Articles / Special

Photo : unsplash.com

ಹ್ಯಾ ದಿಸಾಂನಿ ಪೇಪರಾಂನಿ ಆಮಿ ಥಂಯ್‍ಹಾಂಗಾ ಆಟಿಚ್ಯಾ ಖಾಣಾಜೆವ್ಣಾಚ್ಯಾ ಫೆಸ್ತಾಂಚಿ ಖಬರ್ ವಾಚ್ತಾಂವ್. ಲೊಕಾಂನಿ ಪತ್ರಾಡೆ, ಪಾತೊಳ್ಯೊ ಆನಿ ಕಿತೆಂ ಆನಿ ಕಿತೆಂ ರಾಂದುನ್ ಖೆಲೆಂ ಮ್ಹಣ್ಚಿ ಖಬರ್ ವಾಚ್ತಾನಾಂ ಆಟಿ ಮ್ಹಳ್ಯಾರ್ ಕಾಂಯ್ ಆಂಚ್ಯಾ ಲೊಕಾಕ್ ಫೆಸ್ತಾ ಸಂರಮಾಂಚೊ, ಮಜೆಚೊ ಕಾಳ್ ಜಾವ್ನಾಸ್‍ಲ್ಲೊ ಮ್ಹಳ್ಳೆಂ ಚಿಂತಪ್ ಯೇಂವ್ಕ್ ಪುರೊ. ಖರ್ಯಾನ್ ಆಟಿ ಕೆನರಾ ಕೊಂಕ್ಣಿ ಲೊಕಾಕ್ ಮಾತ್ರ್ ನ್ಹಂಯ್ ಕರ್ನಾಟಕಾ ಕರಾವಳಿಚ್ಯಾ ಆನಿ ಘಾಟಾಚ್ಯಾ (ಕಾರ್ವಾರ್, ಉಡ್ಪಾ, ಶಿಮ್ಗೆ, ಚಿಕ್‍ಮಗ್ಳುರ್, ಕೊಡ್ಗ್ಯಾ ಆನಿ ಮಂಗ್ಳುರ್ ಜಿಲ್ಲ್ಯಾಂಚ್ಯಾ) ಲೊಕಾಕ್ ಎಕ್ದಮ್ ದುಬ್ಳಿಕಾಯೆಚೊ, ವಿಪ್ರೀತ್ ಭುಕೆಚೊ ಪಿಡೆಂಚೊ, ಮೊರ್ನಾಂಚೊ ಕಾಳ್ ಜಾವ್ನಾಸ್‍ಲ್ಲೊ. ಆನಿ ತ್ಯಾ ದುಬ್ಳಿಕಾಐಎಚ್ಯಾ ದಿಸಾಂಕ್ ಉಗ್ಡಾಸಾಕ್ ಹಾಡುಂಕ್ ಆಟಿಚೊ ಮ್ಹಯ್ನೊ ಸಂಭ್ರಮ್ಚಿ ರಿವಾಜ್ ವಾಡ್ಲ್ಯಾ.

ಕೊಂಕ್ಣಿ ಲೊಕಾಚೆಂ ವರಸ್ ಪಾವ್ಸಾಚೆರ್ ಬಾಂದುನ್ ಹಾಡ್ಲಾಂ. ಪಯಿಲ್ಲೊ ಮ್ಹಯ್ನೊ ಬೆಸೊ ಮ್ಹಣ್ ಲೆಕ್ ತ್ಯಾ ಉಪ್ರಾಂತ್ ಕಾರ್ತಿಂಗೊಳ್, ಆಟಿ, ಸೊಣ್, ನಿರ್ನಾಳ್, ಬೊಂತಿಂಗೊಳ್, ಜಾರ್ದೊ, ಪೆರಾರ್ದೊ, ಪುಂಯ್ತೆಲ್, ಮಾಯಿ, ಸುಗ್ಗಿ, ಪಗ್ಗು, ಅಶೆಂ ಒಟ್ಟುಕ್ ಬಾರಾ ಮ್ಹಯ್ನೆ. ಬೆಶ್ಯಾಂತ್ (ಮೇ-ಜೂನ್) ಗೀಮ್ ಎಕ್ದಮ್ ತಾಪುನ್ ಮುಗ್ದಾತಾ ಆನಿ ತ್ಯಾ ಧಗಿನ್ ಪಯ್ಲೊ ಪಾವ್ಸ್ ಸುರ್ವಾತ್ತಾ. ಕ್ರಮೇಣ್ ಪಾವ್ಸ್ ಚಡ್ ಜಾವ್ನ್‍ಂಚ್ ಯೆತಾ. ಕಾರ್ತಿಂಗೊಳ್ ಜಾವ್ನ್ ಆಟಿ ಆಯ್ಲಿ ಮ್ಹಣ್ತಾನಾಂ ಪಾವ್ಸ್ ವಿಪ್ರೀತ್ ಜಾತಾ. ಸೊಣಾಂತ್ ಪಾವ್ಸ್ ತಿಕ್ಕೆಶೆ ಉಣೆಂ ಜಾವ್ನ್ ಯೆತಾ ಆನಿ ಸಾಗೊಳೆಚ್ಯಾ ಕಾಮಾಕ್ ನವಿ ಘುಂವ್ಡಿ ಮೆಳ್ತಾ. ಅಶೆಂ ಬೆಸೊ, ಕಾರ್ತಿಂಗೊಳ್, ಆಟಿ, ಸೊಣ್ ಪಾವ್ಸಾಚೆ ಮ್ಹಯ್ನೆ. ಸುಗ್ಗೆಂತ್ ಜಾಲ್ಲಿ ಸಾಗೊಳೆಚಿ ಸಂಪತ್ತಿ ಮುಗ್ದಿನಾಶೆಂ ಪಾಗ್ಗುಂತ್ ತಿ ಸಕ್ಕಡ್ ಬಾಂದುನ್ ದವರ್ಚಿ ಆಸ್‍ಲ್ಲಿ ಆನಿ ಪಾವ್ಸಾಂತ್ ಜಾಯ್ ಮ್ಹಣ್ ಜಾಗ್ರುತ್ಕಾಯ್ ಕರ್ಚಿ ಆಸ್‍ಲ್ಲಿ ಹಾಕಾಚ್ ‘ಸುಗ್ಗೆಂತ್ ಜಾಲ್ಲೆಂ ಪಾಗ್ಗುಂತ್ ಬಾಂದುನ್ ದವರ್ಲೆಂ’ ಮ್ಹಣ್ ಗಾದ್ ಜಾಲಿ.

ಆದ್ಲ್ಯಾ ದಿಸಾಂನಿ ಗಾಂವಾಕ್ ಏಕ್ ಸಾವ್ಕಾರ್ ಆನಿ ಉರ್‍ಲ್ಲೆ ಸಕ್ಕಡ್ ತಾಚೆ ನವ್ಕರ್ ಜಾಲ್ಲ್ಯಾ ಪರಿಗತೆಂತ್ ದುಬ್ಳ್ಯಾಮಾಯೆಚ್ಯಾ ಭುರ್ಗ್ಯಾಂನಿ ಪಾಗ್ಗುಂತ್ ಬಾಂದುನ್ ದವರ್ಚೆಂ ತರಿ ಕಿತೆಂ? ವಾಲಿರ್ ಜಾಲ್ಲಿಂ ಮೊಗಿಂ, ನೆಜಿ ಬಾತಾಕ್(ಲುಂವ್ಣೆಕ್) ವಚುನ್ ಕುಲಿಂತ್ ಹಾಡ್‍ಲ್ಲೊ ಮುಟಾಂಬೊ ಆನಿ ಉಕ್ಡೊ ತಾಂದುಳ್, ಪೊಣ್ಸಾಚಿಂ ಭಿಕ್ಣಾಂ, ಮಿಟಾಕ್ ಘಾಲ್ಲೆ ಗರೆ, ಕೊಳಾಕ್ ಘಾಲ್ಲಿಂ ತೊರಾಂ, ಮಿಟಾ ಉದ್ಕಾಂತ್ ಘಾಲ್ಲಿ ಕಾಂಡಿ, ಮಾವ್ ಆನಿ ಚರ್ಕಾಂಡ್ ಹ್ಯಾ ಸಕ್ಡಾಂ ಸವೆಂ ಕಾಂಯ್ ಇಲ್ಲ್ಯಾ ತಾಂಕಿವಂತಾಂಚ್ಯಾ ಘರಾಂನಿ ತರ್ ಆಂಬ್ಯಾ ಗಿರೊಪ್ ಉಕ್ಡುನ್ ಸುಕೊವ್ನ್ ಕೆಲ್ಲೆಂ ಆಮ್ಸಾಟ್, ಪೆಂಟೆಥಾವ್ನ್ ಹಾಡ್ನ್ ಸುಕೊವ್ನ್ ದವರ್ಲಲಿ ಮಾಸ್ಳಿ, ತರ್ನ್ಯಾ ತೊರಾಂಚಿಂ ಸೊಲಾಂ. ಹೆಂ ಸಕ್ಕಡ್ ಪಾವ್ಸಾಕ್ ಸಂಪತ್ತಿ.

ಆದಿಂ ಪಾವ್ಸ್ ಎಕ್ಪಾವ್ಟ್ ಧರ್ಲೊ ತರ್ ನೊಯೆಚ್ಯಾ ಕಾಳಾರ್ ಧರ್‍ಲ್ಲೆಪರಿಂ ಮೊಳ್ಬಾರ್ ಸುರ್‍ಯಾಚ್ಯಾ ಕಿರ್ಣಾಚಿ ಸಾವ್ ಸಯ್ತ್ ನಾಸ್ತಾನಾಂ ಪಾವ್ಸ್ ಧರ್ತಾಲೊ. ಹಾಕಾ ಶಿರಾಂಧಾರಿಂಚೊ ಪಾವ್ಸ್ ಮ್ಹಣ್ತಾಲೆ. ಮೊಳ್ಬಾಕ್ ಬುರಾಕ್ ಜಾವ್ನ್ ವೊತ್ತಾ ಮ್ಹಳ್ಳ್ಯಾಪರಿಂ ಪಾವ್ಸ್ ಪಡ್ತಾನಾಂ ‘ರಾಂದ್ಣಿಂತ್ ಘಾಲುಂಕ್ ಭಿಕಾಣ್ ಆಸ್ಲ್ಯಾರ್ ಘರ್ಚೆಂ ಮೆಟ್ ದೆಂವ್ಚೊಂ ನಾ’ ಮ್ಹಣ್ಚಿ ಪರಿಗತ್ ಉದೆತಾಲಿ. ಪಾಗ್ಗುಂ ಬಾಂದುನ್ ದವರ್ಲಲೆಂ ಬೆಶ್ಯಾ ಕಾರ್ತಿಂಗೊಳಾಂತ್‍ಚ್ ಖಾಲಿ ಜಾತಾಲೆಂ. ಮಾಗಿರ್ ಆಟಿಂತ್ ಕಿತೆಂ ಉರ್ಲೆಂ. ತವಳ್ ಸುರ್ವಾತ್ತಾಲೆ ಆಮ್ಚ್ಯಾ ಲೊಕಾಚೆ ಭುಕೆ-ಉಪ್ವಾಸಾಂಚ್ಯಾ ವಳ್ವಳ್ಯಾಂಚೆ ದೀಸ್. ತರಿ ದೇವ್ ಆಪ್ಲ್ಯಾ ಭುರ್ಗ್ಯಾಂಕ್ ಉಪ್ವಾಸ್ ಪಡುಂಕ್ ಸಾಧಾರ್ಣಾಕ್ ಸೊಡಿನಾತ್ಲಲೊ. ತೆಣೆಂ ತೆರೆಂ, ಹೆಣೆಂ ಆಳುಂ, ಕಿರ್ಲಾತಾಲೆಂ, ತಾಯ್ಕುಳೊ ವಾಡುನ್ ಯೆತಾಲೊ. ಲೆಂಕ್ರಿ ವಾಶ್ಯಾ ಮುಳಾಂನಿ ಕೀರ್ಲ್ ಮುಂಗ್ಗೆತಾಲೊ, ಘಡ್ಗಡ್ಯಾಕ್ ಭುಂಯ್ಪುಟಾಂ- ಕಳ್ಳಾಲಾಂಬ್- ಆಳ್ಮಿಂ ಉದೆತಾಲಿಂ, ಮುಸ್ಕಾರುಕಾಕ್ ನವೊ ಪಾಲೊ ಆಂಕ್ರೆತಾಲೊ. ವ್ಹಾಳ್ಯಾಂನಿ ನಮುನ್ಯಾವಾರ್ ಮಾಸ್ಳ್ಯೊ, ಉಬ್ರಾಗಾದ್ಯಾಂನಿ ಕೊಂಗ್ಗೆ-ಗುಲಿಯೊ ರಾಸ್ ಪಡ್ತಾಲ್ಯೊ, ಕಾಂಯ್ ಥೊಡ್ಯಾ ರುಕಾಂನಿ ಪೊಣೊಸ್ ಉರ್ತಾಲೆ. ತಾಂತುಂಚ್ ಲೊಕಾನ್ ಆಪ್ಲಿ ಭುಕ್ ತಿರ್ಸುಂಚಿ ಅನಿವಾರ್ಯತಾ ಆಸಾ ಜಾತಾಲಿ ತ್ಯಾ ಆಟಿಂತ್. ಆಪ್ಲ್ಯಾ ಘರಾ ಆಸ್‍ಲ್ಲೊ ತಾಂದುಳ್ ಮುಗ್ದಾಲ್ಯಾ ಉಪ್ರಾಂತ್ ತೆವ್ಶಿಲ್ಯಾ ಘರಾಥಾವ್ನ್ ಮಾಗುನ್ ಹಾಡ್‍ಲ್ಲ್ಯಾ ಶೆರ್ ದೇಡ್ ಶೆರ್ ತಾಂದ್ಳಾಂತ್ ಪತ್ರಾಡೆ ಜಾತಾಲೆ, ಪಾತೊಳ್ಯೊ ಜಾತಾಲ್ಯೊ. ಪತ್ರಾಡೆ ಪಾತಳ್ಯೊ ರುಚಿಕ್ ಮ್ಹಣುನ್ ನ್ಹಂಯ್ ಬಗಾರ್ ಉಣ್ಯಾ ಖರ್ಚಾಂತ್ ಆಪ್ಲ್ಯಾ ಭುರ್ಗ್ಯಾಂಚೆಂ ಪೊಟ್ ಭರುಂಕ್ ಜಾತಾ ನ್ಹಂಯ್‍ಗಿ ಮ್ಹಣುನ್.

ತ್ಯಾ ಆಳ್ವಾ ಖೊಲ್ಯಾಚಿ ಚಟ್ನಿ ಜಾತಾಲಿ, ತಾಯ್ಕುಳ್ಯಾ ತಕ್ಲ್ಯೊ ಕಿಮ್ಚುನ್ ತಾಕಾ ಸಾಂತಾಣಿಂ (ಭಿಕ್ಣಾಂ) ಘಾಲ್ನ್ ಸುಕೆಂ ಜಾತಾಲೆಂ. ಭುಕೆನ್ ವಳ್ವಳ್ಚ್ಯಾ ಭುರ್ಗ್ಯಾಂಚ್ಯಾ ಪೊಟಾಂತ್ಲೊ ಉಜೊ ಧಾಂವ್ಡಾಂವ್ಕ್ ತಿ ತರಿ ಏಕ್ ವಾಟ್. ಕಾರೆಣ್ಯಾಚಿ ಚಟ್ನಿ, ಪಾವ್ಸಾಂತ್ ಬಿಂಡ್ಡಾಂಚ್ಯಾ ರುಕಾಕ್ ಜಾಲ್ಲ್ಯಾ ನವ್ಯಾ ಆಂಕ್ರೆಂಚಿ ಚಟ್ನಿ, ತಿತ್ಲೆಂ ಕಿತ್ಯಾ ಹಿತ್ಲಾಂತ್ ಕಿರ್ಲಾಲ್ಲ್ಯಾ ಪೊಟ್ಕೊಳೆಚ್ಯಾ ಫುಲಾಂಕ್ ದೋನ್ ಮಿರ್ಸಾಂಕೊ ಘಾಲ್ನ್ ತಿಕ್ಕ್ ಏಕ್ ಚಟ್ನಿ, ತಿಕ್ಕ್ ಕಿತ್ಯಾಕ್ ಮ್ಹಳ್ಯಾರ್ ಆಸ್‍ಲ್ಲೊ ಎಕ್ ನಾರ್ಲ್‍ಚ್ ತೀನ್ ದಿಸಾಂಕ್ ಖರ್ಚುಂಚ್ಯಾ ತ್ಯಾ ಕಷ್ಟಾಂಚ್ಯಾ ದಿಸಾಂನಿ ಭುರ್ಗಿಂ ಥೊಡ್ಯಾಚ್ ಚಟ್ನೆನ್ ಜೆವಣ್ ಸಂಪೊಂವ್ದಿತ್ ಮ್ಹಣ್ಚಿ ಆವಯ್ಚಿ ಆಶಾ. ಹ್ಯಾ ಆಟಿಂತ್ ಭುಕೆಜಾಳ್ ಮಾರುಂಕ್ ಖೆಲ್ಲ್ಯಾ ಖಾಣಾಂನಿ ಮಾಗಿರ್ ಕಿತೆಂಯ್ ಕುತ್ತೊ ಸುರು ಜಾಯ್ತ್ ಮ್ಹಣುನ್ ಆಟಿಚ್ಯಾ ಆಮಾಸೆ ದೀಸ್ ಸಾತಾಣ್ಯಾಚ್ಯಾ ಸಾಲಿಚೊ ಕಸಾಯ್ ಪಿಯೆಂವ್ಚಿ ರಿವಾಜ್ ವಾಡುನ್ ಆಯ್ಲ್ಯಾ.

ಆಟಿಕ್ ಘರ್ಚ್ಯಾ ಸುನೆಕ್ ತಾಚ್ಯಾ ಮಾಯೆರ್ (ಕುಳಾರಾ) ಧಾಡ್ಚಿ ರಿವಾಜ್ ಕಿತ್ಯಾಕ್ ವಾಡ್ಲಿ ಹಾಕಾ ದೋನ್ ಕಾರಣಾಂ ಝಳ್ಕಾತಾತ್. ಪಯ್ಲೆಂ ಮ್ಹಜ್ಯಾ ಘರ್ಚಿ ದುಬ್ಳಿಕಾಯ್ ಮ್ಹಜ್ಯಾ ಸುನೆನ್ ಪಳಂವ್ಚಿ ನಾಕಾ ಮ್ಹಣ್ ಜಾಂವ್ಕ್ ಪುರೊ- ಸುನ್ ತಾಚ್ಯಾ ಮಾಯೆರಾ ವೆತಾನಾಂ ಧೂವ್ ಘರಾ ಯೆತಾ, ಮ್ಹಜ್ಯಾ ಧುವೆನ್ ಮ್ಹಜೆ ಕಷ್ಟ್ ಪಳೆಲ್ಯಾರ್ ತರಿ ಸಯ್ ಮ್ಹಜ್ಯಾ ಸುನೆನ್ ತೆ ಪಳವ್ನ್ ಫಾಲ್ಯಾಂ ಮ್ಹಾಕಾ ಆಣ್ಕುಂಚೆಂ ನಾಕಾ ಮ್ಹಣ್ಚಿ ಏಕ್ ಗಜಾಲ್ ತರ್, ಆಟಿಂತ್ ಘೊವ್ ಭಾಯ್ಲಾಂ ಸಂಗಿಂ ಆಸುನ್ ಖಾಟಿಯೆ ಸಂಬಂಧ್ ಜಾವ್ನ್ ಗುರ್ವಾದಾರ್ ಆಯ್ಲ್ಯಾರ್ ಭುರ್ಗೆಂ ಭುಂಯ್‍ಪಡ್ಚೆಂ ಮಾರ್ಚ್ – ಎಪ್ರಿಲಾಂತ್ ಜಾತಾ ತೊ ಗಿಮೆಚೊ ಕಾಳ್ ಆನಿ ತ್ಯಾ ವೆಳಾರ್ ಬಾಳಂದ್ ಜಾಂವ್ಚೆಂ ಬಾಳ್ಶ್ಯಾಕ್‍ಯಿ – ಆವಯ್ಕ್‍ಯಿ ಪಾಡ್ ದೆಕುನ್ ತೆಂ ಚುಕೊಂವ್ಕ್ ಜಾಂವ್ಕ್ ಪುರೊ.

ಆಜ್ ಆಟಿಚ್ಯಾ ಉಗ್ಡಾಸಾಕ್ ನಮುನ್ಯಾವಾರ್ ಖಾಣಾಂಚಿ ವೆವಸ್ತಾ ಆಸಾ ಜಾಲ್ಯಾ ಕೋಣ್ ತರಿ ಆಟಿ ಮ್ಹಳ್ಯಾರ್ ವ್ಹಡ್ ದಬಾಜ್ಯಾಂಚೊ ಕಾಳ್ ಮ್ಹಣ್ಚೆಂ ಚಿಂತಪ್ ವಾಡೊವ್ನ್ ಘೆಂವ್ಕೀ ಪುರೊ, ಆವಯ್ ಬಾಪುಯ್ ಖಂಯ್ ಪಯ್ಸ್ ಕಾಮಾರ್ ಗೆಲ್ಲ್ಯಾ ವೆಳಾರ್ ಭಾಯ್ರ್ ಕಿತೆಂ ಆವಾಜ್ ಮ್ಹಣ್ ಪಾವ್ಸಾಕ್ ತಿಳುಂಕ್ ಗೆಲ್ಲಿಂ ಭುರ್ಗಿಂ ವ್ಹಳೂ ವ್ಹಳು ಮೆಟಾಂ ಕಾಡಿತ್ ಹಳ್ತ್ ಚುಕುನ್ ವ್ಹಾಳ್ಯಾಂತ್ ವ್ಹಾಳುನ್ ವೆಚೆಂ ಆನಿ ಥೊಡೊ ತೇಂಪ್ ರಡ್ನೆಂ ಮಾಗಿರ್ ಪಾಳ್ಣ್ಯಾಂತ್ ಆನ್ಯೇಕ್, ತೇಂಯಿ ಚುಕುನ್ ವಚಾನಾಂಯೆ ಮ್ಹಣ್ ಪೆಂಕ್ಡಾಕ್ ಮೊಟಿ ಮೂಂಜ್ ಘಾಲ್ನ್ ಘರ್ಚ್ಯಾ ಕಾಂಬ್ಯಾ ಕುಂಟಿಯೆಕ್ ಬಾಂದ್ಚೆಂ.

ಖಂಯ್ ಗೆಲೆ ತೆ ದೀಸ್? ತವಳ್ ಪೊಟಾಂಕ್ ಖಾಣ್ ನಾತ್‍ಲ್ಲೆಂ ತರಿ ಮತಿಂಕ್ ಸಮಾಧಾನ್ ಸಂತೊಸ್, ಸವಸ್ತ್‍ಕಾಯ್ ಆಸ್‍ಲ್ಲಿ. ಮೀಟ್ ಏಕ್ ಸೊಡ್ಲ್ಯಾರ್ ಘರ್ಚ್ಯೊ ಸರ್ವ್ ಗರ್ಜೊ ಘರಾ ಭಿತರ್ಲ್ಯಾ ಆನಿ ಆಸ್‍ಪಾಸ್ಚ್ಯಾ ವೆವಸ್ತ್ಯಾಂನಿ ಪುರ್ತಿ ಜಾತಾಲ್ಯೊ ತರಿ ಆಜ್‍ಕಾಲ್ ಸರ್ವ್ ವಸ್ತು ಮೊಲಾಂತ್ಲ್ಯಾನ್ ಮೊಲಾನ್ ಯೆತಾತ್ (ಪಾಯಾಂಕ್ ಘಾಲ್ಚ್ಯೊ ವ್ಹಾಣೊ ಎಸಿ ರುಮಾಂನಿ ಆನಿ ಪೊಟಾಕ್ ಖಾಂವ್ಚ್ಯೊ ವಸ್ತು ರಸ್ತೆ ಬಗ್ಲೆಂಚ್ಯಾ ಧುಳಿವಾಳಿಂತ್ ವಿಕ್ತಾತ್ ಮ್ಹಣ್ಚಿ ಏಕ್ ಕರಾಂದಾಯೆಚಿ ಗಜಾಲ್ ಆಸಾ ತೆಂ ಸೊಡ್ಯಾಂ) ತರಿ ಮನ್ಶಾಕ್ ಸಮಾಧಾನ್ ನಾ. ಫುಂಕ್ಯಾಕ್ ವಾಡ್‍ಲ್ಲೊ ತಾಯ್ಕುಳೊ ಖಾವ್ನ್ ತರಿ ಮತಿಕ್ ಸಮಧಾನ್-ಕುಡಿಕ್ ಭಲಾಯ್ಕಿ ಬರಿ ಆಸ್‍ಲ್ಲಿ ಆನಿ ಆಜ್ ಹಜಾರಾಂಚಿಂ ಖಾಣಾಂ ಖಾವಬ್ನ್‍ಯಿ ಮೀತ್ ಮಿಕ್ವಾಲ್ಲೊ ಮೊಸೊರ್, ದುಬಾವ್, ನಾಸೊಸ್ಣಿಕಾಯ್ ಆಮ್ಕಾಂ ಧೊಸ್ತಾ ತೆಂಯ್ ಹ್ಯಾ ಆಟಿಂತ್ ಸ್ಪಷ್ಟ್ ಕರ್ನ್ ಘೆವ್ಯಾಂ. ಹ್ಯಾ ಸಕ್ಡಾಕ್ ವೊಕತ್ ಕರ್ಚೊ ಸಾತಣ್ಯಾಚೊ ಕಸಾಯ್ ಮೆಳಾತ್ ತರಿ ಖಂಯ್?

ಬರಯ್ಣಾರ್ : ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ