಲ್ಯಾ. ಕದ್ರೆ ಇಸ್ಕೊಲಾಚೊ ಗಾಂಧೀ ಮಾರ್ಸೆಲ್ ಸೋಜ್, ನಳ್ಯಾ ಕಾರ್ಖಾನ್ಯಾಚೊ ಫೆಲಿಕ್ಸ್ ಅಲ್ಬುಕೆರ್ ಪಯ್, ತಾಂಗೆರ್ಚಿ ಒಕ್ಟೇವಿಯಾ ಅಲ್ಬುಕರ್ಕ್, ಜೆಜ್ವಿತ್ ಪಾದ್ರಿ ಜೆರೊಮ್ ಡಿಸೋಜಾ, ಬೊಂಬಯ್ ವಸ್ತೆಕ್ ರಾವ್‍ಲ್ಲೊ ಮಂಗ್ಳುರ್‍ಗಾರ್ ಜೊನ್ ಫ್ರಾನ್ಸಿಸ್ ಪಿಂಟೊ (ಗಾಂಧಿ ಪಿಂಟೊ), ಜೆರೊಮ್ ಸಲ್ಡಾನ್ಹಾ, ಜೊಕಿಮ್ ಸಂತಾನ್ ಆಳ್ವಾ ಆನಿ ತಾಚಿ ಪತಿಣ್ ವಾಯ್ಲೆಟ್ ಆಳ್ವಾ, ತೊಮಾಸ್ ಆಲ್ವಾರಿಸ್ ಆನಿ ತಾಚಿ ಪತಿಣ್ ಹೆಲೆನ್ ಆಲ್ವಾರಿಸ್, ಸಿಪ್ರಿಯನ್ ಆಲ್ವಾರಿಸ್ ಆನಿ ತಾಚಿ ಪತಿಣ್ ಆಲಿಸ್ ಆಲ್ವಾರಿಸ್ ಹ್ಯಾ ಪಯ್ಕಿ ಥೊಡಿಂ ಮಹತ್ವಾಚಿಂ ನಾಂವಾಂ.
ಕೆನರಾ ಕಥೋಲಿಕಾಂ ಪಯ್ಕಿ ತೆಗಾಂ ಜೊಡ್ಯಾಂನಿ ಭಾರತಾಚ್ಯಾ ಸುಟ್ಕಾಯೆ ಖಾತಿರ್ ಗಾಂಧೀಜಿಚ್ಯಾ ಮುಕೇಲ್ಪಣಾರ್ ವರ್ತಿ ಸೆವಾ ದಿಲ್ಯಾ ಮ್ಹಣ್ಚಿ ಗಜಾಲ್ ಭೋವ್ಶಾ ಹೆರ್ ಖಂಚ್ಯಾಯ್ ಲಾಗಿಂ ಮೆಳಾನಾತ್‍ಲ್ಲೊ ದಾಕ್ಲೊಚ್ ಮ್ಹಣುಂಯೆತಾ. ತೊಮಾಸ್ ಆಲ್ವಾರಿಸ್ ಆನಿ ತಾಚಿ ಪತಿಣ್ ಹೆಲೆನ್ ಆಲ್ವಾರಿಸ್ ಕೊಲೊಂಬೊಂತ್ ಆಸ್ತಾಂ ಗಾಂಧೀಜಿಚ್ಯಾ ಪ್ರಭಾವಾಕ್ ಆಯ್ಲಿಂ. ತಾಂಚ್ಯಾ ಘರಾ ಪಾವ್‍ಲ್ಲ್ಯಾ ಗಾಂಧೀಜಿಚ್ಯಾ ಸಿದ್ಧಾಂತಾಂನಿ ತಿಂ ಇತ್ಲಿಂ ಆಕರ್ಶಿತ್ ಜಾಲಿಂಕೀ ಭಾರತೀಯ್ ನಾಂವಾಂ ತಾಣಿಂ ಘೆತ್ಲಿಂ ಆನಿ ತಾಂಚ್ಯಾ ಉರ್ಗ್ಯಾಂಕ್‍ಯಿ ತಿಂ ಲಾಯ್ಲಿಂ. ಸಿಪ್ರಿಯನ್ ಆಲ್ವಾರಿಸ್ ಆನಿ ತಾಚಿ ಪತಿಣ್ ಆಲಿಸ್ ಆಲ್ವಾರಿಸ್ ವಾಡಾಲ ಮಿಟಾ ಸಂಘರ್ಶಾಂತ್ ಸಕ್ರಿಯ್ ರಿತಿನ್ ವಾವುರ್ಲಿಂ, ಹ್ಯಾ ಖಾತಿರ್ ತಾಣಿ ಬಂಧೆಂತ್ ಕುಸ್ಚೆಂ ಪಡ್ಲೆಂ. ಪರ್ತ್ಯಾಂ ದೊಗಾಂಯ್ಕೀ ಛಲೇಜಾವ್ ದಂಗ್ವಳೆ ವೆಳಿಂ ಬಂಧೆಂತ್ ಘಾಲೆಂ ತರೀ ತಿಂ ಭಿಯೆಲಿಂ ನಾಂತ್. ತಿಂ ಕಾಂಗ್ರೆಸ್ ರೇಡಿಯೋ ಸಯ್ತ್ ಚಲಯ್ತಾಲಿಂ. ಜೊಕಿಮ್ ಸಂತಾನ್ ಆಳ್ವಾ ಆನಿ ತಾಚಿ ಪತಿಣ್ ವಾಯ್ಲೆಟ್ ಆಳ್ವಾ ಸುಟ್ಕಾಯೆ ಝುಜಾವೆಳಿಂ ಮಾತ್ರ್ ನ್ಹಂಯ್ ತ್ಯಾ ಉಪ್ರಾಂತ್‍ಯಿ ದೆಶಾಕ್ ಭೋವ್ ವರ್ತೆಂ ಮುಕೇಲ್ಪಣ್ ದೀಂವ್ಕ್ ಸಕ್ಲ್ಯಾಂತ್.
ಕೊಲೊಂಬೊಂತ್ ಪೋಸ್ಟ್ ಮಾಸ್ಟರ್ ಜನರಲ್ ತಸಲ್ಯಾ ಭೋವ್ ಉಂಚ್ಲ್ಯಾ ಹುದ್ದ್ಯಾರ್ ಆಸ್‍ಲ್ಲೊ ಮಾವ್ರಿಸ್ ಶ್ರೇಷ್ಠ ಆಪ್ಲ್ಯಾ ನಿವೃತ್ತೆ ಉಪ್ರಾಂತ್ ಗಾಂಧೀಜಿಚ್ಯಾ ಸಿದ್ಧಾಂತಾಂಕ್ ಒಳಗ್ ಜಾತಾ ಆನಿ ಸಭಾರ್ ಅಡ್ಚಣೆಂ ಮಧೆಂಯ್ ಯುವಜಣಾಂಕ್ ಗಾಂಧೀಜಿಚ್ಯಾ ಸಿದ್ಧಾಂತಾಂ ಥಂಯ್ ವೊಡುಂಕ್ ವಾವ್ರ್ ಕರ್ತಾ. ಫೆಲಿಕ್ಸ್ ಆಲ್ಬುಕರ್ಕಾನ್ ಗಾಂಧೀಜಿಚ್ಯಾ ಉಲ್ಯಾಕ್ ಪಾಳೊ ದೀವ್ನ್ ಆಪ್ಲ್ಯಾ ವಾವ್ರಾಡ್ಯಾಂ ಸವೆಂ ಮೆಳುನ್ ಸರ್ಕಾರಾಚೊ ಕಾಯ್ದೊ ಮೊಡುನ್ ಬೊಳಾರಾಂತ್ ಮೀಟ್ ಕೆಲೆಂ. 1933 ಇಸ್ವೆಂತ್ ಜವಹರ್‍ಲಾಲ್ ನೆಹ್ರೂ ಮಂಗ್ಳುರಾಕ್ ಆಯ್ಲೊ ತೆನ್ನಾ ತೊ ಪಯಿಲ್ಲೆಂ ಫೆಲಿಕ್ಸ್ ಅಲ್ಬುಕರ್ಕಾಚ್ಯಾ ಘರಾ ಗೆಲೊ ಆನಿ ಥಂಯ್ ಥಾವ್ನ್ ಜುಲುಸ್ (ಪುರ್ಶಾಂವ್) ಫಳ್ನೀರ್ ಪರ್ಯಾಂತ್ ಚಲ್ಲೊ. ಹ್ಯಾ ಸಗ್ಳ್ಯಾಚೊ ಖರ್ಚ್ ಅಲ್ಬುಕರ್ಕ್ ಕುಟ್ಮಾನ್ ಮಾತೆಂ ಮಾರ್ಲೊ. ಹ್ಯಾ ಕುಟ್ಮಾನ್ ಮಂಗ್ಳುರ್ ಶಹರಾಚ್ಯಾ ಮದ್ಗಾತ್ ಆಸ್‍ಲ್ಲಿ ಆಪ್ಲಿ ಸಭಾರ್ ಆಸ್ತ್ ಗಾಂವ್ಚ್ಯಾ ಬರ್ಯಾ ಖಾತಿರ್ ದಾನ್ ಕೆಲಿ.
ಭಾರತಾಚ್ಯಾ ಸಂವಿಧಾನ್ ರಚ್ನೆಸಭೆಂತ್ ಏಕ್ ಮಂಗ್ಳುರ್‍ಗಾರ್ ಜೆಜ್ವಿತ್ ಯಾಜಕ್ ಸಾಂದೊ ಜಾವ್ನಾಸ್‍ಲ್ಲೊ ಮ್ಹಣ್ಚಿ ಆಮ್ಕಾಂ ವ್ಹಡ್ ಸಂತೊಸಾಚಿ ಗಜಾಲ್ ಕಿರ್ಯಾಂಚೊ ಜೆರೊಮ್ ಸೊಜ್ 6-8-1897 ವೆರ್ ಜನ್ಮಾಲೊ ತಾಚೆಂ ಶಿಕಪ್ ಸಾಂತ್ ಲುವಿಸ್ ಕೊಲೆಜಿಂತ್ ತಶೆಂಸ್ ಮದ್ರಾಸಾಂತ್ ಸಂಪ್ಲೆಂ. ಟ್ರಿಚ್ಚಿ ಸಾಂತ್ ಜುಜೆಚ್ಯಾ ಕೊಲೆಜಿಂತ್ ಶಿಕಯ್ತಾನಾ ತಾಣೆ ದಾಕಯಿಲ್ಲಿ ಬುಧ್ವಂತ್ಕಾಯ್ ಚಕ್ರವರ್ತಿ ರಾಜಗೋಪಾಲಾಚಾರಿಚ್ಯಾ ಗುಮಾನಾಕ್ ಆಯ್ಲಿ. ತಾಣೆಂ ಜೆರೊಮ್ ಸೊಜಾಚೆಂ ನಾಂವ್ ನೆಹ್ರೂಚ್ಯಾ ಕಾನಾಂತ್ ಘಾಲೆಂ. ಬಾಪ್ ಜೆರೊಮ್ ಸಂವಿಧಾನ್ ರಚ್ನೆಸಭೆಚೊ ಸಾಂದೊ ಜಾಲೊ ಮಾತ್ರ್ ನ್ಹಂಯ್ ಸಭಾರ್ ಮಹತ್ವಾಚ್ಯಾ ಗಜಾಲಿಂನಿ ಪ್ರದಾನಿಕ್ ಸಲಹಾದಾರ್ ಜಾಲೊ. ತೆಚ್ ಪರಿಂ ಫ್ರಾನ್ಸ್ ಭಾರತಾ ಥಾವ್ನ್ ಭಾಯ್ರ್ ಸರ್ಚ್ಯಾ ಆನಿ ಪುಡ್ತುಗೆಝಾಂಚೆಂ ಬಳ್ ಮೊಡ್ಚ್ಯಾ ಕಾಮಾಂತ್‍ಯಿ ತಾಚಿ ವರ್ತಿ ದೆಣ್ಗಿ ಆಸಾ.
ಭಾರತಾಚ್ಯಾ ಸಂವಿಧಾನ್ ಸಂರಚನ್ ಸಭೆಂತ್ ಸೆವಾ ದಿಲ್ಲ್ಯಾ ಹೆರ್ ಕ್ರಿಸ್ತಾಂವಾಂಚಿಂ ನಾಂವಾಂ ಅಶಿಂ ಆಸಾತ್. : ಮದ್ರಾಸ್‍ಥಾವ್ನ್: ಆನ್ನಿ ಮಸ್ಕರೇನ್ಹಸ್, ಬಾಪ್ ಜೆರೊಮ್ ಡಿಸೋಜಾ ಜೆ.ಸ., ಎಸ್ ಹೆಚ್ ಪ್ರೇಟರ್, ಟಿ ಜೆ ಎಮ್ ವಿಲ್ಸನ್, ಬಂಗಾಲ್ ಪ್ರಾಂತಾಥಾವ್ನ್ ಹರೇಂದ್ರ ಕುಮಾರ್ ಮುಖರ್ಜಿ (ಹೊ ಸಂವಿಧಾನ್ ಸಂರಚನ್ ಸಭೆಚೊ ಸಭೆಚೊ ಉಪಾಧ್ಯಕ್ಷ್ ಜಾವ್ನ್ ವಾವುರ್ಲೊ ಆನಿ ಉಪ್ರಾಂತ್ ಬಂಗಾಲ್ ಪ್ರಾಂತ್ಯಾಚೊ ರಾಜ್ಯ್‍ಪಾಲ್‍ಯಿ ಜಾಲೊ) ಬೊಂಬಯ್‍ಥಾವ್ನ್: ಜೋಸೆಫ್ ಆಲ್ಬನ್ ಡಿಸೋಜಾ, ಕೇಂದ್ರ್ ಪ್ರಾಂತ್ಯಾಥಾವ್ನ್ (ಆತಾಂಚೆಂ ಮಧ್ಯ ಪ್ರದೇಶ್): ಪ್ರ್ಯಾಂಕ್ ಆಂತೋನಿ, ರಾಜ್‍ಕುಮಾರಿ ಅಮೃತ ಕಾವ್ರ್, ಸಂಯುಕ್ತ್ ಪ್ರಾಂತ್ಯಾಥಾವ್ನ್ : ಎ ಧರಮ್ ದಾಸ್, ಆಸ್ಸಾಮಾಥಾವ್ನ್ : ಜೆ ಜೆ ಎಮ್ ನಿಕೋಲಸ್, ಟ್ರಾಂವಕೂರ್ ಕೊಚ್ಚಿನ್‍ಥಾವ್ನ್: ಪಿ ಟಿ ಚಾಕೋ, ಜೊನ್ ಮಥಾಯ್.
ಹಿಂ ಥೊಡಿಂ ನಾಂವಾಂ ಹಾಂವೆಂ ಸಾಂಗ್ಲಿಂ ಮುಕೆಲ್ಯಾಂಚಿಂ. ಪೂಣ್ ಹಜಾರೊ ಕ್ರಿಸ್ತಾಂವಾಂನಿ ದೆಶಾ ಖಾತಿರ್, ಸುಟ್ಕಾಯೆ ಖಾತಿರ್ ಆಪ್ಲೆಂ ರಗತ್ ವ್ಹಾರಯಿಲ್ಲೆಂ ಆಸಾ, ಬಂಧೆಸಾಳೆಕ್ ಗೆಲ್ಲೆಂ, ಲಾಠಿಯೆ ಮಾರ್ ಖೆಲ್ಲೆಂ ಆಸಾ. ತ್ಯಾ ವೆಳಾರ್‍ಯಿ ಗಾಂಧೀಕ್ ದುರ್ಸಾತಲಿಂ, ಟಿಪ್ಪುಕ್ ಕಾಂಠಾಳ್ತಲಿಂ, ಕಲ್ಯಾಣಪ್ಪಾಕ್ ಯೆಟ್ತಲಿಂ, ಧೋಂಡಿಯಾ ವಾಘಾಕ್ ಸೊವ್ತಲಿಂ, ನರಗುಂದಾಚ್ಯಾ ಬಾಬಾಸಾಹೇಬಾಕ್ ಶಿರಾಪ್ತಾಲಿಂ ಆಸ್‍ಲ್ಲಿಂ. ಆತಾಂಯ್ ಥೊಡಿಂ ಆಸಾತ್! ‘ಮ್ಹಜೊ, ಮ್ಹಜೊ ಮ್ಹಜೊ ಹೊ ದೇಶ್ ಮ್ಹಣಾನಾತ್‍ಲ್ಲೊ ಕಾಳ್ಜಾಘುಡ್ ಫಕತ್ ಸುಡ್ಗಾಡ್’ (ನನ್ನದು ನನ್ನದು ನನ್ನದು ಈ ನಾಡು ಎನ್ನದ ಎದೆ ಬರೇ ಸುಡುಗಾಡು) ಮ್ಹಣ್ ಕನ್ನಡಾಂತ್ ಏಕ್ ಸಾಂಗ್ಣಿ ಆಸಾ. ಆಮ್ಚೊ ಕಾಳ್ಜಾಘುಡ್ ಸುಡ್ಗಾಡ್ ಕರ್ನ್ ಘೆಂವ್ಚೊ ನಾಕಾ.
ಕಿತೆಂ ಕರಿಜಯ್ ಆಸ್‍ಲ್ಲೆಂ ಕಲ್ಯಾಣಪ್ಪಾನ್? ಪರ್ದೆಶಿ ಬಿಕಾರ್ಯಾ ಬ್ರಿಟಿಶಾಂನಿ ಆಮ್ಚ್ಯಾ ಸ್ತ್ರೀಯಾಂಚೊ ಮಾನ್ ಲುಟ್ಚೊ, ಲೊಕಾಚೆಂ ಶಿತ್ ಫಾರ್ನ್ ವ್ಹರ್ಚೆಂ, ದುಬ್ಳ್ಯಾದಾಕ್ಟ್ಯಾಂಕ್ ಪಾಶಿಯೆಕ್ ಘಾಲ್ಚೆಂ ಪಳವ್ನ್ ತಾಂಕಾಂ ದುಸ್ಪಾಟಾಯ್ನಾಶೆಂ ಹಿಜ್ಡ್ಯಾಂಪರಿಂ ದೊಳೆಧಾಂಪುನ್ ಬಸಾಜೆ ಆಸ್‍ಲ್ಲೆಂ ಕಿತೆಂ? ತಶೆಂ ತರಿ ಹೊ ದೇಶ್ ಕೊಣಾಚೊ, ದೇಶ್‍ಭಕ್ತ್ ಕಲ್ಯಾಣಪ್ಪಾಚೊಗಿ, ತ್ಯಾ ಪಿಂರ್ಗ್ಯಾ ಪರ್ಕಟ್, ಸಾರ್ಕೆಂ ಪಾಂಗುರ್ಚ್ಯಾ ವೊಲಿ ತೆದಿ ಭುಂಯ್ ನಾತ್‍ಲ್ಲ್ಯಾ ಬ್ರಿಟಿಶಾಂಚೊ? ವ್ಯಾಪಾರಾಚ್ಯಾ ನಿಬಾನ್ ದೆಶಾಂತ್ ರಿಗುನ್ ಆಮ್ಕಾಂ ಮುಟಿಂತ್ ಧರುಂಕ್ ಪಳಯಿಲ್ಲ್ಯಾ ಬ್ರಿಟಿಶಾಂಕ್ ಧಾಂವ್ಡಾಂವ್ಚ್ಯಾಂತ್ ಎಕ್ವಟ್ಲಲ್ಯಾ ಸರ್ವ್ ಕ್ರಿಸ್ತಾಂವ್ ಭಾಂವ್ಡಾಂಚ್ಯಾ ರಗ್ತಾಚೊ ಉಗ್ಡಾಸ್ ಕಾಡ್ಯಾಂ ತಾಂಚೆಪರಿಂ ದೆಶಾಕ್ ಪಯ್ಲೊ ಮಾನ್ ದೀಂವ್ಕ್ ಶಿಕ್ಯಾಂ. ಹೊ ದೇಶ್ ಮ್ಹಜೊ ಸಂಸ್ರಾಚ್ಯಾ ಸರ್ವ್ ದೆಶಾಂ ಪ್ರಾಸ್ ವ್ಹರ್ತೊ ಮ್ಹಳ್ಳೆಂ ಸತ್ ಖರ್ಯಾನ್ ಸಮ್ಜುನ್ ಘೆವ್ಯಾಂ.
ಬರಯ್ಣಾರ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
.png)
.png)
.png)